Read Car_Nicobarese INCHŌḴ-OṘÔ 28 Bible Online

INCHŌḴ-OṘÔ 28 - Car_Nicobarese bible

INCHŌḴ-OṘÔ 28

¹Falngöre ngòh tötlöök yĕn öt hĕng tak lamū, sā lāyön pöri ngòh tölöök nö öt pa-ekūö.

²Yē panam nö tôichngen maṙôngö mahayöng angū-ö, i tarik pöri tö-akaha elmat tö-akaha inrē köp min angū-ö nö marô-òten.

³Ngòh yāich tarik mahakihten yāich sā ngih kumṙah töchahūköti nö öt ṙātö nyā-aṅkūö.

⁴Yip ṙamāngö chöngö ha-öiny tötlöök yip mahaköp chöngö pöri pītnyöre nö lā-al cha.

⁵Öt akahakūö vē tötlöök tarik tö kinṙôka tötmichūṙen, yip chamöh ngam Mā Tēv pöri keuheūtlöre mikah kūö tö e.

⁶Ĕhten ön ngòh yāich tarik lamök i mikah re tö ngòh tökôlò tarik töchōichö talöökö

⁷Tö-akaha ön nö kūön ngòh mahaköp chöngö, sumrōngkūö yöng re pöri ngòh nôlö töpōivat.

⁸Ngòh ṙamūöhten kanôlò re lökten i ṙāi inṙūöngö ṙinūhöl ṙôken inrē hamūlö e nö in ò öp tö-aheūkölōn tö yāich.

⁹Yĕn hĕng tak mahapungngö elnang re tö hināngö chöngö, pòrô öp invë-a tö ò ngaich nöng sin-òkkūö.

¹⁰Anga-aṅ ngòh mahalō-ongkūö töchiplö nö el talöökö tötlöök suktöre min nö el anūlö öp ahul ò; ngòh töt fāluṙen pöri amīnu min tö tölöök.

¹¹Tö-akaha ön tölōn re ngòh tökôlò tarik, ngòh tö-akaha el mat pöri yāich tarik kôtikūö min tö ò.

¹²Yĕn mihôiṅ ngòh tölöök, yöng ineū-eu ò ap umuh; yĕn choholre pöri ngòh tötlöök, hayunngöre ngaich tarik.

¹³Anga-aṅ ngòh mahayunngö tanôichngenre öt kôlòṙen min, anga-aṅ pöri ngòh mahalööknyôre ṙāngö u inrē teūngen min tö miṙēlōn.

¹⁴Tökôlò ön ngòh tarik ngòh tö-örheūheu nö pa-ekūö töm Mā Tēv; ngòh mahangëḵngö ellōn re pöri fuk el kanihngen min.

¹⁵Sā töpōitô lāyön hēk për sumṙöp ngòh tötlöök mahayöng i kui yāich tarik.

¹⁶Ngòh mahayöng töhāṅten tö mikah elmat töt milēḵ nö mahakihten; anga-aṅ pöri ngòh tösumrīk tö tötlöök taneūngen marô-òten sakāmö min.

¹⁷Yē ap tarik tölangan tö mahām holre, hökngen ò nö tökatūöyaṙen söl kinpahare, un hĕng tak hamòlṙen ò.

¹⁸Anga-aṅ ngòh lamök i mikah ṙānyuvö min, ngòh töchōich pöri nö i talöököre fuk el anūlö min.

¹⁹Ngòh amul tumlat re pōyen nyā-aṅkūö min, anga-aṅ pöri ngòh famchū töt kanôluṙô pōyen yanācha min.

²⁰Pōyen inkôlò an min ngòh tökô-en tarik, anga-aṅ pöri ngòh tökurāten nö hòṅ kôlò öt hō min nö kiröönngöre nö öt sācha.

²¹Töchōich an ngam inmeuktö intölten; vaich pöri nö kô-òren ngòh tarik tökūö töhĕng mufôkö nyā-aṅkūö.

²²Ngòh tömilip tarik kurāten nö hòṅ kôlò, ngaich öt akahalōn töp neūkö min nö yih nö in ò.

²³Ngòh vamëkö tarik unôich min nö kôtökūö tö töpōyen neūkölōn möthë tö ngòh maharōi nö litāk re.

²⁴Ngòh mu-ulāingen yöng re kikōnyö hēk yöng re kikānö nö ngö ṙô, Öttanôichngen an angū-ö, nôlö tarik an anga-aṅ öp famëlhanga.

²⁵Harunnyö linā-alkūö ön ngòh töyal tarik, ngòh mahayönglenre pöri nö im Mā Tēv ṙūölöng kanôlò min.

²⁶Tökulō-ov an anga-aṅ ngòh mahayönglenre nö i ellōn re; ṙānyu pöri min lamök i mikah.

²⁷Ngòh kamë-eṅkūö yāich öt hāṅten min, ngòh mahanyatngö matre pöri pōyen taneūngen min tö rinūtngö vah.

²⁸Yĕn choholre ngam tötlöök, hayunngöre vē tarik, yē cha pöri nö kapah, ṙūöhölre ṙôken tölöök.