Read Car_Nicobarese INCHŌḴ-OṘÔ 29 Bible Online

INCHŌḴ-OṘÔ 29 - Car_Nicobarese bible

INCHŌḴ-OṘÔ 29

¹Anga-aṅ ngòh töṙöpen nö vëka, sön nö hakehngö likeun re höng lūk min nöng ohngö nö öt hanlinken.

²Yē ngòh tölöök nö hayöng ṙāmölōn yip tarik; yē ngam tötlöök pöri nö hayöng, aluhure yip tarik.

³Anga-aṅ ngòh töhāngenlōn tö mikah ṙāmölōn tī tö yöng re, anga-aṅ pöri ngòh mahanôl kikānö mī-inyihköre mëichngö inlānen.

⁴Köpötī ön ngòh rācha tö panam lökten i kinṙôka töt michūṙen, payāyi tī pöri tö e öp mahateung raneushö.

⁵Hanyāknyö inhāṅl öp tarik öp maharōi holre nö i röön ò.

⁶Tingöpöre ön ngòh tötlöök tarik nö i tanôichngenre, ṙāmölōn pöri ngòh tölöök tarik nö tikökṙôre.

⁷Akahalōn ön ngòh tölöök tarik tö mikahlōn yāich; öt akah tö ngatī mikah pöri ngòh tötlöök tarik.

⁸Föngtökūö elpanam yin vē tömināich, hapungngöre pöri tö-akaha tarik tö lanīnö.

⁹Yē ngòh tö-akaha tarik nö lā-al ṙô tökulō-ovö, ngaich ngam tökulō-ovö nöng tainy hayīölkūö inrē, öt chanëvuvö ngaich umuh.

¹⁰Surīkhö töfaluṙen yin vē tarik töyal tö mahām, chöh nômö ò inrē ngam tötlöök.

¹¹Kētö talöökö tanānyö an ngam tökulō-ov, ngam tö-akaha pöri tarik haṙēmngenre nö ma-īnö e.

¹²Yē öp mahayöng nö hang minyôiny-aṅ, ṙòkhöre min yip mā in ò nö ötlöök.

¹³Meukkūö höö nan töm yāich tarik töm mahakihten inrē; kētö hanātö mat cha nyöre ngam Mā Tēv.

¹⁴Yē ngam rācha nö ṙōngö tī nö kahòkken yāich örheūheu min ngam kantēra ò nö köp.

¹⁵Kētö mikah an ngam chinökṙen vinëkö inrē, ngòh nyīö pöri töng kanahngenre nö hökiṙen kētö sumrōngkūö nö i yöng re kikānö.

¹⁶Yē tötlöök nö hayöng, ṙūöhölre ṙôken tanôichngen; meūkkö fanukngö cha pöri min tölöök.

¹⁷Vīten öp kūön re man nö haköp chöngö, ngaich me-eṅ min heūheure tö tī ò; kētö kumchiklōn meh min anga-aṅ.

¹⁸Yĕn rö-övö vinë-eny mu-unôich ngaich yip tarik nö kavalngö ṙināpöre, tökôlò pöri anga-aṅ öp mahaköp chöngö.

¹⁹Ötköp an tö chöngö ngòh tarik mahalanṙen tökūö töng ṙô, pòn pòrô nö akaha elmat, öthōḵ anga-aṅ nö chumkūöṙen.

²⁰Meuk tarik öm ṙung tökurat nö i ṙô re? Mötlö ap mineūka ti tökulō-ov töp in ò.

²¹Anga-aṅ ngòh tö löktökūö nyinī-öṅ tī nö harun tarik alahare, ip manā-aṅ min nö kôtökūö tö ò nö tö-amīnu nö in ò.

²²Ngòh tölīn tarik harunlö linā-alkūö, ane inrē ngòh tarik tötany pōyen tī tö töchōich.

²³Tumṙeūtu, ön min ngòh tarik tö inkeūlen re, anga-aṅ pöri ngòh töyāichö ellōn teūngen min tö ineū-eu.

²⁴Surīkhö nômö re ön ngòh mahanôl mu-ulāya, hang rinūtngö vah an, öt hameuktö e pöri.

²⁵Ṙātö tinngöp an ngam pinhë-eṅkūö tö tarik, anga-aṅ pöri ngòh mahayönglenre nö im Mā Tēv öt pinlāḵnguṙen.

²⁶Pōyen yip chamöh neukhöre nö i mahayöng, im Mā Tēv pöri ngòh tarik nö teūngen tö kinṙôka töt michūḵṙen.

²⁷Sin-òkkūö tölöök ön ngòh tarik tötchiplö, anga-aṅ pöri ngòh töchiplö tölöökö sin-òkūö tötlöök.