Read Car_Nicobarese INCHŌḴ-OṘÔ 3 Bible Online

INCHŌḴ-OṘÔ 3 - Car_Nicobarese bible

INCHŌḴ-OṘÔ 3

¹Kūön chu, um vaichngö tö inköptöre tö chu, hökngen ngam ellōn meh pöri nö haköp në chöngö chu;

²Pò rôta sakāmö samyeūheu nômö inrē pōyen inrē lanööken tī u min nö in meh.

³Uh man ṙā-ayö tö hinang chöngö kanô-en inrē; kapòklö u i likeun meh, kūichö u i mat tömitāk ihong ellōn meh.

⁴Hòṅ meh min kôtökūö tö neūkölōn tölöök ineūkö inrē i kūö ngam Tēv tarik inrē.

⁵Keuheūttö ellōn re hayönglenre im Mā Tēv, um hayönglenre inrē i ellōn re.

⁶Akahan i nup tökeuheūttöre talöökö meh, ngaich anga-aṅ min nö hachip kanröönö meh.

⁷Um höng akaha tö elmat re; pahë-ekūö töm Mā Tēv, hapungngöre inrē ṙā-ang i tötlöök.

⁸Lööken tī an min angū-ö tö ngam alaha meh tinfömlö nup tangëḵ meh inrē.

⁹Milēḵṙen tö ngam Mā Tēv tö nup inlānen meh holtö ranehlö ṙòng nup halinten meh inrē;

¹⁰Ngaich tööḵlö min nup sök meh tö töpōyen, lakukköṅny kūö inrē nup pīp meh tö vāin.

¹¹Kūön chu, um öt kūötenre tö talöökö la-en ngam Mā Tēv hēk um cheingö tö vinëköre tö ò,

¹²Tön vëkö hanāngenlōnre an ngam Mā Tēv, sā inyöngö tökūön re öp chūök kumchiklōn ò.

¹³Töṙāmölōn ön ngòh tarik tökôtökūö tö mikah, ngòh tarik inrē kamëḵ mikah elmat,

¹⁴Pò ngam taneūngen in e nö mötlö tö taneūngen i rupīö ngam kanôlò in e inrē mötlö tö humlum.

¹⁵Pōi ṙāi an tö yanöṅtö, ötkô nup lōn meh inrē nö hanṙongten nö in e.

¹⁶Lahāmö ò ap nômö tömarôta; latavē ò nup kanôlò ineū-eu inrē.

¹⁷Kumchikṙen nup talöökö ò, ṙòkhöre nup kanröönö ò inrē nö lanāmö.

¹⁸Chōn nômö an nö in cha yip kumṙapngö tīre nö in ò; yip tököpti tö ò kaheūkö nö töṙāmölōn.

¹⁹Lökten i mikah ngam Mā Tēv nö vītö ngam tumlat; lökten i mikah elmat anga-aṅ nö haköpngö minë halīöngö;

²⁰Lökten i mikah ò ngam mai nö töhhaka, minë taṙul inrē nö kitaktö tacham.

²¹Kūön chu, haköp tökô-en mikah inkaha inrē; un hökiṙen anū-ö nö kē-ĕngre tö mat meh.

²²Ngaich anū-ö min nö nômö nö ip lōn meh yanöṅtö inrē nö i likeun meh.

²³Köp min me-eṅ ngaich lök el talöököre öt kavē-ĕre röön min inrē.

²⁴Yē meh ūichngöre, öt pa-ekūö min me-eṅ yē meh ṙōlhaka, kuchik min öp inṙôhö meh.

²⁵Um pa-ekūö tötöng vuphë ranötngö rāi, hēk yēn yih öp öt-inkôlò ngam tötlöök;

²⁶Tön ngam Mā Tēv an min inyönglen meh lakngö kalröön meh inrē nö ötkô-òngvah.

²⁷Um haköp tölöök in cha yip tö hòṅ lööṙu tö e, yē e nö kanô-òṅ meh la-evṙen tö e.

²⁸Um ngö ṙô töp holre, Kuṙòh, hēk pömchö yih, huṙöich chin kētö ë yē meh höng īnu tö e.

²⁹Uh man halēnlö tötlöök öm lāḵlö öp holre öp töng holtöṙah meh mahayönglenre.

³⁰Un öt chööḵnyu lā-alkūö tarik, yē ò nö öt chökhuṙen tö meh.

³¹Un kunyaha elmat töp tarik töchökhuṙen uh inrē atöllö nup aṅ i talöökö ò;

³²Tön sin-òkkūö ngam Mā Tēv an ngam tötlöök tarik, nyanatlö ò pöri ngam töchiplö.

³³I patī tötlöök an ngam rinūtngövah tö ngam Mā Tēv hakôlò chūök ngam tölöök pöri anga-aṅ.

³⁴Miyëḵṙen an nö i tömiyëḵṙen, hameuktö neūkölōn pöri nö i yāich.

³⁵Amintö ineū-eunv an min ngòh tö-akaha, teūngen pöri tökulō-ov tö minṙēngö.