Read Car_Nicobarese INCHŌḴ-OṘÔ 30 Bible Online

INCHŌḴ-OṘÔ 30 - Car_Nicobarese bible

INCHŌḴ-OṘÔ 30

¹Në ṙô Akur kikōnyö kūön Yakeh aṅ Masā. Ngö ṙô ök tarik nö in Itī-ĕl, in Itō-ĕl Yūkal inrē:

²Kô-òngrit chin chū-ö töyahngö kulō-ov öich tarik. Öt aṅhaṅv-in chin tö mikah elmat tarik.

³Hö-ö chin haköp mikah, öt rēhĕn akahakūö tö ngam Töhet Töhĕng.

⁴Chiāp tö ngaich nö yônlö nö el halīöngö ngaich yôntī? Achiāp mahamūl ngam kuföt nö eltī re achiāp mahaṙung minë mak nö el hilā? Achiāp mahaköpngö në manā-angkūö ngam tumlat? Achiāp minë-eny ò, achiāp inrē minë-eny ap kūön ò? Akahakūö man me-eṅ!

⁵Hameuktu nup nö kô-en ṙô ngam Tēv; lanaklö cha an yip mahanyathötre nö in ò,

⁶Un ṙūöhtu hol nup ṙô ò, hòṅ meh öt vëka tö ò, kôtī inrē öm töminyôiny-aṅ.

⁷Nët nup havëkö chu in meh; uh öich öt teūngen tö u urēhĕkūö chu kapah:

⁸Marôvat tī ṙūöngö minyôiny-aṅ tö minyôiny inrē; uh chin rēhĕn kētu yanāchö un rēhĕn kanôlò; ha-aṅlen chu tö nyā-aṅkūö öp töng kanô-òngkūö chu,

⁹Hòṅ chu öt tööḵngen, ngaich mahngen meh öich ngö ṙô, Achīö ang ngam Mā Tēv? Hēk hòṅ chu öich öt kôlò, ngaich ulāya, hachōichngö minë-eny ngam Tēv re inrē.

¹⁰Un vë-eng nang mahalanṙen, in öp yöngṙen ò, hòṅ ò nö öt rūtngövah meh, ngaich me-eṅ töfāluṙen.

¹¹Ramūtngö vah yöng re yip umuh tö kikōnyö hakôlò yöng re inrē tö kikānö.

¹²Töhet yip umuh nö i matre hö-ö pöri nö ahetlö mum re.

¹³Umuh yip — yöng rô-òl chūök mat cha, yöng rô-òl chūök nup maneuichngö mat cha nö hachônglöng.

¹⁴Umuh yip tösā sanët kanap, yip tökanāpu tö sakū, ngameūṅktö yāich ṙā-ang i kūö ngih tumlat, yip töhāṅten in vē tarik.

¹⁵Nët maneuk kūön ön ngòh minyôkö tö kan; Kē-ĕtī, Kē-ĕti, ṙô u nö hū-a. Lūöi nup töt hētu nö tööḵngen; fën töt hētu nö ngö ṙô, Ṙā-alre chin ngaich:

¹⁶Ngam Chūök Kupah, ngam töt mikūönlö chūök kanūönö, örheūheu ngam tumlat nö haṙëhe nômö tö mak, öt hētu inrē ngam tameūyö nö ngö ṙô, Ṙā-alre chin ngaich.

¹⁷Ngih mat mahayëḵngen yöngre tö kikōnyö mumnônngö chöngö yöngre tö kikānö inrē sôki min tö nup kavöö nö el achāṙö kā-a inrē tö nup matēṙö.

¹⁸Lūöi nup töyahlö pinngangkūö nö in chu; fën öt mikah elmat chu:

¹⁹Talöökö ngam matēṙö nö el taṙul, talöökö ngam pēch nö i kui ihong, talöökö ngam chōng nö el ngam tökiröng mai, talöökö tarik inrē nö i rēlö.

²⁰Ngih ön talöökö ngòh kikānö tö asĕhka: nyā an, chūt kūöre inrē, ngaich ngö ṙô, Hö-ö chin chanôichuṙen.

²¹Kayīna ngih tumlat el katòh nup tölūöi; ötkô nö keun nup töfën:

²²Öp kaitī yē ò nö rācha, tökulō-ov inrē yē ò nö tööḵngen tö nyā-aṅkūö;

²³Öp kikānö töt hanāngen yē ò nö teūngen tö pihöre, öp rēlö inrē yē ò nö i chūök öp yöngṙen re kikānö.

²⁴Lūöi nup ing panam tökūöṅnö, töyahlö mikah pöri anū-ö:

²⁵Në talkeūich töt kalēḵ nö tarik, sön pöri nö meukṙen nyā-aṅ kūöre tö el sikehngö;

²⁶Në kitēvö tötkalēḵ nö tarik, sön anū-ö nö vī patī re nö i kaha ihong;

²⁷Öt rāchavö në hāyö, sön anū-ö nö ṙāköröön nö kiröönngöre;

²⁸Kô-òren me-eṅ kēḵ michākö eltīre, sön anū-ö nö el patī rācha.

²⁹Lūöi nup, nup tö mā-aṅ kinröönngö; fën tömā-aṅ kinröönngö:

³⁰Ngam lāyön, tökalēḵ kūö töṙeūla töt hameūheulre nö i kūö töng sitih;

³¹Ngòh tamyeūlö hayöm, tö ngam kōiny pököre, tö yip rācha inrē kumröönngöre urēhĕkūö yip tarikre.

³²Yē meh sin tökulō-ov, öm hapōilöre, hēk yē meh sin vamīken, tötlöök, tilupngökūöre man tö eltīre.

³³Yē meh kicheūchnyö aṅteh ngaich tööi angū-ö, kōk ngam elmeh ngaich mahāmu angū-ö, yē meh vīlö tanānyö, kihngen min me-eṅ.