Read Car_Nicobarese INCHŌḴ-OṘÔ 4 Bible Online

INCHŌḴ-OṘÔ 4 - Car_Nicobarese bible

INCHŌḴ-OṘÔ 4

¹Ō yī-ö nyīö, hang inköptöre tö yöng re, kūötenre inrē, hòṅ meh teūngen tö mikah elmat;

²Tön kē-ĕkūö meh chin tö tölöök chöngö: un ṙā-ayö ngam inköphöti aṅ in chu.

³Hē chu misī nyīö ik yöng chu kikōnyö, ayal, hĕng tak i kūö ök yöng chu kikānö,

⁴Hököpten chu anga-aṅ ngö ṙô inrē tö chu, Köp an yēḵ ngam ellōn meh tö në ṙô chu; haköp në chöngö chu, ngaich ngöh aṅ;

⁵Un vaichngö, un hapungngöre inrē tö në ṙô elvāng chu.

⁶Kē mikah; kē mikah elmat, uh an nö ṙā-ayö, ngaich köpti min anga-aṅ tö meh; hāngenlōn tö ò ngaich anga-aṅ min nö aṅten meh.

⁷Ngih ön ranehlö mikah: Hē ngam mikah öp töng yòh kahë meh, kē mikah elmat,

⁸Kiröngölōn tö ò, ngaich hapōilen meh min anga-aṅ eū-eu meh an min yē meh fūölan.

⁹Tumchöklö kui meh an min tö tövai tachöklö; kē-ĕkūö meh an min tö sapīöv tölöök.

¹⁰Kūön chu, hangihtöre hō-oṙô chu inrē, hòṅ nup samyeūheu nômö meh nö pōyen.

¹¹Haköpten meh chin min ngaich el talöökö mikah; kanröönö töchiplö.

¹²Öt sānngö vanāngö man min yē meh kiröönngöre; öt kavē-ĕre man min inrē, yē meh fal.

¹³Köptī tö inköphöti, un hökiṙen nö kiröönngöre; aṅten ò tön nômö meh an.

¹⁴Un yôkhöt el kanröönö tötlöök, un lök el talöökö tarik tötlöök inrē.

¹⁵Haköölngö e; un lök ël e; hapungtöre tö e ngaich kiröönhökūöre.

¹⁶Tön rö-ö yip nö kô nö haṙòh yĕn öl nö chōichö la-en; chatngen inṙôhò yip yĕn öl nö fukngö tī tö töhĕng tak.

¹⁷Pò cha nö nyā nyā-aṅkūö öt lanöökö òk vāin chanökhuṙen inrē.

¹⁸Öp kanröönö tölöök pöri sā minlīlö peuheū, öp töyanglöre yanāngö inrē söl ip sakāmö.

¹⁹Sā tökufëi sinngūlö ngam talöökö tötlöök; öt akahakūö cha-a tö kinvēngö röönre.

²⁰Kūön chu, kūötenre tö në ṙô chu; asītö el nang re tö ṙô chu ṙô-òv.

²¹Hökngen u nö un kē-ĕngre nö i kūö meh; haköpngö u lā ellōn meh.

²²Tön nômö ò nun öp tökôtökūö tö u, lanööken nup alaha ò inrē.

²³Haköp ellōnre i hinöngöre; tön löknyö in e ap nö hëmnyi mak nômö,

²⁴Ṙāngö tökuròk ṙô in meh, ṙāngö töchavīṙa ṙô inrē nö marôvat tö meh.

²⁵Hökngen minë mat meh nö ngëichkö lā-urĕh, hachip kūö matre inrē me-eṅ ngëicha.

²⁶Haṙēmngenre tö kanröönö röön meh, ngaich köp min nup talöökö meh.

²⁷Um katöngaṙen tö lahāmö hēk latavē; kānngö röönre ṙā-ang im tötlöök.