Read Car_Nicobarese INCHŌḴ-OṘÔ 6 Bible Online

INCHŌḴ-OṘÔ 6 - Car_Nicobarese bible

INCHŌḴ-OṘÔ 6

¹Kūön chu, yē meh ṙënngö ṙô öp holre, öm kilēḵngôre ṙënngô aṅ tahëng;

²Yē meh tingöpö tökūö ngam ṙô re, ngaich kô-òngvah iṙô ngam elvāng meh;

³Kūön chu, hayöölen re me-eṅ la-evṙen tö ngih, tön ngaich man el minhôiṅyö ngam holre: kuṙòh, ka-eūyen, mileūchen havë-a ip holre.

⁴Un haṙòh ngam mat meh um paleūmköti mat hòṅ haṙòhlö inrē;

⁵Hayöökenre mana sā kasēl ip mahacheūḵ, sā chehechōn nö ṙā-ang eltī öp tumngöp.

⁶Aō töṙahata, kuṙòh chuh i talkeuch; ngëichkö talöökö ò, ngaich akaha pömchö.

⁷Öt mā-avkūö ana, öt yöngṙenvö, hēk öt mahayöngu,

⁸Hamūl nyā-aṅkūö re an tö el sikehngö, hē el kanöinyòng inrē nö hamūl anahare.

⁹I rô-òten öm min hulalhaka umuh, Aō töṙahata? Ĕhē öm choholre ṙā-ang im inṙôhò?

¹⁰Rahëich tamat haṙòh, rahëichtaṙen pinleūmö mat, rahëichtaṙen heūheure kirup këlre,

¹¹Ngaich ngam yanāchö min nö yih nö in meh sā öp famalngöre, öp neūkö inrē sā tarik tö aṅhavtī kumyung.

¹²Ngòh töt kanôlu ṙô tarik, ngòh tötlöök tarik, havötköre kumtö tökuròk ṙô,

¹³Nyichkö matre, kufiöröönre, sōka tö kuntīre,

¹⁴Holtö töchōich ellōn re nö vīlö tötlöök, iṙūöhen nö teūchtö inrēvö;

¹⁵Lökten nöng vuphë yanīhi ötkanôlò nö i kui ò; laköli ngaich anga-aṅ nöng öt rô-òtuṙen öt lanë-enṙen ngaich.

¹⁶Tafūöl nup surīkhö ngam Mā Tēv, sat nup sin-òṅkkūö Ò:

¹⁷Tunlēchngö mat, litāk töminyôny, kël inrē kumtaknyö mahām töt akahaṙa,

¹⁸Ellōn mahalēnlö tötlöök, kalröön tökuraten nö fal i tötlöök,

¹⁹Ngòh samūichkö holre mu-uhômnyö minyôny-aṅ, tarik inrē tameūichtö inrēvö nö i holre.

²⁰Kūön chu, haköp chöngö ngam yöngre, un ṙā-ayö inköpö tö meh töm yöng meh kikānö.

²¹Kapòkngö u ellōn meh örheūheu; nyëkngö u inrē i likeun meh.

²²Yē meh kiröönngöre, hachōkūö meh anū-ö min; yē meh hulalhaka, aṅten meh anū-ö min; yē meh inrē aṅhen, vë-ekūö meh min anū-ö.

²³Pò ngam chöngö nö ëāṅvö hanātö inrē öp inköphöti, inmeuktö hinang chöngö an ngam talöökö nômö meh,

²⁴Nö mahaköpö meh i tötlöök kikānö, i tö faṙëcha litāk öp kamlah kanihngen.

²⁵Um lōntö vanāyö ò ellōn re, um hökngenre kô-òngvah tö tī ò nö mileūch mat re;

²⁶Pò ngòh mi-iyihköre kikānö nö kô-òren nöng ṙātö töhĕng rôti, ngòh ma-asēha pöri kikānö hayun nômö tarik.

²⁷Kô-òren ang ngòh tarik nö elngòhre kum tö tameūyö nö öt ökngötī tö inyutre?

²⁸Hēk hĕng tak hòng tö kô nö lökkūö töṙāch ta-ök tameūyö nö öt tafööṙö elröön?

²⁹Ngatī ön ngòh chamuh i pīhö holre; öt hĕng tak lamūölken ò min tötfaluṙen.

³⁰Röh aich vē tarik nö miyëḵ tö mu-ulāya yĕn ulāya nö hatööḵngen re yĕn aheuk?

³¹Ngaich yē ò nö kôti, sātö ṙënngen tī min anga-aṅ; keuheūttö nup chehen re min anga-aṅ el patī re.

³²Töt akaha ön ngòh ma-asēha; famëlngöre ön anga-aṅ tö ngatī la-en,

³³Teūngen an tö vah minṙēngö inrē, öt sīchiyö min öp minṙēngö ò.

³⁴Vīlö tanānyö tarik an ngam kumnyahṙen, ngaich öt ṙā-al re min anga-aṅ yĕn havahalre.

³⁵Öthō min anga-aṅ tö ṙënngen fālen, ötrēhĕn nö hanlāmen pòrô öm pōyen tī tö raneushö.