Read Car_Nicobarese INCHŌḴ-OṘÔ 8 Bible Online

INCHŌḴ-OṘÔ 8 - Car_Nicobarese bible

INCHŌḴ-OṘÔ 8

¹Öt havë-a öng ngam mikah, öt hūnyôre öng ngam mikah elmat?

²I kui rung i taseū talöökö, el kanröönö anga-aṅ nö sökhaka;

³I nup inkūp lā kūö öp el inkūp anga-aṅ nö pōitô nö hū-a

⁴Ō tarik havëken meh chin lamöö i kūön tarik an ngam ṙô chu.

⁵Ō töt akahaṙa, haköp mikah; Ō tökulō-ovö tarik, hangihtöre.

⁶Hang, tön ṙô tö tölöök chin min, löknyö i në minuh chu min inrē nö yih öp töchip,

⁷Pòn ṙô tö kanô-en min ngih elvāng chu; sin-òṅkkūö në minuh chu an ngam öt lanöökö.

⁸Ṙòkhöre nup ṙô elvāng chu nö tölöök; öt hĕng in u tö löinyi hēk tökumrôki.

⁹Ṙòkhöre nun nö chip nö in ò ngòh tö akah elmat tö huveū inrē nö in cha yip chamöh mikah.

¹⁰Kēḵ ngam inköphöti aṅ in chu ṙënngen rupīö, mikah inrē nö mötlö tö tölöök humlum;

¹¹Pò ngam mikah nö mötlö tö yanöṅtö, ötkô nö hanṙongten nö in e inrē nup taṙòkhöre lōn meh.

¹²I yöng i mikah chin chū-ö mikah kôtökūö chin inrē tö inkaha mikah elmat.

¹³Sunrīkhö tötlöök an ngam pinhë-eṅkūö tö ngam Mā Tēv. Inkeūlen kanësen inrē talöökö tölöök tö hachōchi ṙô inrē surīkhö chu.

¹⁴Inu chin tö inlēnö tölöök mikah inrē, lā tuhēt elmat, öich kumlē-ĕv.

¹⁵Lökten in chu rācha nö hayöng, yip mahayöng inrē nö kētö tölöök chöngö;

¹⁶Lökten in chu kūön rācha nö hayöng, mā inrē nö hayöng ngih tumlat.

¹⁷Hāngen chin tö cha yip tö hāngen tö chu, cha-a inrē yip tö pētngen nö chöh kôtökūö tö chu.

¹⁸In chu kanôlò ineū-eu inrē, töt chanūhuvṙen kanôlò lanööken inrē.

¹⁹Mötlö ön ngih ṙòng chu tö humlum, pòrô nö vai humlum në samīöplö in chu inrē mötlö tö tölöök rupīö.

²⁰Lök el talöökö lanöökö chin, el kanröönö tötmichūöṙen kinṙôka,

²¹Kētö kanôlò in cha yip töhāngenlōn tö chu, hatööḵlö chūök chehen cha inrē.

²²Vīlen chu an ngam Mā Tēv ik raneh tī Ò nö vī, raneh nö tī Ò misī.

²³Sökhakṙen chū-ö ngaich samyeūheuvö, urĕh, tö ranehlö ngih tumlat.

²⁴Hē mai nö öluvö ngaich chū-ö fötnyu, hē tö pöklö mak nö öluvö nö pōyen aṅ tö mak.

²⁵Urēhĕkūö minë rôngö nö vī-i, urĕh tö minë rung, öich fötnyuvö;

²⁶Urēhĕkūö tī Ò nö vī tumlat tö minë el kahôyö inrē, hēk ök raneh pitung ngam panam.

²⁷Hē ò nö haköpngö minë halīöngö, umuh chū-ö, hē ò nö kūich tö chuvī nö i kui ngam mai,

²⁸Hē Ò nö ngë-eṅtī nö ngaich nö vī minë taṙūl lā tulöng, hē Ò nö haköpngö löklö ngam mai,

²⁹Hē Ò nö halēnngö tölngökūö ngam mai, pòn sōtu ngam mak nö tôchngen tö chöngö ò, hē Ò nö mikahngö chūök rööntö ngam tumlat,

³⁰Ngaich in ò chū-ö, sā tarik yöngkūö töhuveū-en i la-en; kaheuk sakāmö chū-ö inrē kumchiklōn ò, ṙamölōn i kūö Ò örheūheu,

³¹Ṙamölōn ing tö aṅhavkūö panam ò, kumchikngenre inrē in vē kūön tarik.

³²Kikōnyö kūön chu, hangihtô chu töngamuh: ṙamölōn yip cha-a tö köp tö talöökö chu.

³³Hang inköphöti ngaich akaha, un öt mikūöṙen inrē tö e.

³⁴Ṙamölōn ön ngòh tarik hamang ṙô chu, öt hĕng hang sumkam nö hönga nö i kūö inkūp chu, höka nö i kūö inkūp.

³⁵Pò ngòh tökôtökūö tö chu kôtökūö tö nômö teūngen inrē tö neūkölōn aṅ im Mā Tēv;

³⁶Anga-aṅ pöri öp chamööḵngen chu chökhutī töre; ṙòkhöre yip tösumrīk tö chu tö hāngenlōn tö kinpaha.