Read Car_Nicobarese Mumkahten 10 Bible Online

Mumkahten 10 - Car_Nicobarese bible

Mumkahten 10

¹Nup tökapah inṙūöi vīten ngam tötahūsa incham alaha nö hangeūṅtu tinôngö; ngatī tö rahëchyen kumlō-ov nö langan tö mikah ineū-euṅ inrē.

²Öp ellōn tö-akaha tarik harônten ò nö lā hāmö, öp ellōn tökulō-ovö pöri kū-ö tö lā tavē.

³Pòrô ngam tö kulō-ovö nö lök el talöökö, hāṅten anga-aṅ tö mikahngen, ngaich höng tökulō-ovö ṙô anga-aṅ tö taṙòkhöre.

⁴Yē öp tanānyö öp mahayöng nö sīöplöre nö lā in meh, um ṙāngö ngam chūök re, pò ngam inrīkngöre min nö halööktit nup tökiröng fālen.

⁵Tötlöök ap umuh maheuṅk chu el katòh ngam tavūöi, nö sā tövaich ṙamā-ang i mahayöng:

⁶Ha-ūichlöng tökulō-ovö el nup töpōyen lātulöng chūökö, ngaich ngam tökôlò nö ūichhaka nö el chūökö lā taṙeū.

⁷Meuk tö hakövö chin nö i uk kōra, kūön rācha inrē nöng kiröön sā töhakövö.

⁸Anga-aṅ ngòh amul anūlö fuk ël e min; kāpö ò an min ngam pēch öp tumṙölhötre nö ikaha kinlōngö.

⁹Anga-aṅ öp amul ihong chök min tökūö u; anga-aṅ inrē öp famung chōn palā-aiṙen tökūö u.

¹⁰Yē ngam vët nö öt keut, ngaich öt hĕng tak mahakeutnyö kūö ò, ngaich ṙūölö kumlēḵ re anga-aṅ; ngam mikah pöri holṙen öp töhĕng tak nö teunglen.

¹¹Yē öp pēch nö kap urēhĕkūö ò nö pumlāmö, öt kanôluṙô ngam pinlāmö ò.

¹²Teūngen nup ṙô ò elvāng öp tö-akaha tarik tö hanāngen tö ò, mikten ò pöri nup minuh tökulō-ovö.

¹³Kumlō-ov nup raneh ṙô ngam elvāng, öt lanöökö kintūöyen öp manā-angrit ṙô ò.

¹⁴Ṙūölö ṙôken ṙô ön ngòh tökulō-ovö, pòrô nö öt tarīkuvö tö-akahalōn tö e min, achīö ap inrē tökô nö vë-eny nang ò töp mu-unôich tö ò min?

¹⁵Chëingö an ngam tökulō-ovö tö kūö la-en re, lökten ò nö öt akahakūö tö talöökö nö chuh el panam.

¹⁶Öt kanôlò in meh, Ō panam, yē öp rācha meh nöng nyīö, yip kūön rācha meh inrē nö nyā tökiröng nyā-aṅ tö peuheū!

¹⁷Ṙāmölōn man, Ō panam, yē öp rācha meh nö kūön tö hakövö tarik, yē yip kūön rācha meh inrē nö nyā tökiröng nyā-aṅkūö ip tölöök ṙētak, yip tö kô nö lāköre, rö-ö nö hinyōingö!

¹⁸Chahömköti an ngam uk patī kūö ṙanāhata, kūö ṙanāhata inrē ngam patī nö aṙōḵ.

¹⁹Nyā-aṅ mahayīölkūö an ngam rôtī nö vī-i, mahaṙamṙô tökeuheūttöre inrē ngam rupīö.

²⁰Pòrô nö ellōn meh, um ötlēḵkôre tö rācha, un rēhĕn el chamam re ötlēḵkôre tö tökôlò; tön söömi ap min ṙô meh tö chehechōn el kuföt, hēk vë-eny e nup yô-òv tö sanëôku.