Read Car_Nicobarese Mumkahten 12 Bible Online

Mumkahten 12 - Car_Nicobarese bible

Mumkahten 12

¹Köplōn inrē më-eṅ tö ngam vamīlen meh i nup sakāmö meh ayal, urĕh tö nup tötlöök sakāmö nö yih, ṙūötöre inrē nup samyeūheu, hē meh min ngö ṙô, Ötkumchīkuṙen chin in u;

²Urĕh töm tavūöi, hanātö, chingëṅt, minë taneūsömat inrē nö sangūli tö minë taṙul inrē nö havanngöre unôichrit ngam kumṙah;

³Ip sakāmö hē yip yōm ngam patī nö kichëyöre sangôni inrē yip tökalēḵ tarik, ṙā-angtīre inrē tumlön pòn öt ṙōl taka, ngaich cha-a yip mamôknyö kūö re nö löknyö kūö inkūp nö paṙūöyamat,

⁴Löphakkūö nup inkūp el talöökö; hē öp ṙën ṙô tī tumlön nö öt kalē-ĕ ṙô, i ṙô töhĕng nòng chehechōn hūnyôre öp hĕng tak, ṙòkhöre inrē yip tumkökṙôre kūön kikānö nö cheukti ṙô;

⁵Pa-ekūö cha-a inrē tö öp lā tulöng, el talöökö inrē pinhë-eṅkūö; pöpnyöre ṙòng tapōngòng chōn fiṙëchröönre ngam hāyö nö kiröönngöre öt teūngen inrē tö lōn re; pò ngam tarik nö chuh im patī re tö örheūheu, ngaich yip töhaṙivlōn nö lök el talöökö nö kiröönngöre;

⁶Urēhĕkūö lintôkngö ngam rupīö tökuvāha, hēk linkukngö ngam töchilū pingāṅl humlum, hēk ngam chūök mak nö likūki nö ip löklö mak hēk öp tuyāru inrē nö laköli nö i kui mak,

⁷Havantöre ngam pitung nö el tumlat nö sā re misī, havantöre inrē ngam ma-alaha nö im Tēv ngam kamëtö e.

⁸Chanök alaha aṅ i chanök alaha ṙô ngam Mumkanten; ṙòkhöre nöng chanök alaha.

⁹Hol ngam mikah, haköptö tarik inrē ngam Mumkahten tö inkaha, kinlaha kanô-en inköpö inrē inlēnö nup inchōḵo ṙô inrē nö holtö tökiröng ṙanëmen.

¹⁰Chöh nup ṙanāmölōn ṙô ngam Mumkahten, chīpötī inrē nö kūich nup ṙô tökô-en.

¹¹Sā tölòkngörekūö nup ṙô tö-akahaṙa, sā kīny inrē tö köpökūö nup töhamūlö ṙô tökētu ip yōm pököre tö hĕng tak.

¹²Kūön chu, ṙēmen ip tö vānglö tö në. Öt kinheūṅtuṙen vinī-iṅ līpöre töpōyen, chanëyö ngam alaha inrē töpōyen inköpö.

¹³Manā-aṅgrit ön ngih; keuheūtlöre nup nö ngaich nö hāngö. Pa-ekūö töm Tēv, haköp nup chöngö ò inrē; pò e nö angū-ö la-en tarik nö keuheūtlöre.

¹⁴Pò ngam Tēv min nö keuheūtlöre tī nö kētö nup la-en nö im kinṙôka, keuheūtlöre nup tö hayunka, pòrô tölöök hēk tötlöök.