Read Car_Nicobarese Mumkahten 2 Bible Online

Mumkahten 2 - Car_Nicobarese bible

Mumkahten 2

¹Ngö ṙô chū-ö tö re, Tā-a tö ngamuh, hòṅ chu vī kinlahten kumchiklōn; kumchikngen re man. Yĕh meuk pöri, chanök alaha an angū-ö inrē.

²Ngö ṙô chū-ö tö mahayīölkūö, Kintūöyen ana, tö kumchiklōn inrē, Asuh kanôlò öng?

³Kiluh ellōn re chū-ö tö inlahen inṙamlōn ngam alaha nö vāin ṙòngmö hachōkūö ngam ellōn chu nö hol tö mikah öp inlāhen kinëtö tīre inrē im kumlō-ov, hanöng sāha chu meuk öp tölöök in vē kūön tarik la-en el katòh ngam halīöngö irô-òten nup tötṙōl sakāmö cha nö aṅ.

⁴Kiröngö vahī chū-ö tö la-en; mānlö patī chin teūichtö el panô-òṅ vāin re inrē;

⁵Vī pannô-òṅ re chin panô-òṅ pūl inrē, ngaich teūichtö ël u tö chōn tö keuheūttöre mihëṅṙö ṙòng.

⁶Vī chūök mak chin inrē nö ṙanös nup chōn samīöplöre.

⁷Havah tö hakövö chin kikōnyö kikānö inrē, aṅhav-in inrē tö tö hakövö tö fötnyu nö i patī chu; pōyen chehen chū-ö inrē tö pököre nuā inrē, mötlö tö yik mū-urĕh tö chu i Yērusalem.

⁸Hamūllö rupīö re chū-ö inrē humlum inrē töpōi ṙāi chehen rācha inrē tö nup panam; īnu chū-ö tö tumkökṙô re, kikōnyö töl, kunchikngölōn tarik.

⁹Lökten chu kiröng tôichlö inrē tö yik mū-urĕh tö chu i Yērusalem; höngngöh inrē ngam mikah nö in chu.

¹⁰Nuk lōn në mat chu inrē öt lākiṙen anū-ö tö u; öt kētö ellōn re chū-ö i kumchiklōn, pò ngam ellōn chu nö kôtökūö tö kumchiklōn i nuk la-en chu, angū-ö an raneushö chu i nup la-en chu.

¹¹Ngëichkö nup la-en në kuntīre chū-ö nuk la-en chu inrē kinheūṅtngö ṙētak, ngaich yĕh meuk, ṙòkhöre nöng chanök alaha lā-al ngam kuföt inrē nö unôich, ngaich rö-ö nö taneunglenvö nö el katòh ngam tavūöi.

¹²Havöötö kūöre chū-ö ngaich ngëichkö mikah, kintūöyen kumlō-ov inrē; suh ṙöng öp kanô-òṅ ngam tarik la-en ò ngam yamih nö unôichrit ngam rācha? Höng nup tökeuheūten tö tī ò nö ngaich.

¹³Meuk ngam mikah chū-ö ngaich nö löök tö kumlō-ovö sā hanātö nö löök tö sinngūlö.

¹⁴Elkui re mat ön ngòh tökulō-ovö; ngaich sön chū-ö meuk tö cha nö ṙòkhöre nöng hēngö lökngövah.

¹⁵Ngaich ngö ṙô chū-ö töre, Öp lāinyngen ngòh tö kulō-ovö lāinyngen chu min angū-ö inrē; kūö yòh öich vö akaha? Ngaich ngö ṙô chū-ö tö re tö e angū-ö inrē nöng chanök alaha.

¹⁶I tö akaha tarik sā i tö kulō-ovö nö öt köp inköpkölōn, pòn i nup sakāmö yamih ṙòkhöre min nö marô-angen nö vāchiyö. Kapah ngam tö akaha tarik sā ngam tö kulō-ovö!

¹⁷Lökten chin surīkhö nômö, kūö öp tö keuheūten el katòh ngam tavūöi nöng kanihngen chu; pòn ṙòkhöre nöng chanök alaha lā-al ngam kuföt inrē nö unôich.

¹⁸Surīkhö nuk la-en re chin nuk tö keuheūten el katòh ngam tavūöi, pò chu höng ṙāten e in öp tarik mū-unôich tö chu min;

¹⁹Chiāp tö akahalōn yē öp tarik min nö tö akaha hēk tö kulō-ovö? Ngaich pöri min anga-aṅ nö yōmṙen nup la-en chu kēken ngam mikah chu inrē el katòh ngam tavūöi. Chanök alaha an angū-ö inrē.

²⁰Lökten chu havööngö kūö re ngaich kētö ellōn im ranö-anglōn i nup taṙòkhöre la-en chu elkatòh ngam tavūöi,

²¹Pòn hēkpi ngòh tarik ngòh tö lā-evṙen nö hol tö mikah, inkaha, huneū-en inrē nö ṙāngen u nö ip tarik öp töt la-evṙen tö e. Chanök alaha an angū-ö inrē tökiröng inrē nö tötlöök.

²²Asuh ap ing tarik aṅ i nup la-en ò nö mā-anyre i nup la-en ò el katòh ngam tavūöi?

²³Pò nuk sakāmö ò nö tööḵlö tö chanökö, kanihten inrē i nuk la-en ò; pòrô tö hatööm öt haneuhtu öp ellōn ò. Chanök alaha an angū-ö inrē.

²⁴Öttö ĕhtenvö nö umuh in ngam tarik tö ngam töng nyinā-aṅ inôkö inrē, kanôtökūö inrē tö kumchikṙen re i nuk la-en re. Meuk ngih chin inrē, nö ṙamā-ang eltī ngam Tēv,

²⁵Pòn yĕn öt aṅ in ò ngaich chīö tökô nö nyā-avkūö hēk chīö tökô nö kumchikngen re?

²⁶Pò ngam tarik mahaṙamlōn ò kētu mikah tö ngam Tēv, inkaha, ṙanāmölōn inrē; im tököölö fālen pöri kētö la-en ò anga-aṅ tö inmūlö infônghanga inrē, höng kē-ĕti nö in ò öp mahaṙamlōn ngam Tēv. Chanök alaha an angū-ö inrē kumlöön nö unôichrit ngam kuföt.