Read Car_Nicobarese Mumkahten 3 Bible Online

Mumkahten 3 - Car_Nicobarese bible

Mumkahten 3

¹Ṙētakvö an i tö keuheūttöre, kö ṙētakvö inrē el katòh ngam halīöngö!

²Ṙētakvö kayônyu, ṙētakvö inrē kapah; ṙētakvö teūich, ṙētakvö inrē teuklö ngam tö teūichtu;

³ṙētakvö kumpah, ṙētakvö halanken; ṙētakvö tiṙölhanga, ṙētakvö inrē mānhölö;

⁴Ṙētakvö peuiny, ṙētakvö inrē hayīölkūö; ṙētakvö haṙivlōn, ṙētakvö inrē kiṙīöm;

⁵Ṙētakvö kavalngö ihong, ṙētakvö inrē hamūl ihong, ṙētakvö fūöl, ṙētakvö inrē ṙā-angtīre fūöl;

⁶Ṙētakvö chöh, ṙētakvö inrē chatngentī; ṙētakvö halinhangen, ṙētakvö inrē kavalhanga;

⁷Ṙētakvö tikaichhanga, ṙētakvö inrē chōk; ṙētakvö öt ṙô-òvö, ṙētakvö inrē ṙô-òvö;

⁸Ṙētakvö hāngenlōn, ṙētakvö inrē surīkhanga; ṙētakvö kinyungö, ṙētakvö inrē lanāmö.

⁹Suh ap taneūngen ngòh tö lā-evṙen nö i nup lā-en ò?

¹⁰Meuk la-en chin kahë tö ngam Tēv nö in vē kūön tarik nö hōtu nö vīken u.

¹¹Vāyö tī anga-aṅ nö i tö keuheūttöre ik hē e; chaphöt tö örheūheu inrē anga-aṅ nö ellōn tarik, ngaich sönen anga-aṅ nö öt kôtökūö tö nuk tö ngaich tī ngam Tēv löktökūö ik raneh söl manā-aṅ.

¹²Akahalōn chū-ö tö tö rö-ö tö ĕhten nö in cha tö ngam töng ṙanāmölōn kumchikṙen cha inrē isaha cha nö aṅ;

¹³Tö e inrē nö inlōntö tarik nö aṅ im Tēv tö ò nöng nyamā-avkūö-òk inrē kumchikngenre inrē nö i nup la-en re.

¹⁴Akahalōn chin tö nup töng vahīṙen ngam Tēv nö tö örheūheu nö köp; ötkô nö örūheūheu nö köp; ötkô nö ṙūötuṙen, öt rēhĕn nö kanëngen aṅ in; ngatī vinī-i an tö ngam Tēv, hinôtö tarik nö pa-ekūö nö i kūö ò.

¹⁵Angū-ö, tö ha-ëhelen nö ngaich; öp tö mòkngöre, ngaich nö tö keuheūten; ngaich ngam Tēv nö chöh nuk tö ahōṙiyö.

¹⁶Hēk chū-ö inrē meuk el katòh ngam tavūöi tö e nö i chūök kinṙôka töt michūḵṙen, uroh nö in e ap öt lanöökö, i chūök lanöökö inrē, uroh nö in e ap öt lanöökö.

¹⁷Ellōn re ṙô chū-ö ngaich ngö ṙô, Akah fālen tölöök an min ngam Tēv tötlöök inrē, pò ò nö halēnngö ṙētak tökeuheūttöre, la-en inrē.

¹⁸Ngö ṙô chū-ö ngaich ellōn re tö inlahen vē kūön tarik tö ngam Tēv nö kalaha cha nö hameukhö mat cha tö cha nöng töṙeūla.

¹⁹Pò ngam chanūhu vē kūön tarik nö hĕngren tö chanūhu töṙeūla; sā ngam tö hĕng tak nö kapah, ngatī nö kapah ngam tahëng. Hĕngren unhômö cha-a nö ṙòkhöre, öt ĕhten ngam tarik tö në töṙeūla; pòn ṙòkhöre nöng chanök alaha.

²⁰Ṙòkhöre nö chuh im töhĕng chūök, ṙòkhöre nö ṙameū-eung el pitung, ṙòkhöre inrē nö hēk nö havanngöre nö pitung.

²¹Chiāp tö akahalōn yē öp ma-alaha ngam tarik nö lā tulöng kū-ö ane inrē öp ma-alaha töṙeūla nö chuh lā taṙeū el tumlat?

²²Ngaich chū-ö meuk tö tö rö-övö tö ĕhten nö umuh tö ngam tarik nöng i nup la-en re tölngö nö kumchikngen re, pòn angū-ö lumnööṙö ò; achiāp tökô nö kēten ò nö meuk öp mu-unôich min tö ò?