Read Car_Nicobarese Mumkahten 4 Bible Online

Mumkahten 4 - Car_Nicobarese bible

Mumkahten 4

¹Hēk chū-ö meuk nup inkihten tö harunkaṙen el katòh ngam tavūöi. Yĕh meuk, nup mak mat tö hakihtuṙen, ngaich cha-a nö öt hĕng tak mahaṙamkölōn! Lā in yip mahakihten cha ap kumlēḵ, ngaich öt hĕng tak umuh mahaṙamlōn cha.

²Ngaich chū-ö fēken tö kapah yik tö ha-ëhangen nö kapah nö ĕhten tö tö-aṅ yip tö ṙòngmö aṅ;

³Ĕhten pöri tö cha nyöre öp töt yamih, töt mameuk tötlöök la-en inrē nup tö kēkaṙen el katòh ngam tavūöi.

⁴Ngaich chū-ö meuk nup la-en nö ṙòkhöre nup la-en i kumnyah elmat tarik tö holre. Chanök alaha an inrē angū-ö kumlöön unôichrit ngam kuföt.

⁵Kirup këlre ngam tökulō-ovö, ngaich kāḵ alaha re.

⁶Ĕhten an ngam töhĕng më-el tī-i chanëven tö tö nët më-eltī-i la-en kumlöön unôichrit ngam kuföt.

⁷Hēk, meuk chanök alaha chū-ö el katòh ngam tavūöi:

⁸Hĕng taka öp tarik töt hĕng tak aṅ in, tö kikōnyö kūön hēk öt rēhĕn kikōnyö kūön hēk hanöng löknyö, sön pöri nö öt ṙanānguṙen nup la-en ò, nup mat ò inrē öt hētu nö tööḵngen tö kanôlò, lökten ò nö öt hētu nö hatön, chööḵnyen tö chīö öich lā-evṙen harööḵngenre inrē tö minyam? Angū-ö an inrē chanök alaha töt ṙanāmölōn lā-en.

⁹Ĕhten tö nët tak tö töhĕng tak, pò cha nö raneushuvö tö tölöök tökūö nup la-en cha.

¹⁰Pò cha yĕn fukngö, hĕngtak ngaich mahachohlö öp holre; tötkôlò pöri öp töng hĕng taka yē ò nö fukngö ngaich öt tahëngu mahachohlen ò.

¹¹Hēk, yĕn nët tak holtöṙah re nö ṙōlhak, ṙāich acha-a; sitih kanô-òṅ pöri öp tö hĕng töṙah nö ṙāich?

¹²Pôrò inrē öp tarik nö mihôiṅ nö lā-al töhĕng tak öp töng hĕng töṙah, nët tak min tökô tö ò. Öp tö lūöi sāḵ tökuvaha öp töt hēṙen nö latòk.

¹³Ĕhten ngam yanāchö ngam tö akaha inrē ṙāl tarik tö öp tököiny tökulō-ov rācha, öp tö sōḵ nö kēḵ finë-elre,

¹⁴Pòrô anga-aṅ nö ngaich nö ṙamā-ang el kinlōngö nö chuh el kantēra rācha hēk ip pūlngö ò nö tö fötnyu nö yāich.

¹⁵Meuk yip tö aṅ chin mahavötköre el katòh ngam tavūöi, nö sā öp ṙāl tarik, öp tö hòṅ sökhaka nö i chūökre;

¹⁶Öt latôkaṙen yip tarik; i kui cha anga-aṅ nö ṙòkhöre, söönen yip mu-unôich tö yīhi min, nö öt ṙāmölōn nö in ò. Kô-en angū-ö inrē nöng chanök alaha kumlöön inrē unôichrit kuföt.