Read Car_Nicobarese Mumkahten 5 Bible Online

Mumkahten 5 - Car_Nicobarese bible

Mumkahten 5

¹Lak vanāngö re man yē meh chuh el patī ngam Tēv; öm ṙūötöre hangihtöre ĕhten an angū-ö tö tökētuvö tö tö kulō-ovö; pò cha nö öt akahalōn tö cha nö lā-evṙen tö tötlöök.

²Um kurātö elvāng, unrēhĕn hökngen ngam ellōn re nö ka-eūyö ṙô nö ṙô-òv nö i kūö ngam Tēv, tön el halīöngö an ngam Tēv, el tumlat me-eṅ; lökten nup ṙô meh nö un pōyen.

³Pò heūvö nö yih nö kumröön tö töpōyen la-en, nup ṙô tö kulō-ovö inrē nö kumrööntö tö pōyen ṙô.

⁴Yē meh chūökuṙô kilēḵngôre im Tēv, um ahāṅkenre kētö e; tön öt kuchiklōn an nö i tö kulō-ovö. Kētö öp tö chūöku man töm kinlēḵngô meh.

⁵Ĕhten man öm öt chūökuṙô kilēḵngôre tö meh chūökuṙô kilēḵngôre ngaich öt kē-ĕti.

⁶Uh an ngam elvāng meh nö hachōten meh i tökööl, uh inrē öm ngö ṙô i kūö ma-ahānga tö e nö tö vaich; kūöyòh ṙöng ang min ngam Tēv nö līn nö i ṙô meh, ngaich piyāingö nup la-en kuntī meh?

⁷Pò yē heūvö nö ṙūhölre ṙôken, sīöplö nö pōyen nup töng ṙô: pa-ekūö pöri me-eṅ töm Tēv.

⁸Yē meh meuk yāich nö hakihtuṙen ip töhĕng panam kē-ĕyö inrē kinṙôka töt michūḵṙen mikahlōn inrē nö filīnyiyö, um pingangkūö tö e angū-ö; pò yip lamā tulöng mā nö aṅtu tö ngam lātulöng, ōtngöre ap lamātulöng tö cha.

⁹I taṙòkhöre pöri, ngòh rācha nö tölööken ip panam tö teūchtu aṅkūö tö aṅ panô-òṅ.

¹⁰Ngòh tö hāngenlōn tö rupīö öt tööḵngen min tö rupīö; öt rēhĕn anga-aṅ ngòh tö hāngenlōn tö kanôlò, nö taneūnguṙen: chanök alaha an angū-ö inrē.

¹¹Yĕn ṙūölöre ṙôken chehen, ṙūölöre ṙôken cha-a yip nyāmā-aṅ u; ngaich asuh taneūngen öp tö inlānuṙen höng meūkö u minë mat ò?

¹²Kuchīkö mat ön ngòh tö lā-evṙen nö haṙòh, pôrò anga-aṅ nö pōivat; öt halöngtumat pöri nö haṙòh ngòh tökôlò tökūö yanāhakūö re.

¹³Öt lanöökö ap umuh tökiröng maheuṅk chu el katòh ngam tavūöi: halīniṙen nup kanôlò tö öp yōm u nö inchök ò,

¹⁴Ngaich anū-ö kanôlò nö chatngen ip tötlöök kinlah kanihngen; ngaich anga-aṅ ngam yöng töhĕng maneuk kūön, hö-ö pöri anga-aṅ nö aṅhav eltī.

¹⁵Ngaich hē ò nö ṙā-ang el chūök kanūönö ök yöng re nö yih, hēk anga-aṅ min nö kiröönngöre, chumlal sā yanīhi ò, öt kūmuṙen min inrē tö halinten re, nup kahëkö ò öre nö eltī ò.

¹⁶Angū-ö an inrē yöng tötlöök: sā yanīhi ò, ngatī min anga-aṅ nö kiröönngöre; suh ap inrē taneunglen ò tö ò nöng halinten ngam kuföt,

¹⁷Keuheūtngö sakāmö re inrē nö el sinngūlö miṙivlōn inrē, pōyen kanihten invah inrē kumnyahlōn inrē?

¹⁸Yĕh meuk, nuk maheuṅk chu lang tölöök tökô inrē nö nyā-aṅkūö tö ôkö inrē kôtökūö inrē tö kumchikṙen re i la-en nup la-en ngòh töhĕng tak elkatòh ngam tavūöi i nuk töt ṙōl sumkam sakāmö nômö ò, kahëtö ngam Tēv nö in ò, pòn angū-ö lumnööṙö ò.

¹⁹Ṙòkhöre tarik tökē-ĕvkūö tö ngam Tēv tö kanôlò inlānen inrē kanô-òṅ inrē nö kumchikngen re nö in u, hökngen re inrē nö im lumnööṙö ò ngaich kôtökūö tö kunchikngen re im la-en ò, tī ngam Tēv an angū-ö raneushö.

²⁰Pò ò min nö öt pōyen kanöpölōn tö nuk sakāmö nômö ò pò ngam Tēv nö asānngen ò tö kumchik ellōn ò.