Read Car_Nicobarese Mumkahten 6 Bible Online

Mumkahten 6 - Car_Nicobarese bible

Mumkahten 6

¹Maheuṅk chu ap umuh tötlöök el katòh ngam tavūöi, langan apa nö hulalhaka i kui tarik:

²Öt tarīku tö kē-ĕvkūö tö kanôlò tö ngam Tēv, inlānen, ineū-euṅ inrē, lökten ò nö öt hanātuṙen tö nup töng lōn ò, hö-ö pöri ngam Tēv nö kētö kanô-òṅ ò nö kumchikngen re tö u, höng aṅ tahëng pöri kumchikngen re tö u; chanök alaha an angū-ö; tö chökhu nö kanihngen.

³Yē öp tarik nö hēngòng hakūönti tö nyīö, ngaich ṙōl samyeūheu nö aṅ, lökten nup sakāmö samyeūheu ò nö pōyen, hö-ö pöri anga-aṅ nö kumchikngen re i nup tölöök chehen re, ane inrē öt lināpngu; ngö ṙô chin tö öp töt hē kinyônyö re nö ĕhten tö ò.

⁴Pò e nö yih im chanök alaha ngaich chuh el sinngūlö, el singūlö ngaich öp minë-eny e nö hayūni;

⁵Hēk inrē angū-ö nö öt meuk ngam tavūöi hēk akahakūö tö yô-òv; sönen angū-ö nö kôtökūö tö haneūheu ĕhten tö ò anga-aṅ.

⁶Pòrô öre anga-aṅ nö nët köiny samyeūheu nö aṅ, öt kumchikngen re pöri nö i tölöök, röh öi ṙòkhöre chuh im chūök töhĕng?

⁷Ṙòkhöre nup la-en ngòh tarik nö chööḵnyö tö elvāng, sön pöri nö öt tööḵngen öp chūök kinpahare ò.

⁸Suh ap kanôlò ngam tarik tö akaha nö im tö kulō-ovö? Asuh öp inrē in ngam yāich tarik ngam tö huveū-en nö hayöngöre i kūö tö aṅ?

⁹Ĕhten an ngam mineūkö tö mat tö ngam töng karööna kuilōn, chanök alaha an angū-ö inrē kumlöön unôichrit kuföt.

¹⁰Ṙòkhöre nup tö lēnngen nö ngaich löktökūö misī ngaich ṙòkhöre öi akahalōn tö tarik nö ötkô nö hĕng höiny milôhò ṙô nö ip tarik öp tö kalēḵ tö re.

¹¹I ṙôken nup ṙô ṙūölöre chanök alaha, asuh ap inrē anehten ngam tarik?

¹²Chīö ṙöng öp tö akahalōn töp tölöök im tarik isaha ò nö aṅ nö öt ṙōl sumkam nö im tötöl nômö, ngam chahööḵngö ò nöng sā nyat? Achīö ṙöng ap tökô nö vë-eny nang tarik töp mu-unôich rit ò min el katòh ngam tavūöi?