Read Car_Nicobarese Mumkahten 8 Bible Online

Mumkahten 8 - Car_Nicobarese bible

Mumkahten 8

¹Achiāp tö sā ngam tö-akaha tarik? Achiāp tö akahakūö tö manah chehen? Yāngökūö tī an ngam mikah tö tarik, Haṙī-ingre inrē ngam kūö ò töngëḵ.

²Haköp chöngö ngam rācha, um ngangngökūö tökūö ngam töhet tö chūökūö kinlēḵngô meh;

³Ṙā-ang i kūö ò kiröönngöre, un ahāṅkenre yē ap lāinyngen nö öt tölöök, pò ò nö tī-ivö ip töng kanāhanglōn ò.

⁴Pò ngam ṙô ngam rācha nö tökiröng, chiāp tökô inrē nö ngö ṙô tö ò, Suāp la-en meh?

⁵Anga-aṅ ngòh hamang chöngö öthō min nö chök, akahalōn min inrē tö ṙētak talöökö ngam tö akaha tarik.

⁶Pò në tökeuheūttöre nö ṙētakvö, talööku inrē, pòrô kanihngen ngam tarik nö langan nö in ò.

⁷Pò ò nö öt akahalōn töp tö min, chīö ṙöng öp tökô nö vë-eny nang ò tö inlahen e min?

⁸Öt tarīku tökô nö haköp ngam ma-alaha hēk chönguvö ip sakāmö kinpaha; öt löknyu aṅ an ngam kinyūngö, ötrēhĕn min öt lanöökö nö ṙānyen cha yip kamëtöre nö in e.

⁹Meukngöre chin tö në isaha chu kētö ellōn in nup tö ngaich el katòh ngam tavūöi, i saha ngam tarik nö hayöng tarik nö chökhuṙen tö ò.

¹⁰Ngaich chū-ö meuk tötlöök nö lāpi; kuhēthötre ṙung cha-a kunyī-iny re inrē nö ṙā-ang el töhet chūök, ngaich eū-eu nö el ngam chūök cha nö ngatī inlahen. Chanök alaha an inrē angū-ö.

¹¹Pò sācha tötlöök la-en nö öt ilööṙen nö kēkaṙen, ngaich ngam ellōn kūön tarik nö tööḵlö nö hòṅ im la-en tötlöök.

¹²Pòrô öp tö köölö fālen nö hēngòng tumheuh nö lā-evṙen tö tötlöök marô-ò tö nômö inrē sön chū-ö akahalōn tö e min nö löök nö in cha yip tö pa-ekūö tö ngam Tēv, pò cha nö pa-ekūö tö ngam Tēv, pò cha nö pa-ekūö nö i kūö ò;

¹³Ötlöök pöri min angū-ö nö i tötlöök, öt rēhĕn min anga-aṅ nö marô-òten tī tö sakāmö re sā nyat, pò ò nö öt pa-ekūö nö i kūö ngam Tēv.

¹⁴Chanök alaha ap umuh i kūö tumlat, tö yip tarik tölöök tö löökö in tö tösā la-en tötlöök, tötlöök tarik inrē tölöökö in tö tösā la-en tölöök. Chanök alaha an angū-ö inrē tö ṙô chu.

¹⁵Hōtö inṙamlōn chin inrē, pò tarik nö öt aṅhav-in tö tölöök el katòh ngam tavūöi höng ngam nyinā-avkūö, inôkö inrē, kumchikngen re inrē anga-aṅ, pòn angū-ö min kum ò nö kiröönngöre i nup la-en ò i rô-òtö sakāmö ò nö aṅ ngam kahëtö ngam Tēv nö in ò el katòh ngam tavūöi.

¹⁶Hē chu kētö ellōn re hòṅ akahakūö tö mikah, meuk la-en inrē tökeuheūten nö el tumlat, nö öt rēhĕn mat nö meuk inṙôhò tö sakāmö öt rēhĕn tö hatööm;

¹⁷Ngaich chū-ö meuk la-en ngam Tēv nö ṙòkhöre, ngaich ngam tarik nö öt kôtökūö tö la-en elkatòh ngam tavūöi. Öp tö sitih ṙôken la-en tarik nö chöh, ötkôtökūö min anga-aṅ tö e; pòrô tö-akaha tarik nö vë-eny re nö akahakūö ötkô anga-aṅ nö kôtökūö tö e.