Read Car_Nicobarese Sòlòmön 4 Bible Online

Sòlòmön 4 - Car_Nicobarese bible

Sòlòmön 4

¹Yĕh meuk, hanāngen chu vai man, yĕh meuk, vai man! Pumpa nun minë mat meh nö ël kinṙul kūö meh. Sā töhĕng kiteūm pököre minë keūyö meh kahōya nö i paneūti i Kilīöt.

²Minë kanap meh sā tö hĕng kiteūm tö kamöpi kan sīṅp nup yamôklö nö ṙā-ang i vinôkö, ṙòkhöre nö tönët nòng kūön, ngaich öt hĕng nòng in u tö miṙīvlōn.

³Minë minuh meh sā laturë ta-īö, vāyö elvāng me-eṅ inrē. Minë arëkūö meh sā tö hĕng tāk anār kinṙul kūö meh.

⁴Sā chūök chamônga in Tāvit ngam likeun meh, vīlöng nö chūök vinī-iṅ aṅtī kumyung, in e, nö seūhaka köinyu lanaklö, ṙòkhöre anū-ö nö lanaklö kumyung.

⁵Minë teh meh sā tö nët nòng kūön, tö nët nòng kūön kāsöl, nup nyamā nö i nup lilī.

⁶Hanöng saha yanīhi sakāmö falngöre inrē nup nyat, falngöre chin min im rôngö mūr im rung lōpan inrē.

⁷Hanāngen chu, keuheūtlöre vanāyö man; öt chanôchu in meh.

⁸Tā-a in chu ṙā-ang Lepanön, pīhö chu; tā-a in chu ṙā-ang Lepanön. Kiröönngöre ṙā-ang kui Amanā, ṙā-ang kui Sēnir Harmòn inrē, ṙā-ang i nup kinlūhu lāyön, ṙā-ang minë rôngö lepöt.

⁹Kē-ĕ öp ellōn chu tö meh, kanānö chu, pīhö chu, ngaich man kēḵ ellōn chu öm höng hēngö yanöṅtö tö ngam hanūöt meh.

¹⁰Yöng pinchākö ngam hanāngen meh, kanānö chu, pīhö chu. Mötlö ngam hanāngen meh tö vāin, tinhūsö tavī-i meh inrē tö tötahūsa!

¹¹Vī töpachāka nun minë minuh meh, pīhö chu; hönī aṅteh inrē elkatòh litāk meh; öp tinhūsö mat inyut meh sā tinhūsö Lepanön.

¹²Tö hachāpikūö panô-òṅ kanānö chu, pīhö chu, panô-òṅ tö hachāpikūö, löklö mak tö hapānikūö.

¹³Panô-òṅ anār nup tö meunylö in meh holtö tö atölka ṙòng chōn, hennā holtö nāt,

¹⁴Nāt, manūlö, kalimas uk chōn inrē tötahūsa, holtö nup chōn lōpān, mūr alō inrē, holtö nup yöngkūö tötahūsa

¹⁵Panô-òṅ töhëmlö mak, tö-ūlö mak tö-aṅ, töhëm kun mak inrē ṙā-ang lepanön.

¹⁶Aṅhen, Ō kuföt lā kapā, yih inrē, Ō kuföt lòhngö! Fööngö kui ngam panô-òṅ chu, hökngen öp tinhūsö e nö parāti nö heūingö. Hökngen öp hanāngen chu nö el panô-òṅre nö yih, nyā nup tö-atöllöng ṙòng chōn inrē.