Read Car_Nicobarese Sòlòmön 5 Bible Online

Sòlòmön 5 - Car_Nicobarese bible

Sòlòmön 5

¹a Yih chin el ngam panô-òṅre, hanāngen chu, pīhö chu, hamūl mūr chin holtö nup tötahūsa chu, nyā chūök hönī chin holtö öp hönī chu, òk vāin re chin holtö aṅteh, b Ō hol chu, nyā-avkūö òk inrē: kalēḵĕkūö òk, Ō hanāngen chu!

²Haṙòh chin ngaich, aṅhen pöri öp ellōn chu. Hangihtöre! Kurönga ap hanāngen chu. Löpnyökūö chu, kanānö chu, hanāngen chu, pumpa chu, töteung in chu; tön nyôṅpö kūö chin tö tacham, keūyö chu holtö kintākö aṅ im hatööm.

³Luhngö inyutre chin, sitih kanô-òṅ öich vö hayutlö e? Ngaich chin söich röön re, sitih kanô-òṅ öich vö hamumngö u?

⁴Kētö tīre öp hanāngen chu ip kinchāt inkūp, ngaich ngih ellōn chu nö kapahare.

⁵Chōholre chū-ö ngaich löpnyökūö öp hanāngen re katāka eltī chū-ö inrē tö mūr, tö māku mūr inrē i kuntī chu, i kaha ngam inköpkūö inkūp.

⁶Löpnyökūö öp hanāngen re chū-ö, Havöökūöre pöri nö ngaich ök hanāngen chu, Paṙööyi ellōn chū-ö ngaich hē ò nö ṙô-òv. Chöhan chū-ö, ötkôtökūö pöri tö ò; havëken ò chū-ö, öt sapṙô chu pöri anga-aṅ.

⁷Kôtökūö yip amahati tö chu, I saha cha nö kiröön nö el panam; fōhoh chu cha-a, hanyahken chu cha-a, kēngö ök kinṙum chu cha-a, yip amahati i minë kinlōngö.

⁸Chūökuṙô chin in yīö, Ō yī-ö kikānö kūön aṅ Yērusalem, yē yīö kôtökūö töp hanāngen chu, vë-eny nang ò yī-ö tö chu vahtö hanāngenlōn.

⁹Suh ap hanāngen meh nö mötlö tö tahëng hanāngen, Ō tövai aṅ i kikānö? Suh ap hanāngen meh nö mötlö tö tahëng hanāngen, töp lökten meh chūökuṙô in ih?

¹⁰Yālö elmat ap hanāngen chu turë inrē, Mötlö nö i tö söm köṅny.

¹¹Humlum ap kui ò nö tövai; paṙëya nup keūyö ò, sah sā kavöö.

¹²Sā pumpa nup mat ò mī ip töhëmlö mak, tövōkö tö aṅteh, löökö ṙinā-aṅ.

¹³Nup arëkūö ò sā tötahūsa chamam, tahūsa tinveūkö, lilī nup minuh ò, töhalööktitvö mak mūr.

¹⁴Humlum nup kël ò nö milön, nö yanöṅtuvö. Kanël ëlifen öp alaha ò, vītu aṅmat tö safīr.

¹⁵Ihong nup kalröön ò nö sökhaka, chūök rööntö tö humlum. Ap mineūkö ò sā Lepanön, tö atöllöngö sā sītör chōn.

¹⁶Tölngö pinchākö ap ṙô ò; keuheūtlöre inrē anga-aṅ nö lōn. Anga-aṅ ön ngòh hanāngen chu ngòh inrē hol chu, Ō kikānö kūön Yērusalem.