Read Car_Nicobarese Isayā 1 Bible Online

Isayā 1 - Car_Nicobarese bible

Isayā 1

¹Ngam maheuṅk Isayā kikōnyö kūön Amôs, ngam maheuk ò, lāinyngen Yūtā Yērusalem inrē, hē nuk sakāmö Usiyā, Yôtam, Ahas, Hēsikiā inrē rācha aṅ Yūtā.

²Ō yī-ö halīöngö, hangihtöre, kētö elnang re inrē, Ō me-eṅ tumlat, tön ngaich an ngam Mā Tēv nö ṙô-òv: pōyö tī chin haruklö kūön inrē, ngaich cha-a nö lā-al chu ahôngen chu inrē.

³Akahakūö ön ngòh kōiny nuā tö yōm re, akahakūö inrē ngòh köttö tö chūökre nö ip yōm re; hö-ö pöri Israĕl nö akahakūö, hö-ö vē tarik chu nö ngëicha.

⁴Pumnāmö tarik tötööḵlö tö tökööl, tarik tölangan tö ötlanöökö, kūön töt löökö la-en nyīö töchōichö la-en: ngaich yin nö ṙāngö ngam Mā Tēv, öt chūmkūöṙen yin tö ngam töhet in Israĕl, aṅ tahëng yin nö ngaich, ngaich yin nö heūlritre.

⁵Kūöyòh öyih ṙòngmö chökngöre, töp lökten yīö höng hēkö kūöre ahôngen? Keuheūtngöre an ngam elkui nö vahavö, keuheūtngöre ngam fanöinylö inrē nö cheingö.

⁶Löktökūö kintāl elröön söl kūi nö öt lanöökuṙen nö in e; höng vah, pinṙôkö, tötōngu vah inrē: hö-ö nun nö pēt, öt rēhĕn nö haṙūngö, öt rēhĕn nö sôhòkūö tö tavī-i.

⁷Ngaich an ngam panam meh nö öt aṅhaṅvkūö; ṙāpngö nuk elpanam meh nö ngaich tökūö tameūyö; keuheūt yip nö ngaich aṅ tahëng nö ngeūktö ngam panam meh nö i kūö meh, ngaich an nö öt aṅhaṅvkūö, sā tö tiṙöli nö ngaich tö yip aṅ tahëng.

⁸Ngaich an ngam kikānö kūön Sīyôn nö ṙā-ayö nöng sā sanrā el panô-òṅ vāin sā elyöngö el panô-òṅ kiukömpör/pantīaka sā elpanam tökayīngö nö havīlöng.

⁹Yē ngam Mā Tēv yip tömaṙôngö öre nö öt rahëichyen ṙahāti nö in hī tö chööḵṙen, ngaich öre ayī-ö höng sā. Sôtöm, ngaich öre ayī-ö höng sā Kômòra.

¹⁰Hang ngih ṙô ngam Mā Tēv, yī-ö mahayöng i Sôtöm: kētö elnang re in ngam chöngö ngam Tēv hī, yī-ö tarik aṅ Kômòra.

¹¹Suh chööḵnyi nö tö ngatī ṙôken tökētu tö yīö nö in chu? ṙô ngam Mā Tēv: Tööḵngen chin tö töföngö tökētu kūön sīṅp, tö tösangöö nup töha-òknyu alaha töṙeūla inrē, rö-ö chin kuchīkölōn i mahām kōiny nuā, i mahām kūön pököre hēk i mahām kōiny pököre.

¹²Yē yīö yih hameuktöre i kūö chu, achiāp töhōḵ tö ngih nö eltī yīö, öi rööntö ël ngam patī chu?

¹³Uh yin kumtö töng töl tökētu; sā-òkkūö chin ngaich tö lōpān, tö ayöö chingëṅt töhet sakāmö inrē, tö ngam invëtö manūlö ötkô chin īnu tö tötlöök töp tö-ūnngen inrē inmūlö.

¹⁴Kunyahalōn chin i nup ayöö chingëṅt yīö i nup tökiröng nyinā-aṅ inrē tölēnö hē: kanihngen chu nun anū-ö; chei chin keūnö u inrē.

¹⁵Yē yīö hanyāknyö kël re tilupngö matre chū-ö min tö yīö: hôṅ, yē yīö pōyen ṙô vë-ekūötēv, öt hòṅ hang chū-ö min; tööḵlö nun minë eltī yīö tö mahām.

¹⁶Söichöre yin ahëtöre yin; ṙāngö ngam tötlöök vahīṙen yīö nö ṙā-ang i kūö chu; ṙāngenre kēken tötlöök:

¹⁷Harūnöre vahī-ivṙen tö tölöök; chöh inkaha fālen, meukṙen töhakihtuṙen akah fālen kūönyōich, ve-elkui tafīösi.

¹⁸Tā-ih, töi ve-ekūöre, ṙô ngam Mā Tēv: pòrô nup tökööl yīö nö sā töngāṅvö elmat, ngaich anū-ö min nö isoh sā tökënngöre tacham; pòrô anū-ö min nö turë sā tököinyö mat laturë, sā sanôi sīṅp min anū-ö.

¹⁹Yē yīö töhōḵ hamang chöngö inrē, ngaich yī-ö min nyā-aṅvkūö tö tölöök aṅ im panam:

²⁰Yē yīö pöri sōḵ ahôngen inrē, ngaich keuheūtngöre vah yī-ö min tö kūö fël: pòn ngam elvāng ngam Mā Tēv tö ṙôten e.

²¹Sitih ang ngam elpanam tökô-en nö vītöre nö kikānö mī-inyihköre, ngam tötööḵlö tö inkaha fālen! Iyöng ël e lanöökö, ngaich pöri töngamuh nö chūök famëlngö tarik.

²²Yëichu nuk nö ngaich rupīö meh, katēhĕ nuk vāin meh tö mak.

²³Ma-ahôngen yip kūön rācha meh, mahanôl mū-ulaya inrē; ṙòkhöre nö hāngenlōn tö rineushö, ngaich fachūrit raneushö: hö-ö cha-a nö akah fālen kūönyōich, öt rēhĕn nup fālen tafīösi nö yih nö in cha.

²⁴Lökten ṙô ngam Mā, ngam Mā Tēv yip tömaṙôngö, ngam tökalēḵ aṅ Israĕl, Hāöö, hòṅ heūheul alaha re chin tö vē tökunyaha-elmat tö chu, havahalre inrē tö vē lā-al re:

²⁵Havöötökūö eltī re chin min inrē in meh, ngaich ahetngö nup yech in meh inrē, kēngö nup kôpöre inrē in meh:

²⁶Ngaich chū-ö min inrē havantöre kamhôṅka in meh nö sā lā-urĕh, mahalēnö meh inrē nö sā ik ranehlö: ngaich unôich min më-eṅ havëkö ngam elpanam lanöökö, ngam tökô-en elpanam.

²⁷Havānö an min Sīyôn nö holtö inkaha fālen, yip mahavan min nö in e inrē nö holtö lanöökö.

²⁸Ngam tinṙōlngö tököölö fālen pöri tö yip tötôichlen inrē min nö holre, cha-a inrē yip ṙamāngö ngam Mā Tēv nö keuheūtngöre vah min.

²⁹Pò cha min nö sirōngkūö tö nup ōk nup lōn yīö, ngaich yī-ö min kalūöchöre el kui tökūö nup panô-òṅ tö-atöllöng tö yīö.

³⁰Pò yīö sā ōk öp tönyangngö rōi, sā öp panô-òṅ inrē töt māku.

³¹Ngaich yip tö kalēḵ min nö sā tö tūökö, öp la-en ò inrē sā linròklö kūö tameūyö; ngaich nëtre anū-ö min nö ökngö, ngaich öt hĕng tak min mahanyangngökūö u.