Read Car_Nicobarese Isayā 10 Bible Online

Isayā 10 - Car_Nicobarese bible

Isayā 10

¹Tötkôlò yip cha-a mahachöngten tötlöök chöngö, yip kamūich inrē kamūich tö ötlöök;

²Nö halō-ongkūö yāich tö ngam inkaha fālen, kēngö mikahlōn yip yāich tarik chu inrē, pòn hōtu yip tafiösi nö pôḵ cha, hòṅ cha inrē nö vīten yip kūönyōich nö kā-ai tö cha!

³Suh öp min la-en yīö ip sakāmö chinöhkö, im inlëlngö inrē yamih min nö ṙā-ang tömarôvat? In chīö öi min falkö hinòlṙen re? Isuh tī öi min ṙāngö ngam ineū-eu yīö?

⁴Höng sōnngöre yin min elkatòh yip tökē-ĕ, fukhu kui min inrē tö yip töfëli. Kūö në anū-ö öp lanīnö ò nö öt havööṙi kūö; ṙòngmöng teuthak pöri ngam kël ò.

⁵Mah yī-ö aṅ Asiriā, chanökṙen aṅ im lanīnö chu, tö-aṅhav eltī tö ngam tinkung lanīnö chu!

⁶Tīnten ò chin min nö lā-al öp töchōich pumnāmö tarik, lā-al yip tarik chūök lanīnö chu öich kētö chöngö ò min, nö kēḵ pôḵ re, kēḵ kāḵ re inrē, rööntö kui cha inrē sā tilin el nup talöökö.

⁷Hö-ö pöri anga-aṅ nö hòṅ ngatī tī, öt rēhĕn öp ellōn ò nö ngatī, ellōn ò pöri angū-ö ngam tinṙōlhanga, rinökngen pumnāmö tarik inrē öt kūöṅ nen.

⁸Pòn ngö ṙô anga-aṅ, Hö-ö yip kūön rācha in chu nö ṙòkhöre nö rācha cha?

⁹Röh öp Kalnō nö sā Karkimes? Röh öp Hamat nö sā Arpat, röh öp Samaria nö sā Tamāskös?

¹⁰Sā ngih kël chu nö vīten nup pūlngö insātēv nup tövai töka-īpö insā i Yērusalem i Samaria inrē;

¹¹Hö-ö öich min sā tīre tö Samaria tö nup insātēv ò inrē, öich ngatī tī tö Yērusalem tö nup insātēv ò inrē?

¹²Lökten an min nö ngö inlahen, hē ngam mā nö hateungngö la-en re nö i kui rung Siyôn i kui Yērusalem inrē, chöhken öp kūön öp rācha aṅ Asiriā chin min öp tö ngë-eṅ ellōn, öp ineū-eu öp chin-eūṙökūö ò inrē.

¹³Pò ò nö ngaich nö ngö ṙô, I kumlēḵ kël re chin keuheūten ngaich tö e, i mikah chu inrē; pò chu tö-akaha: ngaich chin inrē kēngö kūö panam yip tarik, ngaich inrē öich ulāingen cha tö nup chehen cha, ngaich kumten cha chū-ö inrē öich sā tökalēḵ tarik yip amūchhak nö el kantēra rācha:

¹⁴Ngaich ngam eltī chu inrē nö kôtökūö tö ngam fôngö kanôlò yip tarik: sā öp töhĕng tak inrē mahamūl nup uhöö töng ṙā-ayö, ngatī tī öich hamūl në tumlat; ngaich öt hĕng tak umuh mahanyāṅknyö sanëôk re, hēk vamā-any kūö re, hēk öp tö sā ṙô chehechōn.

¹⁵Eū-eure ang ṙung ngam hanīöng nö in ò ngam tö aṅhavtī tö ò nö fung? Hapōilöre hòng ngam ṙanat nö in ò ngam ṙamat tö kūö ò? nö sā öp chōn nö kiyanngö re nö ip chamātlöre, hēk inrē sā öp tinkung chamātlen ò öp töt chōn.

¹⁶Lökten an min ngam Mā, ngam Mā yip tömaṙôngö, nö söömtö lanëvö in yip tökiröng alaha; ngaich ṙënngen ngam ineū-eu ò min nö tōttukūö nö hū nö sā hanūkūö tameūyö.

¹⁷Ngaich ngam hanātö Israĕl min nö tameūyö hanūkūö inrē ngam Töhĕng Töhet in ò: ngaich angū-ö min nö ökti tī ngaich haṙāpngö nup töchökhu kaha chōn nöng hĕng sumkam.

¹⁸Ngaich anga-aṅ min nö ṙāpngö kūö tö ngam lanöökö öp el inchōn ò, tö ṙòng aṅ taṙeūḵ ò inrē, hĕnghöre nômö alaha inrē: ngaich angū-ö min nö sā öp kumṙapkö pantēra nö tayē alaha.

¹⁹Ngaich öp chööḵ nup chōn ò el inchōn nöng rahëchtitṙen min, nöng kô-òre tī min öp nyīö nö kūichö u.

²⁰Ngaich ngö inlahen angū-ö min ip sakāmö angū-ö, tö yip chööḵ Israĕl, cha-a inrē yip töt kô-òng vah aṅ patī Yāköp, nö öt köpen min nö lātulöng töp famëlö cha; im Mā Tēv pöri min nö köp, ngam töhet aṅ Israĕl, nö im kanô-en.

²¹Havan yip min chööḵ, yip chööḵṙen Yāköp, nö im tökalēḵ Tēv.

²²Pôn pòrô më tarik Israĕl nö sā kuyāyö mai, höng yip chööḵṙen cha min mahavan: kalēḵ öp kinheūtngö vah, taṙēchlöngö nö holtö lanöökö.

²³Pò ngam kinheūtngövah, ngam tökalēḵ lōn inrē, ngam Mā min, ngam Mā Tēv yip tömaṙôngö, nö vīlö e nö ellōn ngam tumlat.

²⁴Lökten an ngam Mā nö ngö ṙô, ngam Mā Tēv yip tömaṙôngö, Ō yī-ö tarik chu mī-iyöng Siyôn, uh yin pa-ekūö tö yip aṅ Asiriā: pòrô anga-aṅ min nö hachökö meh nö aṅtī tö chōn, ngaich hanyāṅklöp aṅtī re nö in meh nö sā inlahen yip aṅ Aikup.

²⁵Tön höng rahëchtöreṙen, ngaich ngam tökiröng lanīnö min nö hateungtukūö, ngam tanānyö min nö hateungtukūö, ngam tanānyö chu inrē, nö ip tinṙōlngö cha.

²⁶Ngaich ngam Mā Tēv yip tömaṙôngö min nö haruhlö alaha lā-al ò tö aṅtī famòh, sā finëlngö yip aṅ Mītia nö ip ihong Ôrep: ngaich öp tinkung ò min nö i kui ngam mai, ngaich hachônglen ò min anga-aṅ nö sā inlahen tī yik aṅ Aikup.

²⁷Ngaich ngö inlahen angū-ö min ip sakāmö angū-ö, tö ngam tayuk ò min nö kē-ĕngre nö ṙā-ang el ranôṙö meh, ngam kaneun ò inrē nö ṙā-ang i likeun meh ngaich ngam kaneun min nö laköli tökūö finòhtö tavī-i.

²⁸Kiröönngöre ök, ngaich tölngö Rimmòn, yih anga-aṅ nö i Ayat, lökngö Mikrōn anga-aṅ; afônglö nup inṙung chehen re anga-aṅ nö i Mikmës.

²⁹Ngaich yik nö havāngngöre nö el talöökö; iyöng töre yip nö ngaich nö i Kipā; kayīna öp Rāmā; falngöre ngaich ngam Kipiā Sôl.

³⁰Pōitô man hū-a, Ō më-eṅ kikānö kūön Kāllim! Hangihtöre, Ō Laisah! Ō me-eṅ yāich Anatôt!

³¹Ma-afalngöre öp Matmenah: hamūlöre yip aṅ Këpim nö falngöre.

³²Sökngöre öp min nö i Nòp ip sakāmö: aṅtī tö kël re anga-aṅ nö harutkö ngam rung ngam kikānö kūön Siyôn, ngam rung Yērusalem.

³³Yĕh meuk, ngam Mā Tēv yip tömarôngö, nö ṙalngö nup pak min nö aṅtī tö pinhe-eṅkūö kūöltu nup min tömarôlòng, tumṙeūtu min nup tökūöltu kui.

³⁴Ngaich anga-aṅ min nö kusehngö nup töyul elinchōn nö aṅtī tö vët, fukngö min ngaich Lepanön tö tī öp tökalēḵ.