Read Car_Nicobarese Isayā 13 Bible Online

Isayā 13 - Car_Nicobarese bible

Isayā 13

¹Ngam lumngan Pĕpilön, tömeūkö tö Isayā ök kikōnyö kūön (Amôs).

²Asöklö minkahngö yin i kui ngam töngasngö rôngö, hachônglö ṙôre in cha, kuvāi kël re, hòṅ cha nö kuhēthötre nö el inkūp yip mā.

³Ngaich chin tölṙô ngam ahetlö chu, hôṅ, ngaich chin havëkö yip tökalēḵ tarikre kūö ngam lanīnö chu, cha-a yip töhapōilöngö nö i minā-aṅ chu.

⁴Sā ṙô yip tö kiröng tarik ap ṙënṙô yip tömaṙôngö nö i kui minë rôngö. Ṙënṙô tökalūöchöre nup pūlngö yip pumnāmö tarik tömūlhaka! Hamūl yip kumyung an ngam Mā Tēv yip tömṙôngö nö im kinyūngö.

⁵Yih yip nö ṙeūngö tömarôvat panam löktökūö manā-angkūö ngam halīöngö, anga-aṅ ngam Mā Tēv, nup aṅtī ngam tökiröng lanīnö ò inrē, nö tīṙōlngö ngam panam nö keuheūtngöre.

⁶Ayôṙa yin; tön röhta an ngam sakāmö ngam Mā Tēv; nö sā inlëlngö yanihih min nö ṙā-ang im Tökeuheūttöre Chöngö.

⁷Lökten min ṙòkhöre nup kël nö öt kalē-en, paṙöiyi ellōn tarik min nö ṙòkhöre inrē:

⁸Vööngö cha-a min; tarulköti chanökö haṙivlōn inrē cha-a min; chök yip min sā kikānö mahalöinyöre nö hòṅ kayôḵ: kö uṙëh yip min nö in höö sā tameūyö min nup arëkūö cha.

⁹Yĕh meuk, yih an ngam sakāmö ngam Mā Tēv, tötlē-ĕ, holtö tanānyö ingëṅṙö inrē; nö vīngen ngam panam nö öt aṅhavkūö, nö fëlngö tököölö fālen inrē nö in e.

¹⁰Pò minë taneūsömat ngam halīöngö minë tömūl taneūsömat inrē in e nö öt kētö yanāngö mat re min: sangūli min ngam tavūöi im röön ò nö kiröönngöre, hö-ö min ngam chingëṅt inrē nö kētöp yanāngö re.

¹¹Ngaich chū-ö min sācha tī töm panam tökūö tökööl cha, yip tötlöök inrē tökūö kanöölö fālen cha; ngaich chū-ö min, vīten ngam nganë-eṅkūö mahakeūlenre nö rö-ö, ane inrē tumṙeūtö kanësen ngam töpahë-evö.

¹²Vīten tarik chin min nö iyāich sā tö pahīöya humlum, ngam tarik nö sā inyāichö töhet humlum aṅ Ôfir.

¹³Lökten chin min vīten minë halīöngö nö kayīna kiyinka inrē min ngam tumlat nö ip chūök re, i lanīnö ngam Mā Tēv yip tömaṙôngö, ip sakāmö inngëṅṙô tanānyö ò.

¹⁴Ngaich ngö inlahen angū-ö min, nö sā töt hamūlö tö tarik, cha-a min nö kö kö havööngökūö tarik nö in yip tarik ò, kö falngöre inrē min tarik nö i panam re.

¹⁵Kö kuringnyu min yip tö kē-ĕ tökūö sanët.

¹⁶Yip tënö kūön cha min inrē nö pinyënyö i kūö cha; kē-ĕ aṅ min nup patī cha inrē, ötlēkaṙen inrē yip pīhö cha.

¹⁷Yĕh meuk, haruhlö alaha yip aṅ Mīt chin nö lā-al cha, yip tötkūöngenre min tö rupīö, i humlum inrē, hö-ö cha-a nö ööire tö e.

¹⁸Ngaich nup linreny cha min nö panyënyö kūö tö yip ṙāl tarik; hö-ö cha-a min inrē nö aṙē-ĕlōn nö i aṅ el chūök kanūönö; öt ṙā-al nyīö min nup mat cha.

¹⁹Ngaich Pĕpilön ngam ineū-euṅ në pūlngö, tövai nö tö-eū-eu aṅ Kaltī min nö sā hē tinṙōlngö Sôtòm Kômòra inrē tö ngam Tēv.

²⁰Öt hētu min angū-ö ngaich nö aṅhaṅvkūö, ötrēhĕn min angū-ö nö iyöngka ël i tumköl chap tarik: öt rēhĕn min yip aṅ Arēpia nö vītö rūkui re nö umuh; öt rēhĕn min yip yōm sīṅp nö tölṙô nup sīṅp re nö hulalngöre nö umuh.

²¹Umuh pöri min nö ṙōlhaka nup tötainy aṅ el inchōn el ngam tönyalnyi; tööḵlö min nup el patī cha inrē tö nup töhaṙivlōn ṙô chehechōn; iyöng umuh inrē min ôsrich, kiṙīöm inrē min nup satīör nö umuh.

²²El nup chūök kumyung cha min inrē nup am aṅ el inchōn nö av, el nup patī rācha tö vai inrē nup chakāl: röhta yanihih öp ṙētak ò, ngaich nup sakāmö ò min nö öt marô-òten.