Read Car_Nicobarese Isayā 14 Bible Online

Isayā 14 - Car_Nicobarese bible

Isayā 14

¹Pò ngam Mā Tēv min nö aṙē-ĕlōn tö Yāköp, ṙòngmö atöllen Israĕl an min, ngaich ha-ūichten cha nö im panam cha; hamūltöre min ap aṅ tahëng nö in cha, ngaich cha-a min nö köpta nö i patī Yāköp.

²Ngaich min yip tarik nö kē-ĕ cha, ngaich kēten cha nö i chūök cha: ngaich ngam patī Israĕl min nö amīnu tö cha i panam ngam Mā Tēv nö kikōnyö tarik cha kikānö inrē tarik cha: ngaich cha-a min nö kē-ĕ cha nö töhakövö, më töhakövö, ngaich cha-a min nö hayöng yip mahakihtenre.

³Ngaich ngö inlahen angū-ö min ip sakāmö ngam Mā Tēv min nö kē-ĕkūö meh tö haneūheu ṙā-ang ip miṙīvlōn meh, ṙā-ang i lumngan nuk la-en meh inrē i chūök meh vītuṙen kūönkūö,

⁴Lökten man kēlö ngih inchō-oṙô in öp rācha aṅ Pĕpilön ngö ṙô, Sitih ṙanāngen ang ngam mahakihten! öt ngöhören an ngaich ngam humlum elpanam!

⁵Likölngö ngam tinkung tötlöök an nö ngaich ngam Mā Tēv, ngam tinkung yip mahayöng;

⁶Ngam fanòh yip tarik im lanīnö nöng iṙūöhöti, yip mahayöng pumnāmö tarik nö im tanānyö, nö aṅtī tö inkihten öp tötkô nö lanakngen.

⁷Heūheure ön nö ngaich ngih panam, chēvhakaṙen: ngaich yin nö sayah köny ṙô nö tikökṙôre.

⁸Hôṅ, ṙāmölōn nö in meh në för chōn, nup sītör aṅ Lëpanön inrē, nö ngö ṙô, Hēngen tö meh tumṙeūtuvö, öt hĕng tak ngaich yamih kamūöl tö chōn in ih.

⁹Lataṙeū ngam anūlö nö kē-ĕyö nö pòkūö meh nö höng kūö meh ip yanīhih meh: kūö meh an nö halöinyka yip kupah, urōsen nö ṙòkhöre yip mākūö yip rācha pumnāmö tarik nö ṙā-ang el kantēra cha.

¹⁰Ngaich cha-a min nö ṙòkhöre nö ngö ṙô nö sapṙô meh. Ngaich öm me-eṅ inrē vīngöre öt kalē-en sā ih? Vingöre öm ngaich sā ih?

¹¹Ngaich ök inkeūlen kanôlò meh nö kētu nö el Anūlö, öp ṙënṙô nup ranöng meh inrē: elkatòh meh nup kamlökö nö chamam meh, kinṙum meh inrē nup kamlökö.

¹²Sitih lökten öm suktöre ṙā-ang el halīöngö, Ō Taneūsömat Sakāmö kūön ngam Peuheū! Sitih lökngen öm kūöltuvö el tumlat, me-eṅ muhulaltö vē pumnāmö tarik nö lātaṙeū!

¹³Ngaich ngö ṙô me-eṅ ellōn re, Hòṅ yônlö chin el halīöngö, hapōilö ngam kantēra chin min lātulöng tö minë taneūsömat ngam Tēv; ngaich chū-ö min ūichngöre i kui ap rung rôngö tarik, i nup manā-ang kūö ngam lākapā:

¹⁴Yônlö chin min lātulöng tö rô-òl chūök minë taṙul; ngaich chū-ö min sā ngam Tötulönghöre.

¹⁵Sön pöri me-eṅ min kētu lātaṙeu el anūlö, ip manā-angkūö ngam Anūlö.

¹⁶Acha-a min yip mameūkö meh nö ngëichken meh nö lökhöt mat töcheūkti manëngö ngëichken meh min cha-a nö ngö ṙô, Anga-aṅ ang ngòh tarik vamīten ngam tumlat nö kayīna, ngam kumyinkö në pūlngö;

¹⁷Ngam vamīngen ngih panam nö el tönyalnyi, ane inrē tumṙōlngö nuk elpanam in e; ngam töt lamuhnyö yik tökē-ĕ tö ò nö chuh patī re?

¹⁸Ṙòkhöre yip rācha pumnāmö tarik, ṙòkhöre cha-a, haṙòh kui kanôlò re, nö kö el patī re.

¹⁹Ngaich pöri me-eṅ marôvat kavāliyö öm ṙā-ang im kui kupah re sā pak sin-òkkūö, inyut töfëli, öp tösāpiyö tö sanët, yik mameutti nö lātaṙeū nö i nup ihong el Anūlö; sā alaha kupah törööntukui.

²⁰Hö-ö man min hamūltu in cha öm lāpi, pò meh piyāingö ngam panamre, ngaich tī man fëlngö yik tarik re; hö-ö öp min kūön tötlöökö la-en nö örheūheu nö köpö minë-eny.

²¹Halēn chūök finëlngö yip kūön ò tökūö kanöölö fālen yik yöng cha; hòṅ cha nö öt chōholre, nö amīnu töng tumlat, ngaich hatööḵöl kūö ngih panam tö nup elpanam.

²²Chōholre chin min lā-al cha, ṙô ngam Mā Tēv yip tömaṙôngö, ngaich rökngö minë-eny tö yip chööḵṙen inrē nö ṙā-ang Pĕpilön, tö ngam kūön tökūön ngam kūön inrē, ṙô ngam Mā Tēv.

²³Vīten e chin min inrē nö amin pôrkupain, törūḵngö mak inrē: ngaich chū-ö min aṅtī tö fanòh pinyāingö öich fòhngen e, ṙô ngam Mā Tēv yip tömaṙôngö.

²⁴Chūöku ṙô an ngam Mā Tēv yip tömaṙôngö, nö ngö ṙô, Kô-en nö sā ngam lōn chu, ngatī taneungtökūö min angū-ö; sā ök chööḵnyö chu inrē, ngatī min angū-ö nö sökhak:

²⁵Likölngö öp aṅ Asīriā chin min ip panam chu i kui minë rôngö inrē öich rööntö kui ò: ngaich min ap kaneun ò nö kiröönngöre nö ṙā-ang in ò, ap lumngan ò min inrē nö kē-ĕngre nö ṙā-ang el ranôṙö ò.

²⁶Angū-ö ön ngih chööḵnyi nö ing tumlat nö keuheūtngöre chūök: angū-ö ön ngih kël töhateutnyu nö i kui në pumnāmö tarik nö ṙòkhöre.

²⁷Pò ngam Mā Tēv yip tömaṙôngö nö lōn tö e, achīö ap min tökô nö tahngen e? Ngam kël ò inrē nö hateutnyu, achiāp min tökô nö havöökūö e?

²⁸Ik samyeūheu ök rācha Ahas nö kapah ngih ṙô ngam Tēv.

²⁹Ō Filistain, ṙòkhöre yī-ö, ui ṙāmölōn, tö ngam tinkung nö laköl nöng fanòh yīö: tön löknyö ip ṙĕh öp pēch min nö meutnyi öp pēch töhĕng rök kūö, ngaich ap kūön ò min nö tötameūyukūö kumteū nö pēch.

³⁰Nyā öp min lanòh kūön yāich, ṙōlngöre min öp töhaṅten nö öt pinlānguṙen: ngaich chū-ö min fëlngen öp kūön meh aṅtī tö inyāichö, fëliyö min inrē yip chööḵṙen meh.

³¹Ō inkūp, ayôṙa man; hū-a man Ō elpanam; ngaich man höng changāchiṙen, Ō Filistain ṙòkhöre nup in meh; pòn löktö lā kapā öp lul nö yih ngaich öt hĕng tak tö payāyi nö ip mitöökö ò ip hē ṙētak.

³²Asuh ap min töhĕng sanap ṙô yip ma-ahangkö pumnāmö tarik? Ngam Mā Tēv an vamītö chūök Siyôn ngaich in e min nö hanyathötre yip töhakihtuṙen tarik ò.