Read Car_Nicobarese Isayā 19 Bible Online

Isayā 19 - Car_Nicobarese bible

Isayā 19

¹Ngam ṙô ngam Tēv nö in Aikup. Yĕh meuk ngam Mā Tēv nö i kui töyit taṙūl, yih inrē nö i Aikup; ngaich nup insātēv Aikup min nö kē-ĕngre nö i kūö ò ayëṙi min inrē öp ellōn Aikup nö el ṙôngö e.

²Haruhlö alaha yip aṅ Aikup chin min nö lā-al aṅ Aikup: ngaich cha-a min nöng kilöönö höö tö mak alahare, ane inrē höng kö lā-al holre; elpanam lā-al elpanam, pūlngö inrē lā-al pūlngö.

³Öt ōtre min ngam ma-alaha Aikup nö ël e; ngaich chū-ö min inrē piyāingö öp inlēnö in e: ngaich cha-a min nö chöh nö in nup insātēv, in yip töchëṅcha ṙô inrē, in cha inrē yip mameuk ma-alaha, in yip tömilūönö inrē.

⁴Ngaich chū-ö min kēten yip aṅ Aikup nö eltī öp mā tötmilēḵ; ngaich hĕng tak min öp rācha tötainy mahayöngö cha, ṙô ngam Mā, ngam Mā Tēv yip tömaṙôngö.

⁵Nyôngö inrē min minë mak nö ṙā-ang el mai yëḵngen inrē ngam Tahël min ngaich nyôngö.

⁶Ngaich hangeūṅtu min nup Tahël; kūönngöre min nup kun töhëm mak i Aikup nyôngö inrē: nyangngö min nup tafūyu tö nup kunyôkö rōi kiyôp.

⁷Nup tingūyö i taseū kui ap Nā-il, i kui Nā-il, ṙòkhöre inrē nup töteūichtu nö i kui Nā-il, nö nyangngö min, ahōṙiyö, öt ōtren inrē.

⁸Harāmöre min inrē yip kamëḵ kāḵ, ṙòkhöre cha-a inrē min yip kamvalhöinykūö nö el öp Nā-il nö haṙīvölōn, cha-a inrē min yip ṙamātö inhaṅl nö el nup mak nö cheingö.

⁹Hēk inrē cha-a yip töla-evṙen nö kūöt ta-īö cha-a inrē kumpāt tö-isoh hilā nö sirōngngörekūö.

¹⁰Panyëny min öp rööntö machööḵlö ò nö laköl, ṙòkhöre min cha-a yip töhaṙāyö nö la-evṙen nö haṙivö ellōn.

¹¹Kulō-ov takô-en yip kūön rācha aṅ Sō-an; inlahen töṙeūla öp inlēnö tö yip tölngö mikah aṅ in yip mahalēnö Fërō; sitih ṙô öi in Fërō, Chū-ö chin kūön tö-akahaṙa, kūön mā misī rācha?

¹²Isuh yip pökeh tö-akaha tarik? Yē höknyö ṙô cha nö ṙô-òv töngamuh nö in meh; hökngen cha inrē nö akahalōn töp chööḵnyö ngam Mā Tēv yip tömaṙôngö nö in Aikup.

¹³Kulō-ov yip nö ngaich kūön rācha aṅ Sō-an hachīlö yip kūön rācha aṅ Memfis; pô-òvkūö yip nö ngaich tö Aikup nö lō-ongkūö, cha-a ihong kūö sinkeukngö yip miyöngö ò.

¹⁴Ngaich an ngam Mā Tēv nö kalūöichtö ma-alaha ötlanöökö nö ellōn ò; pô-òvkūö yip nö ngaich tö Aikup nö lō-ongkūö i nup tökeuheūttöre la-en ò umuh, sā mihiyōi tarik tölatēvah nö kuvav.

¹⁵Ötrēhĕn min umuh i Aikup nö la-envö, tö la-en kui hēk lamrit, hēk rōi ta-ôkö hēk töng kahanyöre chōn.

¹⁶Ip sakāmö angū-ö min Aikup nöng sā kikānö; kichëyöre ap min pa-ekūö inrē tö inlākö kël ngam Mā Tēv yip tömaṙôngö ngam töhalākö tö ò nö i kui e.

¹⁷Ngaich min ngam panam Yūtā nö pinhe-eṅkūö Aikup, kö pa-ekūö min ip chūök e nö kakka, kūö ngam chööḵnyö ngam Mā Tēv yip tömaṙôngö, ngam chööḵnyö ò nö lā-al e.

¹⁸Ip sakāmö angū-ö min taneui nup elpanam im panam Aikup tö ṙôtö ëlô Kanā-an, ngaich chūöku ṙô nö im Mā Tēv yip tömaṙôngö. Hĕng ap min tökaheūkö nö ngam elpanam tinṙōlngö.

¹⁹Ip sakāmö angū-ö min umuh hĕng ap tahāklö ngam Mā Tēv ellōn ngam panam Aikup, hĕng ap machööḵlö inrē i kūöngö panam ngam Mā Tēv.

²⁰Ngaich angū-ö min nö mikahngö inmeukti inrē im Tēv yip tömaṙôngö im panam Aikup: pò cha min nö peuinyhökūö ngam Mā Tēv kūö yip töt mahakôlò, ngaich anga-aṅ min inrē nö tīntö mahayööken hĕng tak, hĕng tak inrē lamaklö, ngaich ṙānyen cha inrē min anga-aṅ.

²¹Ngaich ngam Mā Tēv nö akahaiṙen nö i Aikup, ngaich yip aṅ Aikup min inrē nö akahakūö tö ngam Mā Tēv ip sakāmö angū-ö; hôṅ, salām yip min nö kumtö tökētu inlām tökööl inrē, kilēḵngôre min inrē nö chūöku ṙô nö im Mā Tēv, ngaich hateungngö e min.

²²Hachökö Aikup min ngam Mā Tēv, hachök lë-en inrē; ngaich cha-a min nö havantöre nö im Mā Tēv, ngaich hōḵ min anga-aṅ nö vë-evkūö tö cha ngaich lë-en cha inrē.

²³Ip sakāmö angū-ö min hĕng öp tökiröng talöökö lamöknyö Aikup nö chuh Asiriā ngaich yih min Asiriā nö iyöng Aikup yip aṅ Aikup inrē nö i Asīriā; ngaich min yip aṅ Aikup nö salām nö hol yip aṅ Asīriā.

²⁴Ip sakāmö angū-ö min ang Israĕl nö linūöyö nö hol Aikup hol Asirīā inrē inkôlò nö ellōn ngih tumlat;

²⁵Pò ngam Mā Tēv yip tömaṙôngö nö hakôlò u, nö ngö ṙô, tarik chu tö kôlò man yēḵ Asiriā inrē vahīṙen në kuntī chu, amin chu inrē Israĕl.