Read Car_Nicobarese Isayā 21 Bible Online

Isayā 21 - Car_Nicobarese bible

Isayā 21

¹Ngam ṙô nö ip el tönyalnyi im mai. Sā ngam lamfeui kuföt lā lòhngö nö tafūni röön, löktö el tönyalnyi angū-ö nö yih, ṙeū-eung ip panam pinhe-eṅkūö.

²Vënyu an nö in chu ngam tömeūkö tökihngen; ngam tömichūḵ inlahen nö i vahīṙen re tītö michūḵṙen inlahen nö i la-en re, kil an ngam kamil, Kuṙòh, Ō Ēlām; kayīngtöre, Ō Mītiā ṙòkhöre nup tin-ūnen meh nö vītu tö chu nö ṙāngenre.

³Lökten nup el ulāvö chu nö tööḵngen tö miṙivlōn; keuheūtngöre vah chin tökūö nup tö salòklöng chanökö, sā sinlòkö chanökö ngòh kamyôḵ kikānö: chök takô chin ngaich lökten chin ötkô hang; ngangngökūö chin ngaich lökten chu ötkô meuk.

⁴Uhā-a nômö chin pinëṅka chin ngaich tö pinhë-eṅkūö: ngaich öp chinṙivtö harap öp lōn chu nö vītöre nö kinchëyöre chu.

⁵Halēn mīs cha-a, ṙātö amahati cha-a, nyā cha-a ka-eūt cha-a: chōholre, yī-ö kūön rācha, hacham ngam lanaklö.

⁶Tön ngö ṙô an ngam Mā tö chu, Kuṙòh, ṙātö tarik amahati; höknyö ṙô ò nö ve-eny öp maheuṅkre:

⁷Ngaich hē ò nö meuk töhĕng kiteūm kumyung, tötahôlu nö i uk kōra, hĕng kiteūm köttö hĕng kiteūm ūṅt, ngaich hangihtöre min anga-aṅ nö i tölngö chumkūöṙen re.

⁸Ṙô-òv ngaich anga-aṅ nö sā lāyön: Ō Mā, öt heumkenre chin sökhaka i kui ngam chūök chamônga tö sakāmö ngaich ūichhakṙen el urôhòre hĕng mitööm:

⁹Yĕh meuk, yih yin nö ngaich vē tarik kumyung, tahôlre aṅ i uk kōra tarik: Ngaich ngö ṙô anga-aṅ nö sapṙô chu, Fukngö ök nö ngaich Pēpilön, fukngö ök nö ngaich; ṙòkhöre inrē nuk insā nuk tēv ò nö laköl nö el tumlat.

¹⁰Ō Me-eṅ pumṙōngnyö ṙòng sāiny chu, minë sāiny inrē im ël patī chu: ap ahang chu ngaich ṙā-ang im Mā Tēv yip tömaṙôngö, ngam Tēv Israĕl, vënyu nö ngaich tö chu nö in yīö.

¹¹Ngam ṙô in Tūmah. Hĕng taka öp hamūken chu löknyö Sēir, Amahati tarik, sitih ang ngam hatööm? Amahati tarik, sitih ang ngam hatööm?

¹²Ngö ṙô ngaich ök amahati tarik, Ngaich an ngam peuheū nö yih, ngatī inrē ngam hatööm: Yē yīö min hòṅ hatöntöre, hatöntöre yī-ö: ngaich yih yī-ö hēk.

¹³Ngam ṙô in Arēpiā. El-inchōnngö Arēpiā yin min iyöng, Ō yī-ö tömūlö kinröönngö aṅ Tītān.

¹⁴Kētö mak cha-a nö in ò ngam töhaṙëhe nômö; ngaich yip aṅ öp panam Tīmā, nö höngkūö yip töpāngö nö kumtö nyā-aṅkūö.

¹⁵Pò cha nö falngöre tö nup sanët, nup sanët töhōknyu, ṙā-ang i nup linreny inrē tösōntu, ṙā-ang i tökalēḵ kinyūngö inrē.

¹⁶Pòn ngö ṙô ngam Mā nö in chu, I ël töhĕng samyeūheu, sā samyeūheu töhaṙāyö la-en, ngaich nup kanôlò Kītar min nö öt kô-òl kui:

¹⁷Öp chööḵṙen tum tak lumreny inrē, yip tökalēḵ tarik aṅ in yip kūön Kītar min nö öt ṙōl tit taka: pò ngam Mā Tēv ngam Tēv Israĕl, nö ṙô-òv tö e nö ngaich.