Read Car_Nicobarese Isayā 22 Bible Online

Isayā 22 - Car_Nicobarese bible

Isayā 22

¹Ngam ṙô ip achāṙö heūvö elmat. Asuh ap halöiny meh töngamuh tö yīö ṙòkhöre i kui patī?

²Ō me-eṅ tötööḵlö tö inyôṙö ṙô tö taṙōlaṙen tökiröng elpanam, töṙāmölōn kun elpanam? Öt kūö sanët yik töfëli aṅ in meh nö fëli, hö-ö yik nö rēhĕn nö i kinyūngö nö kapah.

³Ṙongngörit yik mahayöng nö falngöre nö ṙòkhöre nyëkö yik tö yik lumreny: ṙòkhöre yik tökôti nö in meh nö nyëkö, yik tömarô-òlkūö nö falngöre.

⁴Lökten chin ngö ṙô, Chingā-angkūöre tö chu, hòṅ kihīökkūö chin peuiny; ui pītnyöre haṙamlōn chu, tökūö inyëngen ngam kikānö kūön ök tarik chu.

⁵Tön sakāmö ötkanô-òṅ an, rinööntö kui inrē, kinlūöchöre el kui inrē, aṅ im Mā, ngam Mā Tēv yip tömaṙôngö, el öp achāṙö heūvö elmat; tinṙölngö nup kinlōngö, pineunyhökūö minë rôngö inrē.

⁶Kēkö chòk an Ēlam, holre tö inröl tarik aṅ uk kōra inrē tarik; ngaich an Kir inrē nö ṙòngngö inyul lanaklö.

⁷Ngaich ngö inlahen angū-ö min, tö nup achāṙö min tö-atöllöng nö tööḵlö tö nuk inröl, tö aṅ uk kōra tarik inrē nö hatöököre nö i uk u nö i kūö inkūp.

⁸Ngaich anga-aṅ nö kēngö öp innyatngö Yūtā. Ngaich me-eṅ ip sakāmö öm ngëichkö öp lanaklö vët inyut el ngam patī el inchōn.

⁹Ngaich yī-ö meuk manëngnyö kaha ngam elpanam Tāvit, nö ṙōl anū-ö: ngaich yī-ö hamūl nup mak öp lātaṙeū törūngö mak.

¹⁰Ngaich yī-ö inrē kaheuk nup patī i Yērusalem, tiṙölngö nup patī yī-ö ngaich öi hangëṅlö ngam kinlōngö.

¹¹Vī inchūökngö mak yī-ö inrē ihôi minë tönët kinlōngö nö chūök mak aṅ ngam hötṙeh törūngö mak: hö-ö pöri yī-ö ngëichken ò ngam tötī-iv tö e, öt rēhĕn yī-ö milēḵṙen tö ò ngam vamī-il e i tömisī.

¹²Im sakāmö angū-ö ngam Mā, ngam Mā Tēv yip tömaṙôngö, nö havëtö pineūinyö, miṙīvlōn inrē, nganānyö kui finūmṙat re inrē tö sāk hilā:

¹³Yĕh meuk ngaich, ṙanāmölōn kumchiklōn inrē, ṙinatnyö likeun kōiny nuā sīṅp inrē, kā alaha ngaich òk vāin inrē: tā-a töi nyā-aṅvkūö òk inrē, tön huṙöich in min kapah.

¹⁴Ngaich ngam Mā Tēv yip tömaṙôngö nö hameuktöre nö elnang chu, Kô ön min ngih ötlanöökö nö öt anhetlen nö ṙā-ang in yīö yē yīö öl kapah, ṙô ngam Mā Tēv, ngam Mā Tēv yip tömaṙôngö.

¹⁵Ngö ṙô an ngam Mā, ngam Mā Tēv yip tömaṙôngö, Kūṙòh, yihtöre man ip yōm chehehen in Sepna, öp yōm ngam patī, ngö ṙô,

¹⁶Asuh ap la-en meh ihih? Achīö ap in meh ihih inrē tö meh ngaich hulhöt anūlöre ihih? Hulhöt anūlö ò nö lātulöng, vīhöt chūök re inrē el ihong!

¹⁷Yĕh meuk, kalē-ĕti an min ngam Mā Tēv nö kavalngen meh nö sā tī tökalēḵ tarik; hôṅ, ngënö tī an min nö haṙūngö meh.

¹⁸Chuvilen meh an min kavallen meh inrē sā öp tökumul öm ël öp töpōiti panam; in e me-eṅ min kapah in e min inrē nup inröl nö kanôlò meh, me-eṅ sumrōngkūö ngam patī ngam Mā meh.

¹⁹Ngaich chū-ö min kuringngen meh ṙā-ang ip la-en meh, ṙā-ang öp chūök meh inrē öm tūöktu min tö ò lātaṙeū.

²⁰Ngaich ngö inlahen angū-ö min ip sakāmö angū-ö, tö chu min havëkö öp tarik re Ēliyākim töp kikōnyö kūön Hilkiyā:

²¹Ngaich chū-ö min hayūtan tö tökiröng inyūt, ngaich hangëken ò min tö ngam fanūm ṙat meh, ngaich kētö eltī ò chū-ö min tö ngam inyöngö meh: ngaich anga-aṅ min nö yöng vē aṅ Yērusalem, ip patī Yūtā inrē.

²²Ṙātö elranôṙö ò chū-ö min tö ngam tinkīök ngam patī Tāvit; ngaich löpnyökūö e min anga-aṅ, ngaich öt hĕng tak lamöptökūö; löptökūö e min anga-aṅ, ngaich öt hĕng tak lamöpnyökūö.

²³Ngaich chū-ö min haköpngen ò sā kīny nö ip tököp chūök ò; ngaich anga-aṅ min nö kantēra rācha nö tö-eū-eu nö i patī ap yöng ò.

²⁴Ngaich cha-a min nö eūmlen ò tö nup taṙòkhöre ineū-eu aṅ patī ap yöng ò, öp kūön lamöknyö in ò inrē, ṙòkhöre nup kun chūökṙen, löktökūö nup kōp chūökṙen, söl i nup kulah chūökṙen.

²⁵Ip sakāmö angū-ö, ṙô ngam Mā Tēv yip tömaṙôngö, öp kīny tököp nö ip tököp chūökö nö tahöököinykūö min; kūöltu min angū-ö nö ngaich, fukngö ngaich, ngaich ap lumngan öp mi-in e nö rökiṙen; pò e nö ṙô ngam Mā Tēv.