Read Car_Nicobarese Isayā 23 Bible Online

Isayā 23 - Car_Nicobarese bible

Isayā 23

¹Ngam ṙô in Tūrös. Ayôṙa yin, yī-ö chōng aṅ Tārsis; tön ngaich an nö piyāyi, lökten e nö ngaich nö öt aṅhaṅvkūö tö patī, öt lökhötvö: hameuktu an nö in cha nö ṙā-ang ip panam Saiprös.

²Ui halöinyköre, yī-ö i kūö mai panam; yī-ö töhatööḵlöngö tö yip mi-inyihkö chehen aṅ Sītōn, yip mahavāng nö lök el mai.

³I kui nup tökiröng mak inrē öp kulöl aṅ Sīhōr, ṙòng taneūich aṅ ap Nā-il, anū-ö rupīö taneūngen ò; chūök innyihkö chehen pumnāmö tarik an angū-ö inrē.

⁴Ō Sitōn, sirōngkūö man yĕh tön ṙô-òv an ngam mai nö ngaich, ngam tökalēḵ mai, nö ngö ṙô, Rö-ö chin paṙēlaṙen öt rēhĕn kayônyö, öt rēhĕn haruklö rēlö.

⁵Yē ngam ineūkö e nö yih nö i Aikup, pōihangen cha-a min nö halöinyöre tökūö ineūkö Tūrös.

⁶Havāngngöre yin i Tārsis; ayôṙa yī-ö aṅ ngam panam i kūö mai.

⁷Angū-ö öng ngih elpanam ṙanāmölōn yīö ngam tö-eūnyu i nup sakāmö misī ngam tö kalröönu tö nup kameunngen ò nö chuh tömarô-òlkūö?

⁸Öm töchööḵnyu tö ngih lā-al Tūrös, ngam elpanam kamëtö sapīöv rācha, ngam tö mī-inyihkuvö chehen tö kūön rācha nup tösöömka tö yip töminā-aṅv aṅkūö ngih tumlat?

⁹Ngam Mā Tēv yip tömaṙôngö an töchööḵnyu tö e, nö hachōichngö inkeūlen nup kanôlò, pòn hòṅ kēten u nö nūöngö yip töminā-aṅv tarik ing tumlat.

¹⁰Lök im panam re man sā tinṙēchlö Nā-il, Ō me-eṅ kikānö kūön Tarsis: hö-ö man ngaich ōtren fanūmṙat.

¹¹Hateutnyö kël re an nö ngaich nö i kui ngam mai, ngaich an nö kiyin minë pūlngö: kētö chöngö an ngam Mā Tēv nö in Kanā-an, nö tiṙōlngö nup töngëḵ chūökö umuh.

¹²Ngö ṙô anga-aṅ, Uh man ngöhören ṙanāmölōn, Ō me-eṅ töhakihtuṙen rēlö kikānö kūön Sītōn; chōholre havāngngöre i Kitim; in e min me-eṅ pòrô sön öt haneūheuvö.

¹³Yĕh meuk ngam panam yip aṅ Kāltī; öt ōtre yin vē tarik; tī yip aṅ Asīriā an angū-ö nö vīten e nö el tönyalnyi chūök töṙeūla: vīlö chūök re cha-a nö chônga, tiṙölngö nuk patī rācha cha-a umuh; vīten e an nö payāiyi.

¹⁴Ayôṙa yin, yī-ö chōng aṅ Tarsis: pò ngam töngëḵ chūök yīö nö ngaich nö piyāyi.

¹⁵Ngaich ngö inlāhen angū-ö min ip sakāmö angū-ö, tö Tūrös min nö sat anāi samyeūheu nö vāchiṙen sā tūmö sakāmö ngòh töhĕng tak rācha: i kinheūṅten nup tösat anāi samyeūheu angū-ö min nö i Tūrös nöng sā tinkökö mi-inyihköre kikānö.

¹⁶Kē ngam hāp re man, kuṙòh havöt el ngam elpanam, me-eṅ mi-inyihköre kikānö öm tövāchiṙenl vāyô tikökṙôre, ṙōlö tinkökö, hòṅ meh fēkaṙen.

¹⁷Ngaich ngö inlahen angū-ö min unôichrit kinheūten nup tösat anāi samyeūheu, tö ngam Mā Tēv min nö chöhken Tūrös, ngaich anga-aṅ min nö havanten ò nö töhaṙāyö kikānö ngaich inyihköre anga-aṅ min nö i nup pūlngö ngih panam i kūö ngih tumlat.

¹⁸Ngaich nup chehen ò tö-inyihka nup inṙāyö ò inrē nö töhet min nö im Mā Tēv hö-ö min anū-ö nö halīniṙen nö sā töpōiṙāi: pò nup chehen ò tö inyihka min nö lumnööṙö cha yip mi-iyöng i kūö ngam Mā Tēv, nö kô-òngkūö nö nyā-aṅvkūö, hilā inrē nö tömarô-òl kui.