Read Car_Nicobarese Isayā 24 Bible Online

Isayā 24 - Car_Nicobarese bible

Isayā 24

¹Yĕh meuk, vīten ngam tumlat an ngam Mā Tēv nö öt aṅhaṅvkūö, vīten e inrē nö payāiyi, ane inrē havānglöp lātaṙeū alaha e nö lātulöng, ngaich inrē nö marôvat tī nö pirātngö yip aṅkūö e.

²Ngaich angū-ö min, sā e nö in yip tarik ngatī min nö in yip kūönṙô; sā e nö ip tarik alaha, ngatī min nö in öp yöngṙen ò kikōnyö; sā e nö in öp kikānö tarik alaha, ngatī nö in öp yöngṙen ò kikānö; sā e nö in öp mī-inyīha, sā e nö ip töhaṙūönghukūö; sā e nö in öp kamëḵ ṙāi inṙūöngkö rupīö, ngatī in öp kamëtö ṙāi inṙūöngkö rupīö nö in ò.

³Hatngö aṅkūö an min ngam tumlat, keuheūtngöre inrē nö öt hakôlöngṙô, pò ngih ṙô nö ṙô ngam Mā Tēv.

⁴Haṙivlōn ön ngih tumlat changāchiṙen inrē, cheingö ön ngih panam changāchiṙen inrē cheingö yip inrē tarik ngih tumlat lamātulöng.

⁵Chōichngöre inrē ngih tumlat nö el katòh yip aṅkūö e; pò cha nö köölö fālen nö i nup chöngö, haṙīngö töhachöngtuṙen filalngö ngam töt chanūhuvṙen kinlēḵngô.

⁶Lökten an ngam rinūtngen nö keuheūt nö mīktö ngam tumlat, ngaich cha-a inrē yip mi-iyöng in e nö kôti nö fāluṙen lökten yip aṅ ngam tumlat nö föngi, ngaich höng haroh tumtit taka tarik tö-ōtre.

⁷Haṙivlōn an ngam tufömngöre vāin, cheingö an ngam chōn vāin, ṙòkhöre yip töṙāmö ellōn nö sīklö unhômö.

⁸Ṙāngenre nup kumchikṙô tāpret sökngöre nup ṙënṙô cha yip töṙāmölōn, ṙāngö kumchikṙôre ngam hāp.

⁹Öt òk vāin yip min nö tikökṙôre; angū-öṅvö nup min tökalēḵ nö in cha yip amôkö u.

¹⁰Taṙöli an nö ngaich ngam elpanam tömëchiṙen: kö löphak kūö nuk patī, pòn sōtu tarik nö kuhēthötre.

¹¹Ṙënṙô ap umuh el nup talöökö kūö vāin; sangulköti nup ṙanāmölōn, chuhngöre nö ngaich nö el inkövö ṙanāmölōn ngam panam.

¹²Ṙā-ayö an nö ngaich, ngam elpanam nöng öt aṅhaṅvkūö, ngaich an ngam inkūp nö piyāyiyö.

¹³Pòn ngö inlahen min nö ellōn ngam tumlat in yip tarik nö sā tö kayīna ôliv chōn, sā angkūr nö chāpö hē el inmūlö ṙòng.

¹⁴Ngaich chā-a min nö hachônglôre, hū-a min cha-a; pò ngam minā-aṅ ngam Mā Tēv nö pōiti hinūka tö cha nö löktö el mai.

¹⁵Kūöyòh öi hapōilö ngam Mā Tēv lā chuhöt, ngam minë-eny ngam Mā Tēv ngam Tēv Israĕl, i nup panam i kūö mai.

¹⁶Löktökūö manā-angkūö ngam tumlat in hang tinkökö ineū-eu ngam tölöök. Ngö ṙô pöri chū-ö, Lëvngö chin chū-ö, lëvngö chin chū-ö, tötkôlò chin chū-ö më tömichūṙen chanökhutī, michūṙen chanökhutī nö ngaich; hôṅ, ngaich an ngam tömichūṙen chanökhutī nö michūṙen chanökhutī.

¹⁷I kui meh, pinhë-eṅkūö, anūlö, insuk inrē, Ō yī-ö aṅ ngih tumlat.

¹⁸Ngaich ngö inlahen angū-ö min, tö ò öp famalngöre tö pinhë-eṅkūöre tö ṙënṙô nö fuk el anūlö min; ngaich anga-aṅ öp mameutlö nö ṙā-ang el anūlö nö kētu nö el insuk: pò nup inkūp lökhöt kuföt nö luvë-akkūö nö lātulöng, ngaich nup rööntö ngih tumlat nö kalöka.

¹⁹Keuheūtngöre vah ngam tumlat nö payāyi keuheūtngöre ngam tumlat nö yëngö, kalē-ĕ inlöinyköre ngam tumlat.

²⁰Kahööka min ngam tumalt sā mihiyōi tarik, kalöka min inrē nö halöinyköre sā talīkö; ngaich i kui e min öp tökööl fālen nö langan, fukngö min ngaich angū-ö, ngaich öt hēk nö chōholre.

²¹Ngaich ngö inlahen min angū-ö ip sakāmö angū-ö, tö ngam Mā Tēv min nö sācha tī tö yip tömaṙôngö lātulöng, yip rācha ngih tumlat i kui ngih tumlat.

²²Ngaich cha-a min nö hamūlö, sā tökē-ĕ nö hamūlö nö el kinlōngö, ngaich öpikūö min nö el kinlōngö, ngaich unôichrit töṙōl sumkam min cha-a nö kētu sācha.

²³Ngaich ngam chingëṅt min nö kalūöchöre elkui, sirōngkūö inrē ngam tavūöi pò ngam Mā Tēv yip tömaṙôngö min nö hayöng nö i kui rung Sīyôn, i Yerūsalem inrē, nö i kūö yik mā misī ò nö i minā-aṅre.