Read Car_Nicobarese Isayā 25 Bible Online

Isayā 25 - Car_Nicobarese bible

Isayā 25

¹Ō Mā Tēv, me-eṅ man Tēv chu, hapōilen meh chin, ha-öiny ngam mine-eny meh chin min; pò meh ngaich tītö pingangkūö, tö inlēnö ik misī i kanô-en, i tökô-en inrē.

²Pò meh ngaich vīten öp elpanam nö fônghaka; ap tölaklöngö elpanam nö payāyi: patī rācha aṅ tahëng ngaich nö rö-ö nö elpanam; öt hētuvö ap min nö vīlöngö.

³Lökten yip min tökalēḵ nö hapōilen meh, pa-ekūö min tö meh öp elpanam yip pumnāmö tarik töpahë-evö.

⁴Pò meh ngaich töngëḵ öm chūök töhāṅten hē el kanihngen ò, innyatlö hē el chanôchö panam, nyatkui hē el ṙanāchö, hē öp töpahë-evö nö sā chanôich panam nö fohtöre nö i kaha patī.

⁵Sā öp ṙanāchö i tönyôḵṙökūö chūök tī meh min öm kētö nup ṙënṙô aṅ tahëng; sā ngam ṙanāchö nö innyat ngam taṙul, ngam tinkökö yip töpahë-evö min nö tumṙeūtu.

⁶Ngaich i kui ngih rôngö min ngam Mā Tēv yip tömaṙôngö nö vītö nyā-aṅkūö yip tarik tö tösangööṙö alaha, tökiröng inôḵö vāin, i kui nuk kintū-ö rit, tösangöö alaha tööḵlö tösangöö eltangëḵ, nup vāin i kui kintū-örit nö tö halööktitvö.

⁷Ngaich anga-aṅ min nö i kui ngih rôngö nö piyāingö öp innyatngö tökahultu nö i kui yip tarik, öp kinṙulkui inrē tö kahultu nö i kui yip tarik, öp kinṙulkui inrē töhanyāknyu nö i kui taṙòkhöre pumnāmö tarik.

⁸Ngaich an nö keuheūt nö ngeūṅktö ngam kinpaha nö urāngen; ngam Mā Tēv inrē min nö chūtngö mak mat nö ṙā-ang i kūö taṙòkhöre ngam minṙēngö yip tarik ò min inrē nö kē-ĕyö tö ò ṙā-ang i kūö në tumlat; pò e nö ṙô ngam Mā Tēv.

⁹Ngaich min öp ṙô ip sakāmö angū-ö nö ngö, Yĕh meuk, anga-aṅ ön ngòh Tēv hī; höng hamökken ò in, anga-aṅ an min inrē mahayööken hī: anga-aṅ ngòh Mā Tēv; höng hamökken ò in, ṙāmölōn in min ngaich haṙamlōnre im inyööken aṅ in ò.

¹⁰Pòn i kui ngih rôngö min öp kël ngam Mā Tēv nö töönglöre, ngaich Mô-āp min nö rööntukui nö im chūökre, sā rinööntökui afō nö el öp mak ip rung chūök sôḵ nuā.

¹¹Ngaich anga-aṅ min nö hateutnyö kël re nö ellōn e, sā öp yamöö nö hateutnyö kël re nö yöö: ngaich anga-aṅ min nö tumṙeūtö öp inkeūlen ò tö nup vahīṙen kuntī ò inrē.

¹²Ngaich ngam chūök kumyung ip lātulöng chūök kumyung i minë kinlōngö meh tumṙeūtu anū-ö ngaich tö ò, piṙāpi, haṙongtu nö i kui tumlat inrē, nö el ngam tumlat.