Read Car_Nicobarese Isayā 26 Bible Online

Isayā 26 - Car_Nicobarese bible

Isayā 26

¹Ip sakāmö angū-ö min nö tikökö ngih tinkökö nö im panam Yūtā: Elpanāmu in tö töngëḵ; vīlö ngam inyööken an min nö kinlōngö inrahkūö inrē.

²Löpnyökūö minë inkūp yin, hòṅ yip tölöök pumnāmö tarik yip tököptī tö kanô-en nö kuhēthötre.

³Haköpö ò man min nö i kumchikṙen takô, öp tököpngö ellōn nö in meh: pò ò nö hayönglenre nö in meh.

⁴Hayönglenre yin im Mā Tēv örheūheu: pò ngam Mā Tēv Yāvē nö ihong töt chanūhuvṙen.

⁵Pò ò nö ngaich nö kēten cha nö lātaṙeū yip mi-iyöng lātulöng, im lātulöng elpanam: lātaṙeū tī an nö ṙātö e nö i kui tumlat; kēten e an nö i kui tumlat.

⁶Rööntu kui min angū-ö tö elröön; tö elröön yip yāich, vanāngö yip töhāṅten inrē.

⁷Tölöök an ngam talöökö töchiplen: ngaich me-eṅ töchiplen hachōtö talöökö yip tölöök.

⁸Hôṅ, im talöökö minë inkaha fālen aṅ in meh, Ō Mā Tēv, höng hamökken meh in; ngam minë-eny meh tö ngam inköpkölōn tö meh angū-ö an lōn ngih nômö ih.

⁹Holtö ellōnre chin hòṅ īnu tö meh tö el hatööm; hôṅ, hol töp ma-alahare chin nö in chu öi ka-euilökūö chöhöh meh, pò ngam inkaha fālen aṅ in meh yē e nö el tumlat ngaich yip aṅkūö ngih panam nö haköp lanöökö.

¹⁰Hameuktö miṙēlōn yēḵ im tötlöök, ngaich sön min anga-aṅ nö öt haköp lanöökö; i panam ngam tötchiplen min anga-aṅ nö vāchö tī, ngaich öt meuk ngam minā-aṅ ngam Mā Tēv.

¹¹Mā Tēv chônghaka an ngam kël meh, sönngenre cha-a nö öt meuk: meuk ngam kumlēḵlōn meh pöri min cha-a nö in yip tarik, ngaich sirōngngöre kūö; hôṅ, ṙāpngö kūö an min ngam tameūyö tö yip lā-al meh.

¹²Mā Tēv vītö lanāmö man min in ih: pò meh ngaich inrē la-evṙen tö nup la-en ih öm ṙënngen ih.

¹³Ō Mā Tēv, Tēv ih, hayöngö in tö tahëng mā nö hol meh; höng in meh pöri īhö min kakkö ngam minë-eny meh.

¹⁴Kapah yip tökapah, öt aṅ yip min, kapah yip nö ngaich öt chōholre min lökten man chöhken cha fëlngen cha inrē, vīten öp kanöpölōn tö cha nö chuhngöre.

¹⁵Ṙūölö ṙôken pumnāmö tarik man ngaich, Ō Mā Tēv ṙūölö ṙôken pumnāmö tarik man ngaich; ngaich man ineū-euvö: ngaich man ṙūönyö ṙôkti kūöngö ngam panam.

¹⁶Mā Tēv, ngëichken meh yin hē el kanihngen, kalē-ĕṙô yin nö vë-ekūötēv yē cha nö ṙònghöichṙen nyahaṅ nö chöken.

¹⁷Sā öp kikānö puyōsö, öp töröhten hē nö hòṅ kayôḵnö halöinyöre ngaich ayôkö sinlòklö chanököre; ngatī in īhö ngaich i kūö meh, Ō Mā Tēv.

¹⁸Piyōsö in īhö, ngaich in halöinyöre, ngaich pöri, īhö höng sā kamyôḵnyö kuföt; hō-ov in kayôḵnyuvö ing tumlat; ötrēhĕn yip aṅ ngam panam nö kūönngöre.

¹⁹Aṅ yip min tökapah nö in meh; chōholre ön min ngih tökapah alaha chu. Chōholre tikökṙôre yī-ö mi-iyöng el tumlat: pò öp tacham meh nö sā tacham nup kun chōn, ngaich ngam tumlat min nö kavallö yip tökapah.

²⁰Ta-ih, yī-ö tarik chu, kuhēthötre el minë urôhò yīö, ngaich öptökūö minë inkūp mahavīlen meh: rahëchtaṙen öm hayunngöre, hanöng saha chanuhu ngam lanīnö.

²¹Yĕh meuk, pò ngam Mā Tēv nö kunyī-inyre nö ṙā-ang el öp chūökre nö kētö sācha yip aṅkūö ngam tumlat tökūö tökööl fālen cha: hameuknyö mahāmre an min ngam tumlat inrē, ngaich rö-ö min nö kahulngö kui yip töfëli.