Read Car_Nicobarese Isayā 27 Bible Online

Isayā 27 - Car_Nicobarese bible

Isayā 27

¹Ip sakāmö angū-ö ngam Mā Tēv nö ip manā-anyre tökiröng töngëḵ inrē sanët nö hachök ngam Ṙēv ngam töveut pēch, ngam Ṙēv pēch tösalūöna; ngaich anga-aṅ min nö kapahatī tö ngam tulan el mai.

²Ip sakāmö angū-ö: hĕng öp panô-òṅ vāin, tikökhökūö e yin.

³Haköpkö e chin chū-ö Mā Tēvl kaheuk ṙētak chin min ṙösö e: hòṅ e nö öt hachökka tö yô-òv, aṅten e chin min tö hatööm sakāmö inrē.

⁴Öt in chu tanānyö; hōḵ nup öre töchökhu kaha kun chōn nö lā-al chu kiyung! Ngaich öre chū-ö öich lök i kui u, ngaich föngngö u öre chū-ö.

⁵Hēk inrē hökngen ò nö kiṙapkö ngam kumlēḵ chu hòṅ ò nö vī lanāmö nö in chu; hôṅ, hökngen ò nö vī lanāmö nö in chu.

⁶I nup sakāmö yamih min ang Yāköp nö ṙēhtöre, pöpnyöre kūö ṙòng min inrē Israĕl: ngaich hatöö-ölkūö ngih panam min cha-a tö ṙòng.

⁷Ngāichö vah tī ang tö ò nö fëlö cha yip famëlan? Hēk inrē kapahatī ang nö sā finëlngö cha yik töfëli tö ò?

⁸Ip kinlaha ṙôkö, hē meh tīnngörit ò, ngaich lā-al kūö ò me-eṅ; ngaich anga-aṅ nö kēngen ò nö aṅtī tö chanökhuṙenre ip sakāmö kuföt chuhöt.

⁹Lökten ön ngih min kanöölö fālen Yāköp nö ahetlöngö, angū-ö an tökôlò tī ngam kinëngö tökööl ò; hē ò nö vī nup ihong öp tahāklö nöng sā töpaṙöla ihong nup tösōngö ngaich laköli, hòn öt hēk nö asöklöngö Asērim tö ngam insā tēv tavūöi inrē.

¹⁰Pò ngam tölaklöng elpanam nö kapöyiṙen, ṙā-aiṙen nö öt elyöngö, sā el tönyalnyi: in e min nup kun nuā nö nyā-aṅvkūö, in e inrē nö ṙōlahaka, ngaich keuheūt tö nup pak umuh.

¹¹Ngaich yē nup pak umuh nö nyangngö, ngaich cha-a min nö likölngö u; yih min yip kikānö, ngaich föngtökūö u; pò cha nö tarik töt akahaṙa; lökten anga-aṅ öp vamī-i cha nö öt aheūkölōn min tö cha, anga-aṅ inrē öp vamī-i cha min nö öt hameuktö miṙēlōn nö in cha.

¹²Ngaich ngö inlahen min angū-ö ip sakāmö angū-ö, tö ngam Mā Tēv min nö pitōngnyö nup ṙòng nö ṙā-ang im tötaṙēchlöng Tahël i nup Kun Töhëm Mak i Aikup, ngaich yī-ö min hĕng hĕng tak inmūlö, Ō yī-ö kūön Israĕl.

¹³Ngaich ngö inlahen angū-ö min ip sakāmö angū-ö, tö öp yöng römpet min nö föönyukūö; ngaich kunyī-inyre min cha-a yip tö-öhngen nö rö-övö ip panam Asīriā, acha-a inrē yip tökavali nö ip panam Aikup; ngaich min cha-a nö salām ngam Mā Tēv nö i kui ngih töhet rôngö i Yerusalam.