Read Car_Nicobarese Isayā 29 Bible Online

Isayā 29 - Car_Nicobarese bible

Isayā 29

¹Mah Ariĕl Ariĕl, ngam elpanam chūök Tāvit nö iyöng! Ṙūöhtö kūö ngam samyeūheu yin töm tahëng samyeūheu, nup tökiröng nyinā-aṅ nö havīöl ritre nö yih:

²Ngaich möl chū-ö min hakihten Ariĕl, ngaich öp miṙivlōn min nö umuh inrāmöre inrē; ngaich angū-ö min nö in chu nöng sā Ariĕl.

³Ngaich chū-ö min iyöngtöre lā-al meh öich havīlen meh, ngaich vītö chūök kinyīngö meh nö aṅtö chūök kumyung, afônglö nup chūök kinyīnhö chin min in meh.

⁴Ngaich me-eṅ min tumṙeūtuvö, ngaich löknyö kui tumlat ṙô min öm ṙô-òv, ap vanë-eṅ meh min inrē nö löklö el tumlat; ngaich ap ṙô meh min nö sā ṙô öp tö ulòhten nö i ma-alaha, löklö kui tumlat ap vamë-eṅ kūö meh inrē min nö chëṅcha ṙô nö löklö el tumlat.

⁵Ngaich pöri min öp ṙôken yip lā-al meh nö sā töpahīöya tumlat, ṙôken yip töpahë-evö inrē nö sā uk nëlö nöng chaṙēviṙen: hôṅ, höng chalôkö ti ap min.

⁶Chöhka an min tö ngam Mā Tēv yip tömaṙôngö nö hol tö kunṙôkö, kumyeūnö inrē, töpōyen ṙënṙô inrē, holtö lamfeui kuföt chanôchö mai inrē, hanūkūö tameūyö inrē mahaṙāphanga.

⁷Lā-al Ariĕl min yip ṙôngö pumnāmö tarik nö kiyung, ṙòkhöre yip lā-al ò nö kiyung öp töngëḵ chūök ò inrē, ap mahakihten ò inrē min nöng sā heūvö, öp heūvö hatööm.

⁸Ngaich ngö inlahen angū-ö min hē öp tarik tökapahare nö heūv ngaich yĕh meuk, heūvöre anga-aṅ nö nyā; aṅhen pöri ngaich ap ellōn ò nöng öt aṅhāṅv: hēk inrē sā ap tarik töhaṙehe nômö nö heūv, ngaich yĕh meuk, òk anga-aṅ; aṅhen hë pöri, ngaich yĕh meuk takngö anga-aṅ, ngaich ap ellōn ò inrē nö yal tönyā-aṅkūö: ngatī min vē ṙôngö pumnāmö tarik nö ṙòkhöre, vē kumyung nö lā-al ngam rung Sīyôn.

⁹Sökngöre yin pingangkūö inrē; kumchikngenre yin öt meuk inrē: mihiyōi-aṅ yin, hö-ö pöri nö kūö vāin; kalöva yin, hö-ö pöri nö kūö tökalēḵ ka-eūt.

¹⁰Pò ngam Mā Tēv nö hōngtö kui yīö tö ngam ma-alaha tölapat inṙôhò ngaich inrē nö tilupngö mat yīö, tö yik pròfĕt, kahultu kui yin inrē, tö yip mameuk inrē.

¹¹Ngaich nup tömeūkö tö yīö nö vītöre nöng sā ṙô öp līpöre tö haköpikūö, öp tö kētu tö yip tarik nö ip töhĕng tak töhuveū-en nö kūich, nö ngö ṙô, Vë-ekūö meh chin, vë-ekūö ngih man: ngaich ngö ṙô anga-aṅ, Ötkô chin, pò e nö haköpikūö.

¹²Kētu ngaich ngam līpöre nö in ò öp töt kamūich, ngö ṙô, Vë-ekūö meh chin, vë-ekūö ngih man: ngö ṙô ngaich anga-aṅ, Hö-ö chin chū-ö kamūich.

¹³Ngaich ngam Mā nö ngö ṙô. Pò vē tarik nö ṙuöhtöre nö in chu, ngaich cha-a nöng elvāngre i minuh cha inrē nö milēḵṙen tö chu, kēngöp ellōn re pöri cha-a nö marôvat tö chu, ngaich ngam pinhe-eṅkūö cha tö chu nöng chöngö tarik nöng inköptö cha:

¹⁴Lökten, yĕh meuk hòṅ iṙūhen chin vī unṙëhe la-en in vē tarik, öp unṙëhe la-en pinngangkūö inrē ngaich payāyi min öp mikah cha yip tö-akaha tarik, hayūni min inrē öp mikah elmat nö in yip tö-akaha tarik cha.

¹⁵Tötkôlò yip cha-a yip chamöh tö-aṙū-uti nö hayunngö öp inlēnö aṅ im Mā Tēv, el sinngūlö inrē nuk vahīṙen cha, ngaich ngö ṙô cha-a, Chiāp mameūkö hī? Chīāp inrē tö-akahakūö tö hī?

¹⁶Yī-ö mahavāngtö öp lātulöng alaha nup chehen nö lātaṙeū kaheuktu öp min vamī tanīönyö nö tilin; tö lökten ngam tövī-i min nö ngö ṙô tö ò ngam vamī-i e, Öt vī-i chu an; hēk inrē ngam tövī-i nö ngö ṙô tö ò ngam vamī-i e, Höng öt akaha an?

¹⁷Röh öng nöng rahëchtöreṙen, ngaich Lëpenön min nö vītu nö taṙeū tömiṙònglö; ngaich kaheuktu min ngam taṙeū tö miṙònglö nö el chūöl chōn.

¹⁸Ip sakāmö angū-ö yip töt hang min nö hang në ṙô ngam līpöre; nup mat yip töt meuk inrē min nö meuk; nö löknyö el öp tönyatngö löknyö el sinngūlö inrē.

¹⁹Yip yāich inrē min nö ṙūölöre ṙanāmölōn nö im Mā Tēv, yip yāich inrē min in vē tarik nö ṙāmölōn nö im Töhĕng Töhet in vē Israĕl.

²⁰Pò ngam pinhe-eṅkūö min nö vītu nö rö-öv, ngam mumnônhanga inrē nö ṙāngenre, ngaich ṙòkhöre cha-a inrē yip hamökkö ötlanöökö nö rökiṙen yip vamīten tarik nö töfāluṙen nö ip chööḵnyi, ngaich ṙātö tinngöp ò öp vamë-a nö i kūö inkūp, ngaich hakānngökūö yip tölöök nö ip töng rö-ö.

²¹Lökten an ngam Mā Tēv nö ngö ṙô, ngam ṙamānyen Aprahām tö inlahen ngam patī Yāköp: Öt sirōngkūö an min Yāköp töngamuh, öt rēhĕn öp kūö ò min töngamuh nö lunyīngöre.

²²Hē ò pöri nö meuk yip kūön re, nö ellōn ò, yip vahī në kuntī chu, cha-a yip min ma-ahetlö minënyö chu: hôṅ, ahetlö ngam Töhĕng Töhet yip min nö in Yāköp, söklöre inrē min cha-a nö ngāng alaha tö ngam Tēv Israĕl.

²³Cha-a inrē yip tölō-ongkūö ellōn min nö vītöre nö akahaṙa, cha-a inrē yip mu-uyë-a min nö haköp minkahten.