Read Car_Nicobarese Isayā 30 Bible Online

Isayā 30 - Car_Nicobarese bible

Isayā 30

¹Tötkôlò yin vē nyīö ma-ahôngen, ṙô ngam Mā Tēv, vē kamë inlēnö, hö-ö pöri nö ṙā-ang in chu; vē mahanyatngöre tö inyatngö, hö-ö pöri nö ngam aṅ in chu ma-alaha, pò cha nö hòṅ ṙūöhten ngam tökööl nö im tökööl.

²Yip kumröönngöre nö hòṅ chuh Aikup, hö-ö pöri nö havëtôre nö elvāng chu; nö hangë-eṅre cha-a nö i kumlēḵ Fërō, hayönglen re inrē nö elnyat Aikup.

³Lökten ap min kumlēḵ Fërō nö sinrōngkūö yīö, ap inyönglen inrē elnyat Aikup nö chinvīlö elkui yīö.

⁴Pò yip kūön rācha ò nö i Sō-an yip tanölöṙô ò inrē aṅ hôi nö yih nö i Hanes.

⁵Ṙòkhöre yip min nö sirōngkūö tö yip tarik tötkô nö kôlò tī tö cha, yip töt hamòlṙen ötrēhĕn nö kôlò tī, sinrōngkūö pöri minṙēngö inrē.

⁶Ngam ṙô ngam Tēv i nup töṙeūla Nēkĕp, Lökten impanam kanihngen chanökö inlöinyö inrē, löktö öp kan lāyön nö yih ap kōiny lāyön inrē, töp pēch inrē, tayuk nup kanôlò re cha-a nö i neūyö nup tö-ayal köttö, nup töpōi ṙai chehen cha inrē nö i uk ūṅt, nö chuh in yip tarik yip töthōḵ nö kôlò tī tö cha.

⁷Pò Aikup nöng chök alaha nö holṙen, öt taneungluṙen inrē: lökten chin kaheūkan nö Rāhap ap töt mahalöinyköre nöng ūichhaka.

⁸Yĕh pöichö kuṙòh, kūichö e i ikūö cha i mat öp tömitāk, kūichö e inrē i mat līpöre, hòṅ e nö töhēṙu yanīhih nö töng örheūheu.

⁹Pò vē tarik nö ma-ahôngen, nyīö tö minyôiny-aṅ, nyīö töt hòṅ hang chöngö ngam Mā Tēv:

¹⁰Vē tö ngö ṙô tö yip mameuk, Uh yin meuk; tö yip pròfĕt inrē uh in vënyu nang tö nup töchiplen, vë-ekūö ih tö nup töfaṙëcha ṙô, vë-eny minyôiny-aṅ:

¹¹Kānngöre yin töm talöökö, kānngöre töm kanröönö, viten ngam Töhĕng Töhet in Israĕl nö ṙā-ang re nö i kūö ih.

¹²Lökten an nö ngö ṙô ngam Töhĕng Töhet in Israĕl, Pò yīö ötkūöngen tö ngih ṙô, ngaich hayönglenre i inkihten öt lanöökö inrē, ngaich haköpngöre i kui u;

¹³Lökten ön ngih ötlanöökö min nö in yīö nö sā öp tömëngö töhòṅ fukngö, tikōlnyöre nö marô-òl chūök i kaha öp kinlōngö, öp tötaṙöli min nöng lūktenre.

¹⁴Ngaich anga-aṅ min nö sā tī öp vamī tanīöyö nö likukngö e, likukngö e nö kiṙöpiyö nö öt aṙēlöng nyaha; hòṅ e min nö öt hĕngtit linrākö tökôti nö tanôpnyö tameūyö nö ṙā-ang el tisum, hēk inrē ötkô nö fanòk mak nö el öp chūök mak.

¹⁵Pòn ngö ṙô ngam Mā Tēv, ngam Töhĕng Töhet in Israĕl, Yöölen yin min yĕi havan heuhtöre inrē; im höng nganöhö an ngam kumlēḵ yīö im inyönglen inrē: ngaich yī-ö sōḵ.

¹⁶Ngö ṙô pöri yī-ö, Hö-ö, pò ih hòṅ falngöre i uk kōra; lökten yin min falngöre: ane inrē, I uk nup töveut in min; lökten yip min lamū-u yīö nö töveut.

¹⁷I kanësô öp töhĕng tak min nö falngöre yip töhĕng köiny; i kanësô yip tötaneui tak min yī-ö falngöre: hanöng saha yīö min ötōtren höng sā kanāmö i kui ngam rôngö, sā pantēra inrē i kui ngam rung.

¹⁸Lökten an min ngam Mā Tēv nö höktöre, pò ò nö hòṅ aṙē-ĕlōn tö yīö, lökten ò min inrē nö hapōilöngö, pòn hòṅ aheūkölōn tö yīö: pò ngam Mā Tēv nö Tēv inkaha fālen; tökôlò yip cha-a yip hamökken ò.

¹⁹Pò yip tarik min nö iyöng Sīyôn nö i Yērsalem: hö-ö min me-eṅ ngaich ngöhöre ṙô peuiny; kô-en ap min nö aṙē-ĕlōn tö ṙô meh peuiny; yē ò min nö hang, sapṙô meh min anga-aṅ.

²⁰Pòrô ngam Mā nö kē-ĕkūö meh tö nyā-aṅkūö inkihten mak inkihten inrē, sön min yip mahaköpten meh nö öt hanyāti nö hēk, kôta mat pöri min me-eṅ meuk yip Mahaköptöre.

²¹Minë elnang meh min inrē nö hang ap ṙô lā-uk meh, nö ngö ṙô, Ngih ön talöökö lök in e yin, yē yīö kān lāhāmö, yē yīö inrē kān lātavē.

²²Ngaich yī-ö min hachōichngö kaha nup rupīö töka-īpö insātēv meh ane inrē nup töhaṙungtu ip töhaṙöichö humlum insātēv meh: kavalngö u min me-eṅ nö sā sin-òkkūö: ngaich ngö ṙô min me-eṅ tö ò, Kē-ĕngre man ṙā-ang hih.

²³Ngaich anga-aṅ min nö kētö kumṙah kulöl meh, hòṅ meh aṅtī tö u teūich ngam tumlat: nya-aṅkūö inrē nup tösīöplöre ṙôken nö el ngam tumlat kôlò min angū-ö pōyen aṅkūö inrē: ip sakāmö angū-ö nup nuā meh min nö pōiti chūök nö nyā-aṅvkūö.

²⁴Ngatī inrē nup kōiny nuā tö nup tö-ayal köttö kumköh ngam tumlat nö nyā tökuchik tönyô kiyôp, nup tö-ahetlöngö tö sanël tumlat haneui inrē.

²⁵Ngaich kö aṅhaṅv kui min tömarô-òl kui rôngö, tömarô-òl kui rung inrē, tahël kun töhëm mak inrē, ip sakāmö tökiröng finëlhanga, hē nup chūök chamônga nö fukngö.

²⁶Hēk inrē ngam yanāngö ngam chingëṅt min nö sā yanāngö ngam tavūöi ane inrē ngam yanāngö ngam tavūöi min nö sat chap, sā yanāngö tösat sumkam, ip sakāmö hē ngam Mā Tēv nö haṙung pinlāngen yip tarikre, ngaich halanken nup kūö nyaha cha.

²⁷Yĕh meuk, yih an ngam minë-eny ngam Mā Tēv ṙā-ang tömarôvat, hūkūö nö holtö tanānyö ò, ane inrē im lul tökufëi nö tafūnlöngö: tööḵlö minuh an tö tanānyö, ngam litāk ò inrē sā töhūkūö tameūyö:

²⁸Ngam unhômö ò inrē sā öp tötaṙēchlöng töhëm mak, öp tösöllö nö i likeun, nö kichang vē pumnāmö tarik nö el kinchang sāiny öt inkôlò: inkāl elvāng inrē inlō-ongkūö nö el samā yip tarik.

²⁹Tinköku yin min sā re tö el hatööm yē öp tökiröng nyinā-aṅ nö ahetlöngö; ṙanāmu ellōn inrē sā öp töhĕng tak kumröönngöre töfanööṙu yamônlö nö i kui ngam rôngö ngam Mā Tēv im Ihong Israĕl.

³⁰Ngaich ngam Mā Tēv min nö vīten öp tölöök ṙô re nö hāngö, ngaich hameuktöre min nö ṙātö ngam këlre nö holtö lanīnöre nö tainy, öp tö hūṙökūö tameūyö inrē, nö larôka kūö, chanôich panam inrē, tökënngöre kumṙah inrē.

³¹Pòn kūö ṙô ngam Mā Tēv min yip aṅ Asīriā nö panyeny nö laköl, yip tö aṅtī tö chōn nö foh.

³²I tum höt kūö öp töhalēnlöng tinkung, öp famuk kui ò min tö tī ngam Mā Tēv kumrööntö tāpret, hārp inrē: ngam kinyīnga kinyūngö inrē min aṅtī ò nö kiyūngö cha.

³³Pòn tö misī-ilen Tôfet nö halēnlöng; hôṅ, halēnka an tökūö öp rācha; vī-i an tö ò nö aṙū-uti pōiti inrē: fônghaka nö umuh öp tameūyö pōyen ngòh inrē; öp unhômö ngam Mā Tēv nö sā nup töhëmlö töhūkūö Ihong, nö tōttökūö e.