Read Car_Nicobarese Isayā 31 Bible Online

Isayā 31 - Car_Nicobarese bible

Isayā 31

¹Tötkôlò yip cha-a yip chamuh Aikup nö lukkö holṙen re, chūökre inrē tö kōra; hayönglenre inrē nö i inröl, pò cha nö maṙôngö, i tarik aṅ uk kōra inrē, pò cha nö tökalēḵ; hö-ö pöri cha-a nö ngëichkö ngam Töhĕng Töhet in Israĕl, öt rēhĕn nö chöh ngam Mā Tēv!

²Akaha pöri min anga-aṅ inrē, kētö tötlöök inrē ngaich öt hēk min nö havanrit nup ṙô re: chōholre pöri min nö lā-al öp patī yip töla-evṙen tötlöök, lā-al cha inrē yip hamòlṙen cha nö la-evṙen tö öt lanöökö.

³Höng tarik yip aṅ Aikup, öt tēv; höng alaha nup kōra cha, öt ma-alaha: ngaich hē ngam Mā Tēv min nö hateutnyö kël re, nëtre taka cha-a min tö ngam hamòlṙen nö fukngö, ngaich anga-aṅ inrē min ngam töhōluṙen nö fukngö, ngaich ṙòkhöre cha-a min nö ötteunglen.

⁴Pòn ngö ṙô ngam Mā Tēv tö chu, Sā ngam kōiny lāyön nö siṙöp nyā-aṅkūöre tö ngam tökūöṅnö lāyön inrē, yĕn maṙôngö yip yōm pököre nö havëtu nö lā-al ò, öthō min anga-aṅ nö vöö tö ṙënṙô cha, öt rēhĕn nö heulngöre tökūö inyôṙö cha: ngatī min ngam Mā Tēv yip tömaṙôngö nö yih nö kiyung nö i kui ngam rung Sīyôn, i kui nup rung e inrē.

⁵Sā kinteūngö chehechōn, ngatī min ngam Mā Tēv yip tömaṙôngö nö laklen Yērusalem; lakhölö an min ṙānyö e inrē, havāngngöre min anga-aṅ ngaich haköpken e.

⁶Havantöre yin in ò ngam tö-ahôṙiṙen tö yīö, Ō yī-ö kūön Israĕl.

⁷Pòn ip sakāmö angū-ö cha-a min nö kö kavalngö nup rupīö insātēv ò, nup humlum inrē insātēv ò, nup vahīṙen minë kuntī yīö nö tökööl.

⁸Ngaich min yip aṅ Asiriā nö fukngö tökūö sanët, öt tī tarik; ngam sanët inrē, öt aṅ i tarik, tökeuheūtökūö min tö ò; ngaich falngöre min anga-aṅ nö ṙā-ang ikūö ngam sanët, ngaich yip ṙāl tarik ò min nö kamëtö masūl.

⁹Ngaich öp ihong ò min nö chaṙēvi tökūö pinhe-eṅkūö, yip kūön rācha ò min inrē nö vöö tö ngam minkahngö, ṙô ngam Mā Tēv, öp tö tameūyuvö töp i Sīyôn, i Yērusalem inrē öp chūökkūö tameūyö.