Read Car_Nicobarese Isayā 32 Bible Online

Isayā 32 - Car_Nicobarese bible

Isayā 32

¹Yĕh meuk, hĕng tak öp min rācha mahayöng nö i lanöökö, hayöng inrē yip kūön rācha nö i inkaha fālen.

²Ngaich min öp tarik nö sā chūök innyatlö tö kuföt, innyatlö inrē tö chanôchö panam; sā nup tahël mak i tönyôṙökūö chūökö, sā nyat öp tökiröng ihong ip tö cheingö panam.

³Ngaich nup mat cha yip mameuk min nö öt paṙeūma nup elnang cha inrē yip hamang min nö hang.

⁴Öp ellōn inrē tökurat min nö akaha elmat tö mikah, öp litāk yip tösiknyô min nö kaknyöre nö löökö ṙô.

⁵Öp tökulō-ov tarik min öt ngöhöre invëka nö tö-akaha, öt rēhĕn öp tö-akaha nö töt milip invëka min.

⁶Pò öp tökulō-ov tarik min nö ṙôtö kumlō-ov ngaich öp ellōn ò min nö vī öt lanöökö, harūnöre nö i inchōichngö, kaknyö tövaich inrē nö lā-al ngam Mā Tēv, nö ahatnyö aṅ ellōn ngam tökapahare, ngaich vīngen òk ngam töhaṙëhe nômö nö öt teunglen.

⁷Nup aṅtī ngam töt akaha inrē nö öt lanöökö: vī aṅtī re anga-aṅ tö tötlöök nö fëlngö ngam yāich nö aṅtī tö ṙô minyôiny-aṅ, nö pòrô ngam yāich nö chīpö ṙô.

⁸Ngam töt milip pöri vī talöökö nup töt milip; ngaich im öt milip min anga-aṅ nö iṙūöhen.

⁹Yī-ö kikānö töng kumchikngenre, chōholre yin, hang ṙô chu; yī-ö nyīö kikānö töt chumkūö-aṙen, kētö elnang re yin i ṙô chu.

¹⁰Pò nup sakāmö unôichrit töhĕng samyeūheu min nö tökihngen nö in yīö, yī-ö kikānö töt kūöngen re: pò öp panô-òṅ vāin min nö öt kôlò, öt yih min öp hē inmūlö.

¹¹Yī-ö kikānö töng kumchikngenre, kichëyöre yin; hakihtenre, yī-ö tötkūöngenre: luhngö hilā re yin, chumlal inrē ngaich fūmlö sāk i ṙat yīö.

¹²Pò cha min nö kōk elngòh re tökūö nup tökôlò panô-òṅ, kūö nup töṙônguvö inrē vāin.

¹³Pò ngam tumlat vē tarik chu min nö sīöplö aṅkūö tö töchökhu kaha kun chōn; hôṅ, i kui nup patī ṙanāmölōn nö ṙòkhöre im töṙāmölōn elpanam.

¹⁴Pò nup patī rācha min nö ṙā-ayö; öp elpanam min töpōyen aṅkūö nö ṙā-ayö min; ngam rung töm chūök chamônga inrē min nöng kinlūhu nöng örheūheu, chūök ṙanāmölōn nup hanchōn köttö chūök nup töṙeūla inrē nö nyā;

¹⁵Hanöng saha öp ma-alaha nö hōngtu nö i kui hī nö ṙā-ang lātulöng, ngam tönyalnyi inrē nö vītöre nö panô-òṅ tötööḵlö tö ṙòng, ane inrē ngam töpōi aṅ panô-òṅ nö kaheuktu nö elchūölchōn.

¹⁶Ngaich min öp inkaha fālen nö iyöng el tönyalnyi, ngaich ap lanöökö min nö köp nö el ap panô-òṅ töpōyen aṅ tö ṙòng.

¹⁷Lanāmö min öp la-en ngam lanöökö; ṙanëmen öp tī ngam lanöökö inyönglen inrē nöng örheūheu.

¹⁸Ngaich min vē tarik chu nö tölām nö aṅ panam, iyöng el töt kanyīcha chūökö inrē, i töchēvhak inrē chūök haneūheu.

¹⁹Ha-öinytu pöri min angū-ö ngam fanukngö ngam elchūölchōn; ngaich ngam elpanam min nö piṙāptukui.

²⁰Tökôlò yin yī-ö tameūich i taseū mak, samöömtö kalröön nuā köttö inrē.