Read Car_Nicobarese Isayā 33 Bible Online

Isayā 33 - Car_Nicobarese bible

Isayā 33

¹Tötkôlò man me-eṅ, me-eṅ kamil töt chehenre, ngaich rö-ö me-eṅ kīlö chehen; me-eṅ inrē tömichūḵ chanökhuṙen, ngaich cha-a nö öt michūḵ chanökhuṙen tī nö in meh! Yē meh ṙāngenre kil töt chehen re, ngaich kīlö min me-eṅ; yē meh keheūten michūḵ chanökhuṙen, ngaich cha-a nö in meh.

²Ō Mā Tēv aṙē-ĕlōn man yēḵ tö ih; ngaich in höng hökken meh: kaheuk peuheū man yēḵ öm kël cha, inyöölen ih inrē hē el kanihngen.

³Falngöre yip tarik i ṙënṙô öp tinṙōlen; parāti vē pumnāmö tarik i hē meh hachônglöre.

⁴Ngaich nup pôḵ meh min nö hamūlö sā tī nup kata-ëm nö hamūlö: sā röön hāyö cha-a min nö kumööi kui e.

⁵Hapōilöng an ngam Mā Tēv; pò ò nö iyöng lātulöng hatööḵlen Sīyôn an tö inkaha fālen lanöökö inrē.

⁶I nup hē meh min nö köp inyöölen nö pōyen, mikah, inkaha inrē: ngam pinhe-eṅkūö tö ngam Mā Tēv töpōi ṙāi nö chehen ò.

⁷Yĕh meuk, hū-a yin më töt pa-ekūö in ò nö lā-uk: kihīökkūö yin nö peuiny më tanölöṙô aṅ hôi nö vame-eny lanāmö.

⁸Piyāyi nup tökiröng talöökö, ṙā-ang röön re yip tarik kumröönköre: ngaich an nö filalngö ngam kinlēḵngô, öt kūöngen re an tö në elpanam, öt chumkūöṙen an tö tarik.

⁹Haṙivlōn an ngam panam öt kalē-en inrē: sirōngkūö an Lëpanön nyangngö inrē nö ngaich: sā elnyalnyi an Saròn; ngaich Pasān Kārmel inrē nö piṙōngngö nup rōi re.

¹⁰Ngaich chin hòṅ chōholre, ṙô ngam Mā Tēv; ngaich chin hòṅ hachônglöre; ngaich chin töngamuh hapōilöngö.

¹¹Hakūön tö uk nëlö yin min, kumṙen tö kaṙālö afō yin min: tameūyö ap unhômö yīö mahaṙāpngen yīö min.

¹²Ngaich min yip tarik nöng sā finöngö lanit: sā kinūöltö töchökhu kaha, nup töfönghötvö nö i kūö tameūyö.

¹³Hangihtöre, tö tī chu, yī-ö tömarôvat: yī-ö inrē töröhta, akahngen ngam kumlēḵ chu.

¹⁴Pa-ekūö yip tököölö fālen i Sīyôn; rötlö yip töt tēv tö kinchëyöre. Achīö öp in hī min mi-iyöng el kūö ngam tameūyö töṙāpngö kūö? Achīö ap in hī min mi-iyöng el ngam tötnyangngö hanūṙökūö?

¹⁵Ngòh tölöök röön nö kiröönngöre, tölöökö ṙô inrē; ngòh töt chumkūöṙen tö taneunglen lamökten i inkihten, ngòh fumlinynyö kël re nö i ṙinapkö raneushö minyôiny-aṅ, ngòh tumlupngö kūö mahām, meuichngö mat re inrē nö i nginëchkö tötlöök;

¹⁶Iyöng lātulöng min anga-aṅ: ap chūök lanaklö ò min tö nyahatī tö ihong: kētu nyā-aṅkūö min anga-aṅ; köp min nup mak ò.

¹⁷Meuk ap rācha min nup mat meh ip vanāyö: meuk öp töpōiti panam cha-a min.

¹⁸Piṙūtken pinhe-eṅkūö min ap ellōn meh: isuh ap kamūich, isuh ap kamlah lumngan masūl? Isuh ap kamheuṅk chūök chamônga?

¹⁹Öt meuk yip tötainy man min tarik, yip tarik lamöklö el kilööpre ṙô ötkô me-eṅ meūkö cha; yip tötohtöre ëlô lökten meh öt akaha elnang.

²⁰Ngëichtökui Sīyôn, ngam elpanam chūök tökiröng nyinā-aṅ: meūkö Yērusalem nup min mat meh nö chēvhakaṙen aṅkūö, rūkui töt kē-ĕyö min, öt teuklöng min inrē nup tösaptu chōn, öt rēhĕn nup tökuvaha nö latôki.

²¹Umuh pöri ngam Mā Tēv nö in hī nö ip minā-aṅre, ip chūökö töpōiti ël tahël kun töhëm mak inrē; ötkô nup kupòk tö kaneūtu nö in e min, öt rēhĕn nup chōng töt pinhë-eṅvkūö nö lök umuh.

²²Pò ngam Mā Tēv nö ma-akaha fālen hī, kamëtö chöngö hī ngam Mā Tēv, rācha hī an ngam Mā Tēv; anga-aṅ an min mahayööken hī.

²³Tayōla nup inröt kanāmö meh; ötkô nup nö hangëḵlö rööntö ngam kanāmö meh, öt nyāknyi tī min tö ngam intĕh: ngaich michöö-öyö nup töpōyen aṅ kinīlö; kē lumnööṙöre ngaich ngam tökaròk.

²⁴Öt ngö ṙô min yip aṅ panam, vahav chin: aṙēlöng tökööl min ngaich yip tarik mi-iyöng in e.