Read Car_Nicobarese Isayā 34 Bible Online

Isayā 34 - Car_Nicobarese bible

Isayā 34

¹Haröhtöre tā-ih, öi hang yī-ö pumnāmö tarik; hangihtöre inrē yī-ö tarik; hökngen ngih tumlat nö hang, nup tanöö-öl e inrē; ngam panam, nup chehen lamöklö in e inrē.

²Pò ngam Mā Tēv nö lanīnuvö nö in vē pumnāmö tarik nö ṙòkhöre, angëṅṙö tanānyö inrē nö in yip kumyung in cha: hatngö tī an min nö fëlngen cha, kēten cha an nö in öp famëlhanga:

³Kavāli min inrē yip töfëli in cha, veūklö min öp inngeūṅtö nup tökapah alaha cha, yëngö min inrē minë rôngö nö i nup mahām cha.

⁴Ngaich ṙòkhöre min nö ayëṙi nup aṅ ngam halīöngö, ngaich minë halīöngö min nö löömi sā chatrāi: ṙòkhöre nup aṅ u min inrē nö chaṙēvi, sā öp tönyīkngö rōi chōn inrē ip anychīr chōn.

⁵Pò ngam sanët nö töö-öngkūö nö òk nö el halīöngö: yĕh meuk, yônti an min nö i kui Ētöm, i kui yip tarik inrē törūtivah tö chu, nö im inkaha fālen.

⁶Tööḵngen an ngam sanët ngam Mā Tēv tö mahām, kiröng alaha an nö ngaich tökūö tösangöö holtö mahām kun pököre tökiröng pököre, holtö tö sangö el kilpong kūön sīṅp: pò ngam Mā Tēv nö kētö tökētu nö i Pòrah, i panam Ētöm inrē yip tö pōihangvah nö fëli.

⁷Peūtöre min nö hol cha nup hanchōn kōiny nuā, holtö nup kōiny inrē nup nuā; ngaich min ap panam cha nö hiyōi tökūö mahām nup pitung cha inrē nö sangööṙu nö kiröng alaha.

⁸Pò e nö sakāmö invahalvah aṅ im Mā Tēv, samyeūheu inṙënngen i kinīlö Siyôn.

⁹Ngaich nup kun töhëm mak min in e nö vīngöre nö paröm, nup tumlat e inrē nö ihong töhūkūö, ngaich min ap panam umuh nö vītöre nö paröm töhūkūö.

¹⁰Ötrēhĕn tö hatööm ötrēhĕn tö sakāmö min angū-ö nö hannyangngen kūö; ngaich min öp lul e nö öt heumköre nö kū-ötö lātulöng: ngaich angū-ö min nö öt aṅhaṅvkūö nö kaheuk tumköl chap; öt hĕng tak min lamök in e nöng örheūheu söl môkö.

¹¹Yōm e pöri min nup Peliken Pôrkupāin inrē; iyöng ël e min mingeūṅkö kavöö inrē: ngaich anga-aṅ min nö hateut öp tökuvaha kinlūöich elkui nö i kui e, öp ihong inrē töng öt aṅhaṅv alaha.

¹²Havëkö yip mā min cha-a aṅ kūö ngam pūlngö, öt hĕng tak pöri min umuh; ṙòkhöre min yip kūön rācha min nöng törö-övö.

¹³Sīöplö min inrē nup töchökhu nö ël nup patī rācha ò, nup töchökhu rōi inrē nö el nup chūök kumyung; ngaich angū-ö min nö elyöngö am aṅ el inchōn, chūök nup Ôsrich.

¹⁴Ngaich min nup hanchōn töṙeūla el tönyalnyi nö meuk kūö re tö nup am aṅ el inchōn, nup kōiny pököre inrē nö mëkö öp holre; hôṅ, iyöng in e min öp tökiröng chehechōn mahavöt hatööm, ngaich kôtökūö min tö chūök re nö heūheure.

¹⁵In e min öp mingeūkö nö vīlö uhum re, ṙōlhaka ngaich, yum uhöö inrē hamūlö u inrē nö el nyat ò: hôṅ, in e min nup matēṙö nö hamūlöre, kö hol tö pīhöre.

¹⁶Chöh aṅmat ngam līpöre ngam Mā Tēv yin, vë-ekūö e ngaich: öt hĕng hang min tö në törö-övö; öt hĕng nòng min töhòṅ pīhövö: pò ngam elvāng chu nö chöngu nö ngaich tö e, hamūlö cha inrē öp ma-alaha aṅ in ò.

¹⁷Ngaich anga-aṅ inrē nö kalah taneūngen tökūö cha, ngaich öp kël ò nö michöö-öng e nö in cha nö aṅtī tö tökuvaha: ngaich cha-a min nö örheūheu nö amīnutö e, iyöng in e min cha-a nö kaheuk tumköl chap.