Read Car_Nicobarese Isayā 36 Bible Online

Isayā 36 - Car_Nicobarese bible

Isayā 36

¹Ngaich ngö inlahen angū-ö ik finën sīön samyeūheu ök rācha Hēsikiā ang Senakarip rācha aṅ Asīria yih nö lā-al nup tökinlōngu elpanam i Yūtā, ngaich kē-ĕ u.

²Tīnten Rapsakē öp rācha aṅ Asīria nö i Yērusalem nö in ök rācha Hēsikiā nö holtö töpōyen kumyung nö ṙā-ang Lakis söklöre ngaich anga-aṅ nö ranghö ök inchūökngö mak ip lātulöng mak törūngö el ap talöökö samöich hilā elkahôyö.

³Ngaich yihtöre ang Ēliyakim ök kikōnyö kūön Hilkiā, ök yōm patī, Sipnah inrē ök kamūich, Yô-ah inrē ök kikōnyö kūön Asaf yōm kinūichö töhaköpiṙen.

⁴Ngaich ngö ṙô Rapsakē tö cha, Ngö ṙô yin tö Hēsikiā, Ngö ṙô tökiröng rācha ap rācha aṅ Asīria, Asuh öng ngih nyanatlö ngam chūök meh öm hayönglenre?

⁵Ngö ṙô chin tö meh, chanök alaha nun minë ṙô meh halēn ngam kumlēḵ meh inrē im kinyūngö: in chīöm töngamuh hayönglenre, töp lökten meh ahôngen chu öm lā-al chu?

⁶Yĕh meuk hayönglenre man i ngòh tinkung ngòh tökaṙöp tafūyu, anga-aṅ ngòh Aikup; ngam chūök ngòh tarik nö harônlöre ngaich angū-ö min nö lòk eltī ò, ngaich tafūni angū-ö, ngatī an Fërō ngòh rācha aṅ Aikup nö in vē mahayönglenre nö in ò.

⁷Yē yīö pöri ngö ṙô tö chu, Hayönglenre in im Mā Tēv ngam Tēv ih: röh ang nö anga-aṅ, ngam töchūöku tö minë lātulöng ngam tö tahāklu inrē tö nup tökē-ĕyö tö Hēsikiā, ngaich ngö ṙô tö Yūtā Yērusalem inrē. I kūö ngih tahāklö yin min salām?

⁸Yĕh lökten, vë-ekūö meh chin, kilēḵngôre yin in öp mā chu öp rācha aṅ Asīria, ngaich chū-ö min kē-ĕkūö yīö tö kōra nët köiny, yē yīö kô kahngenre ha-ūichlö aṅ uk u.

⁹Sitih kanô-òṅ ṙöng öi hĕng tak havöökūö tö yöngṙen kumyung öp manā-angkūö ṙôngòng nö in yip tarik öp mā chu, ngaich hayönglenre yī-ö i nup inröl Aikup in yip tarik inrē aṅ uk kōra?

¹⁰Yih öichu öich öt holṙen tö ngam Mā Tēv öich lā-al ngih panam öich tiṙōlngö e? Ngö ṙô An ngam Mā Tēv tö chu, Kuṙòh kiröönngöre man lā-al ngih panam, tiṙōlngö e inrē.

¹¹Ngaich ngö ṙô Ēliakim, Sipnah, Yôah inrē tö Rapsakē; Vë-ekūö meh in, vë-ekūö vē tarik re man i ëlô aṅ Sīriā, möl ihö akaha elnang tö e um ṙôtö ëlô Yahūti vë-ekūö ih, öm elnang vē tarik mi-ī kui ngam kinlōngö.

¹²Ngö ṙô pöri Rapsakē, Röh öp mā chu nö tīnten chu nö ip mā yīö, in yīö inrē, öich ṙônyö në ṙô? Röh ap nö tīnten chu nö in më tarik amūichhak nö i kui kinlōngö, nö nyā sôḵ re, òk hakön re inrē nö holkūö yīö?

¹³Söklöre ngaich Rapsakē, ngaich pōitô nö hū-a nö i ëlô Yahūti, nö ngö ṙô, Hang në ṙô öp rācha yin tökiröng, öp rācha aṅ Asīria:

¹⁴Ngö ṙô ap rācha, Uh yin hachīlö tö Hēsikiā; tön ötkô ap nö ṙānyen yīö:

¹⁵Un rēhĕn Hēsikiā nö tölṙô yīö hayönglenre im Mā Tēv, nö ngö ṙô, Öthō an ngam Mā Tēv nö öt ṙānyen hī; öthō ön ngih elpanam min nö kētu nö eltī öp rācha aṅ Asīria.

¹⁶Un hāngö ṙô Hēsikīa: tön ngö ṙô an ngam rācha aṅ Asīria, Vī lanāmö yin in chu, kunyī-inyre inrē öi in chu; kö nyā-aṅvkūö inrē tö ṙòng anychīr re, kö òk aṅ chūök makre inrē:

¹⁷Hanöng saha yanihih chu öich kēngen yīö ip panam tö sā panam yīö panam sāiny vāin inrē, panam rôti panô-òṅ vāin inrē.

¹⁸Höngöre hòṅ Hēsikiā nö öt līpö yīö, nö ngö ṙô, Ṙānyen hī an min ngam Mā Tēv. Tēvu hòng aṅ i yip tēv pumnāmö tarik ṙamā-any panam re nö ṙā-ang eltī öp rācha aṅ Asīria?

¹⁹Isuh yip tēv aṅ Hamat aṅ Arpat inrē? Isuh yip tēv aṅ Sēfarvēm? Ṙānyu ap Samariā tö cha nö ṙā-ang eltī chu?

²⁰Asuh yip cha-a nö tēv në panam, nö ṙāmānyö në panam nö ṙā-ang eltī chu, tö ngam Mā Tēv min nö tökô nö ṙānyen Yērusalem nö ṙā-ang eltī chu?

²¹Ngaich pöri cha-a nöng öt ṙô-òvö, öt hĕng höiny milôhò inrē nö sapṙô ò; pòn ngö ngam chöngö ngam rācha un sāpöṙô apa.

²²Ngaich yih ang Ēliakim ök kikōnyö kūön Hilkia, ök yōm patī, Sipnah inrē ök kamūich, Yôah inrē ök kikōnyö kūön Asaf ök kamūich töhaköpiṙen nö in Hēsikia nö inyut tö töng takaich, ngaich vë-enynang ò tö nup ṙô Rapsakē.