Read Car_Nicobarese Isayā 38 Bible Online

Isayā 38 - Car_Nicobarese bible

Isayā 38

¹Hē nuk sakāmö anū-ö ang Hēsikia nö vahavö nö hòṅ kapah, yihtöre ngaich ök pròfĕt Isayā ök kikōnyö kūön Amôs, nö in ò, ngaich ngö ṙô tö ò, Ngö ṙô an ngam Mā Tēv, Halēnngen ngam patī re man; tön kapah man min, öt aṅ.

²Havööngökūöre ngaich Hēsikia nö i kaha patī, ngaich vë-ekūö ngam Mā Tēv,

³Nö ngö ṙô, Vë-ekūö meh chin Ō Mā Tēv, köpölōn tö inlaha chu ngaich lök i kūö meh i kanô-en holtö töteung ellōn inrē, ngaich Hēsikia nö peuiny.

⁴Ngaich yih ngam ṙô ngam Mā Tēv nö in Isayā, nö ngö ṙô,

⁵Kuṙòh, ngö ṙô man tö Hēsikia, Ngö ṙô an ngam Mā Tēv, ngam Tēv ök yöng meh Tāvit, Ngaich chin hang ṙô meh vë-ekūötēv, ngaich öich meuk nuk mak mat meh: yĕh meuk, taneui sīön samyeūheu tī chin ṙūöten në sakāmö meh.

⁶Ṙānyen meh chin inrē tö ngih elpanam ṙā-ang eltī öp rācha aṅ Asīriā: laklö ngih elpanam chin min inrē.

⁷Ngih ön min minkahngö nö in meh aṅ im Mā Tēv, tö ngam Mā Tēv min nö la-evṙen tö ngih ṙô ò;

⁸Yĕh meuk, vīten ngam nyat chin min i kui minë vanāngö meh, ngam tö ngaich nö lataṙeū tö vanāngö Ahas nö im tavūöi, nö heūlrit re nö söm vanāng, lökten ngam tavūöi nö söm vanāng nö heūlrit re nö im vanāngö ò sin nö kū-ötö lataṙeū.

⁹Tökūichö ön ngih tö Hēsikia rācha aṅ Yūtā, hē ò nö vahavö, ngaich lööken nö hēk tök invah re:

¹⁰Ngö ṙô chin, I saha ranòngti nuk sakāmö chu ngaich chū-ö min chuh kūö inkūp Anūlö; ngaich chin haṙöömiṙen tö chööḵ nuk samyeūheu re.

¹¹Ngö ṙô chin, Hö-ö chin min meuk kūö ngam Mā Tēv, Anga-aṅ ngam Mā Tēv, i panam tö-aṅ; Hö-ö chin min ōtre mat meuk tarik öich in yip aṅ ngam panam.

¹²Ṙūöhöyö an ngam ṙētö chu, kē-ĕyö an inrē nö ṙā-ang in chu sā rūkui yōm pököre: lömngö ngam nômö re chin ngaich sā tī kumpāt hilā; rökiṙen chin min tö ò ṙā-ang im chūöktī kumpāt hilā: löktökūö ngih sakāmö i ngih hatööm min me-eṅ keuheūtö tī tö chu.

¹³Söllö peuheū chin hachēvngenre; sā lāyön, lökten anga-aṅ ngaich nö likölngö në tangëḵ chu: löktökūö ngih sakāmö i ngih hatööm me-eṅ min keuheūtngen chu.

¹⁴Sā öp tömarô-òl likeun chehechōn, ngatī tinkākö ṙô chū-ö; sā miṙivlōn pumpa chin: öt meuk në mat chu nö ngëichkö lātulöng; Ō Mā Tēv; taṙamtöre chin, me-eṅ man yēḵ chūök inköpngö chu.

¹⁵Sitih ṙô öich min? Hĕnghöre ṙô-òv an nö in chu ngaich tī tö e inrē: hòṅ haṙēmngö röönre chin kiröönngöre i tūmö në samyeūheu chu kūö ṙôkö miṙivlōn chu.

¹⁶Ō Mā lökten i në yin vē tarik nö aṅ, keuheūthötre inrē ngam nômö nö im ma-alaha chu: lökten man yēḵ havānö chu, vīten chu inrē aṅ.

¹⁷Yĕh meuk kūö lanāmö an nö in chu lökten chu kiröngö miṙivlōn: Hāngen pöri me-eṅ tö ngih nômö chu öm ṙānyö e ṙā-ang el anūlö chūök töchahū-uyö: pò meh ngaich kavalngö nuk tökööl chu nö lā-uk chu.

¹⁸Pò ngam Anūlö nö ötkô nö ha-öinyö meh, ötkô ngam kinpaha nö hapōilen meh: yip chamuh el anūlö ötkô nö meūkkö ngam kanô-en meh.

¹⁹Ngam tö-aṅ, anga-aṅ min maha-öinyö meh, sā chu chū-ö in ngih sakāmö: ngam yöng vē nyīö min meumkahtölōn cha tö ngam kanô-en meh.

²⁰Höngöre an ngam Mā Tēv nö hayööken chu: lökten in min tikökṙôre tö në tinkökö chu i tö-inrötu ranöng irô-òtö sakāmö hī aṅ el patī ngam Mā Tēv.

²¹Ngaich ngö ṙô ang Isayā, Hökngen cha nö kē anychīr tömūlö, ngaich ṙātö e i kūö ngam vah nö intāp, ngaich lööken min anga-aṅ:

²²Ngö ṙô inrē Hēsikia, Asuh ap min minkahngö hòṅ chu chuh el patī ngam Mā Tēv.