Read Car_Nicobarese Isayā 39 Bible Online

Isayā 39 - Car_Nicobarese bible

Isayā 39

¹Hē e ang Merotakpalātön ök kikōnyö kūön Palātön, rācha aṅ Pĕpilön, nö söömtö nuk līpöre töchūichö, raneushö inrē nö in Hēsikia: pòn hāngan anga-aṅ nö vahavö, ngaich lööken nö hēk.

²Ṙāmölōn ngaich Hēsikia tö cha, hameukhömat cha ngaich anga-aṅ tök patī chūök chehen, rupīö, humlum, tötahūsa töpōiṙāi tavī-i, keuheūtlöre nuk el patī lanaklö ò nö kiyung, ṙòkhöre inrē nuk töng kôti nö el ök chūök chehen ò: öt hĕng hang nuk el patī ò, öt rēhĕn nuk im pūlngö ò, töt hameuktu tö Hēsikiā nö in cha.

³Yih ngaich ök pròfĕt Isayā nö ik rācha Hēsikiā, ngaich ngö ṙô tö ò, Asuh öp ṙô vē tarik? Ṙeū-eung yih aich inrē nö yih nö in meh? Ngö ṙô ngaich ang Hēsikiā, Yih yin nö in chu ṙā-ang tömaṙôvat panam, ṙā-ang Pĕpilön.

⁴Ngö ṙô anga-aṅ, Ngaich suh ap taheui maheuk cha nö el patī meh? Ngaich ngö ṙô Hēsikiā nö sapṙô ò, Ṙòkhöre maheuk yin tö nuk aṅ el patī chu: Öt hĕng hang i nup chehen chu töt hameuktu tö chu nö in cha.

⁵Ngö ṙô ngaich ang Isayā tö Hēsikiā, Hang ngam ṙô ngam Mā Tēv yip tömaṙôngö.

⁶Yĕh meuk, yih nup sakāmö, hē nup el ngam patī meh nö ṙòkhöre, tö nup hamūllö yik yöng meh inrē nö söl ing töngamuh tī, nö kē-ĕyö min nö i Pĕpilön: öt hĕng tit min töṙātu, tö ṙô ngam Mā Tēv.

⁷In yip kūön meh kikōnyö inrē yip lamöknyö in meh, yip hakūön tö meh, nö kē-ĕyö min tö cha; ngaich acha-a min nö kumkantöre nö el patī öp rācha aṅ Pĕpilön.

⁸Ngö ṙô ngaich Hēsikiā tö Isayā, Tölöök an ngam ṙô ngam Mā Tēv ngam ṙahônyö meh. Pòn ngö lōn anga-aṅ, Lanāmu min innyatluvö inrē i në sakāmö cha.