Read Car_Nicobarese Isayā 40 Bible Online

Isayā 40 - Car_Nicobarese bible

Isayā 40

¹Haṙamlōn, haṙamlōn më, tarik chu, ṙô ngam Tēv yīö.

²Vë-ekūö Yērusalem ṙēmöṙô, vë-enynang ò inrē tö ngam kinyūngö ò nö keuheūten, tö nup tökööl ò inrē nö aṙēlöngö; tö ò nö nëtö taneūngen nö eltī ngam Mā Tēv nö ṙënngen nup tökööl ò.

³Ngam ṙô öp töhĕng tak hamū-a, Halēn tölöökö ngam Mā Tēv yin el tönyaṅlnyi, hachip tökiröng talöökö ngam Tēv hī nö el tönyaṅlnyi.

⁴Kö aföhlöng ël nup min achāṙö ṙòkhöre inrē rôngö rung inrē nö piṙāptu kui: hachīpö inrē min tökuròk, halööktu kui inrē töpikakköre nö ṙong:

⁵Ngaich hameuktu min ngam minā-aṅ ngam Mā Tēv, ṙòkhöre mat min inrē tarik nö meūkö e; pòn ṙô elvāng ngam Mā Tēv angū-ö.

⁶Ngih ṙô öp töhĕng tak nö ngö ṙô, Hū-a. Ngaich ngö ṙô chū-ö, Sūāp min ṙô chu hū-a? Ṙòkhöre min në alaha nöng kiyôp, ṙòkhöre nup lanöökö in u inrē nöng sā panöpnyö ṙòng chōn elkôyö.

⁷Nyangngö kiyôp, nyīkngö panöpnyö kūö ṙòng chōn; pòn föötöre ngam unhômö ngam Mā Tēv nö i kui u: kô-òngrit ön ngòh tarik nöng kiyôp:

⁸Nyangngö kiyôp, nyīkngö panöpnyö kūö ṙòng chōn: örheūheu pöri min nö sökhaka ngam ṙô ngam Tēv hī.

⁹Ō më-eṅ vamë-eny tölöök inhānga i Siyôn, yônlö man in tömaṙô-òl kui ṙôngö; Ō me-eṅ vamë-eny tölöök inhānga i Yērusalem, holtö kumlēḵ re man pōitô; pōitô, um pa-ekūö; ngö ṙô tö nup elpanam Yūtā, Yĕh meuk Tēv meh an!

¹⁰Yĕh meuk yih an ngam Mā Tēv min nö sā tökalēḵ, hayöng ap min kël nö ṙënngen ò: Yĕh meuk, in ò ap tī ò raneushö, urēhĕkūö ò inrē ap tī ò inṙënngen.

¹¹Sā yōm pököre ap min nö ha-aṅlö nup pököre, hamūl nup kūön pököre ap min nö el kël re, tayūkö u inrē nö el ranôṙö re, ṙēmen min inrē nö hachōkūö u nup tökūöṅnö kūön.

¹²Achīö ap ṙung kamlah ṙôken mak nö ël kintāl eltī re, ane inrē mumkahngö ngam halīöngö nö aṅtī tö ṙôktāk eltī re, ngaich hachūökngö tumlat ngih panam nö el chūök nyanūmö, ane inrē kamlah lumngan në rôngö tö kinlah lumngan, në rung inrē nö el kinlah lumngan?

¹³Achīö ap mahachōkūö ngam Töhet Fanöinylö ngam Mā Tēv, hēk inrē öp mahalēnan nö haköpten ò?

¹⁴In chīö ang nö kēḵ inlēnö re, achīö ap inrē mahachōten ò, öp mahaköpten ò tö talöökö inkaha fālen, öp mahaköpten ò inrē tö inkaha, öp mahameukhömat ò inrē tö talöökö mikah elmat?

¹⁵Yĕh meuk, tö vē pumnāmö tarik nöng sā kintak tö mak nö el pālti, ngaich kaheuktu nöng pinṙōngö nö el kinlah lumngan: Yĕh meuk tö në kun panam nö ṙapka tö ò nöng sā töpahīöya pitung.

¹⁶Öt kô-òre an Lepenön nö ngòh, öt rēhĕn nup töṙeūla in e nö kô-òre nö töföngö tökētu.

¹⁷I kūö ò vē pumnāmö tarik nöng törö-övö, kaheuktu yin tö ò nö kūöṅen tö töng rö-övṙen, töt aṅhāvö inrē.

¹⁸Sā tī chīö-öi pökah haṙongten ngam Tēv, hēk inrē sā yòh tī öi asīnten ò?

¹⁹Töhaṙöichö ön ngòh insā tēv töp vamī-ire tarik, hapātö humlum inrē nö in ò öp ramöm humlum, vī rupīö sayōk inrē nö chehen.

²⁰Anga-aṅ ngam tölāḵngö yanāchö nö atöllö kahëtöre tö tökētu tö chōn töt hōḵ nö chahū-uyö; chöh tarik anga-aṅ töhuveū-en nö vī insā tēv öp töt mahalöinyköre.

²¹Öl öyih akahalōn? Öl öyih hang? Öt vënyu öng nö in yīö nö löktökūö ik ranehlö? Hö-ö öyih löktökūö ṙinātö rööntö ngih tumlat öi akahalōn?

²²Anga-aṅ an amūichhaka nö i kui chinvīṙö ngam tumlat, ngaich yip aṅ e inrē nöng sā hāyö; ngam pumnyūtnyö minë halīönyö nö sā ranangkūö, hanyāknyö u inrē sā rūkui nö elyöngö:

²³Ngam kamëten yip kūön rācha nö im ranö-övö; vīten yip ma-akah fālen anga-aṅ ing tumlat nöng töng rö-övö.

²⁴Hôṅ, öl nö rēhĕn nö ultu, öl nö rēhĕn nö teūichtu, öl nö rēhĕn ngam kaha u nö ṙĕhtöre nö el tumlat, hē ò nö fööngö kui u ngaich nyangngö anū-ö ngaich kumröön ngam lamfeui kuföt nöng sā kaṙālö afō.

²⁵Sā tī chīö öm min asīnten chu, öich hōtu ṙongta in ò? ṙô ngam Töhet Töhĕng tak.

²⁶Ngëicha yin môklökūöre lātulöng: öi ngëichkö ap vamīlö në, öp kamënyö u nö maṙôngö i tūmö u; havëken u anga-aṅ nö minënyu ṙô; lökten i ṙôkö kumlēḵ ò, kūö nganë-eṅ ngam minhôiṅyö ò inrē nö öt hĕng törö-övö.

²⁷Ō Yāköp, kūöyòh öm ngö ṙô, Ō Israĕl ngö ṙô man, Nyatngö öp talöökö chu nö im Mā Tēv, chööḵökūöre hòng inrē ngam aṅ in chu inkaha fālen tö ngam Tēv chu?

²⁸Hö-ö ömeh akahalōn? Öt hang ömeh? Tö ngam tö-örheūheu nö aṅ Tēv, ngam Mā Tēv, ngam Vamī-il në manā-angkūö ngam tumlat, nö öt chaṙīvi, öt rēhĕn nö cheingö; ÖT Chanöhen öp mikah elmat ò.

²⁹Kētö kumlēḵ ngòh tö chaṙīvi an; in ò inrē ngam töt kalē-en anga-aṅ nö ṙūölö kumlēḵ ò.

³⁰Chaṙīvi yip min ṙālö tarik cheingö inrē, ṙòkngöre inrē min yip ṙāl tarik nö fukngö:

³¹Acha-a pöri yip hamökkö ngam Mā Tēv nö tumfömlöng kumlēḵ min: kiteūlöre yip min cha-a nö sā kël matēṙö; fal yip min, ngaich öt hōk nö chei; kiröönngöre yip min, ngaich öt chaṙīvi.