Read Car_Nicobarese Isayā 41 Bible Online

Isayā 41 - Car_Nicobarese bible

Isayā 41

¹Ō yī-ö kun panam höng hangihtöre yin tö ṙô chu ui ṙô-òv; hökngen yip tarik nö tumfömlö kumlēḵre; hökten cha nö söntöre, ngaich möl yĕh nö ṙò-òv: tā-a töi hol re ṙūötöre im inkaha fālen.

²Achīö apa mahachohlö öp töhĕng tak aṅ lā chuhöt, öp töteūngen tö minhôinyö i tum vanāngöre? Kēngö pumnāmö tarik an nö ṙā-ang i kūö ò pò ò nö hòṅ rööntö kui yip rācha nö elkatòh röön re; vīten cha anga-aṅ nö sā pitung i kūö öp sanët ò, sā nup kaṙālö afō töheuilö nö ip linreny ò.

³Lū-u cha anga-aṅ, ngaich iṙūöhngö röön nö öt fëhevṙen; lök im talöökö anga-aṅ tötha-eh nö röönka tö ò.

⁴Achīö ap vamīken e nö tökeuheūten tö e, öp mahavëkö tumköl chap tarik nö löktökūö ik raneh? Chū-ö chin, Öich Mā Tēv, mu-uṙĕh, ngaich hol öp manā-aṅ, öich chū-ö Anga-aṅ.

⁵Meuk minë kun panam, ngaich pa-ekūö; kayīna nup manā-angkūö ngam tumlat; ṙūöltöre ngaich anū-ö nö yihtöre.

⁶Kö holṙen hanöng kisānöre cha-a; ngaich kö ngö ṙô tö hol re, Ui pa-ekūö.

⁷Lökten ök vamī chōn nö hangë-eṅl alaha öp ramöm humlum, anga-aṅ inrē öp mahamën nö aṅtī tö mūngöre nö röm nö i kui ngam rūlö, ngö ṙô töp pirum inpanngökūö, Vāi ana: ngaich haköpngö e anga-aṅ nö aṅtī tö kīny lökten e nö öt halöinyköre.

⁸Me-eṅ pöri, Israĕl, tarik chu Yāköp ngam katöllö chu, ngam kūön Aprahām ap hol chu.

⁹Me-eṅ töṙapka tö chu löktökūö manā-angkūö ngih tumlat, ngaich ṙā-ang kūö sinkeukngö e öich havëken meh, öich ngö ṙô tö meh, Tārik chu man me-eṅ, katöllöng man tö chu rö-ö öm kavāliyö;

¹⁰Uh man pa-ekūö, tön in meh chin; um ngangngökūö, tön chū-ö chin Tēv meh: hangëṅlen meh chin min; hôṅ, holṙen meh chin min; hôṅ, ṙapken meh chin min aṅtī tö lahāmö kël ngam lanöökö chu.

¹¹Yĕh meuk, ṙòkhöre yip töföinyö ellōn nö lā-al meh min nö sirōngkūö kalūöchöre el kui inrē: cha-a yip kamlahare nö lā-al meh min nö sā töng rö-övö ngaich payāyi min.

¹²Chöhöh cha man min, ngaich öt kôtökūö tö cha, cha-a yip töhòṅ lā-al meh: cha-a yip kumyung nö lā-al meh min nöng sā töng rö-öv, sā töng hö-övö inrē.

¹³Pò chu Mā Tēv öich Tēv meh ṙamapkö lahāmö meh, öich ngö ṙô tö meh, Um pa-ekūö; holṙen meh chin min.

¹⁴Um pa-ekūö, Me-eṅ kamlökö Yāköp! Yī-ö inrē tarik Israĕl; holṙen yīö chin min ṙô ngam Mā Tēv; ngam Töhĕng tak Töhet aṅ Israĕl ṙamānyen meh.

¹⁵Yĕh meuk, vīten meh chin min öm tufömngöre pinṙongnyö ṙòng sāiny öm keut öm kanāpuvö: ngaich me-eṅ min piṙöhngö minë rôngö, ngaich sōngö u öm kiṙöpö u nö kūöṅnö, vīten minë rung inrē nöng sā uk nëlö.

¹⁶Heūyö u min me-eṅ, ngaich ngam kuföt min nö kumten u nö marô-òlkūö, pirātngen u min inrē ngam lamfeui kuföt: ngaich me-eṅ min ṙāmölōn im Mā Tēv, eū-eure min me-eṅ im Töhĕng Töhet in Israĕl.

¹⁷Chöh mak öp yāich öp tö hāṅten inrē ngaich rö-övö angū-ö, kavôṙa litāk cha-a ngaich kūö yanālöre; ngaich chū-ö min samap ṙô cha öich Mā Tēv, chū-ö Tēv Israĕl min öich öt ṙāngen cha.

¹⁸Löpnyö kūö tahël chin min i kui nup töngasnyi lātulöng, töhëmnyi mak inrē löknyö ellōn nup achāṙö: vī ngam tönyalnyi chin min nö chūök törūḵngö mak, ngam tönyô panam inrē nö chūök töpöklö mak.

¹⁹Ul tö sītör chin min el tönyalnyi, tö akasīa chōn martil inrē, tö chōn tavī-i; el tönyalnyi tī chin min tö för chōn, tö pāin, chōn kasòng inrē nö holre:

²⁰Hòṅ tarik nö meuk, nö akahalōn, nö ngëicha, ngaich holre nö akaha elmat, tö e nö ngam kël ngam Mā Tēv tötī-iv tö e, tö ngam Töhĕng Töhet inrē aṅ Israĕl nö vīten e.

²¹Hameuktö ngam chööḵnyöre man, ṙô ngam Mā Tēv; kētö öp inmeuktö kanô-en ngam chööḵnyö meh, ṙô ngam rācha Yāköp.

²²Hökngen cha nö kēnyö u, vënyö öp lāinyngen u min inrē nö in hī: ve-eny nup lamā urĕh yin, asuh nūpa, hòṅ hī mikahtö elmat re tö u, ngaich akahakūö töp manāngen u nö lā-unôich; hēk inrē hameukhöti in ih tö nup yamih.

²³Vë-eny nuk yamih nö unôichrit ngih, hòṅ ih akahalōn tö yīö öi tēv: hôṅ, la-evṙen tö tölöök, hēk la-evṙen tö tölöök, hēk la-evṙen tö tötlöök hòṅ ih ngònglökūö, ngaich holre inrē öi hatīönkö e.

²⁴Yĕh meuk, aṅ i töng rö-öv yin yī-ö höng ranö-ö inrē ngam la-en yīö, sin-òkkūö ngam kamtöllen yīö an.

²⁵Ngaich chin hĕng tak hachōhlö ṙā-ang lā kapā, ngaich an nö yih, löktö lā maneutlö ngam tavūöi hĕng tak öp mahavëkö minë-eny chu: yih ap min nö i kui yip mahayöng nö sā sanông, sā tī öp vamī tanīöyö inrē tö ngam tilin.

²⁶Achīö ap vamënyö e nö ngaich nö löktökūö ik raneh, hòṅ ih akahalōn, ök lamā urĕh inrē, hòṅ ih ngö ṙô, Anga-aṅ an tölöök, hôṅ, öt hĕng tak töṙô-òvö, hôṅ, öt hĕng tak mahameukhöti, hôṅ, öt hĕng tak hamang nup ṙô meh.

²⁷Ngö ṙô chin min tö Sīyôn, Yĕh meuk, ngëichken cha; hĕng tak kahëti chin min i Yērusalem töp tö kumtö tölöök inhānga.

²⁸Ngaich hē chu ngëicha, öt hĕng tak tarik umuh; öt rēhĕn cha-a nö īnu tö mahalēn, lökten, hē chu hatönö cha, öt hĕng tak tökô nö hĕng milôhò sahap tö ṙô.

²⁹Yĕh meuk, ṙòkhöre yip nö la-evṙen tö chanök alaha ranö-övö inrē: kuföt kinlūöchöre el kui inrē nup insā tēv cha töhaṙöichö.