Read Car_Nicobarese Isayā 42 Bible Online

Isayā 42 - Car_Nicobarese bible

Isayā 42

¹Meuk ngam tarik chu, ngam ṙahapkö chu; katöllö chu, in ò ap kumchiklōn chu: in ò tī chin tö ngam töhet fanöinylö chu; kētö inkaha fālen an min nö in vē pumnāmö tarik.

²Öt hū-a öp min öt rēhĕn nö pōitö ṙô, öt rēhĕn öp ṙô ò min nö hāngö nö el talöökö.

³Öt lakölö tī ap min tö tökaṙöp tafūyu, ane inrē öt nyangngö tī min anga-aṅ töp törahëch tit hanūṙö kūö tö hilāṙu ëāṅvö: i kanô-enre ap min nö kēnyö inkaha fālen.

⁴Öt hō ap min nö öt teunglen öt rēhĕn nö öt ngëṅngöre alaha, hanöng saha tī ò nö haköpngö inkaha fālen nö ing tumlat; ngaich në kun panam min nö hökkö öp chöngö ò.

⁵Ngö ṙô an ngam Tēv, ngam Mā Tēv, ngam vamīlö minë halīöngö hanyāknyö u inrē, ngam mahaṙīöngnyö ngih tumlat tö nup samīöp ël e inrē, ngam kamëtö unhômö tarik yip aṅkūö e kētö ngam ma-alaha inrē nö in cha yip kumröön nö el e:

⁶Chū-ö chin Mā Tēv, havëten meh chin im lanöökö, ṙapkö kël meh chin inrē min aṅten meh inrē, ngaich kē-ĕkūö meh öm kinlēḵngô i vē tarik, hanātö in vē pumnāmö tarik;

⁷Lamöpnyö kūö mat tötmeuk, kamënyö töhakövö nö ṙā-ang el insongngö cha, cha-a inrē yip amūchhaka nö el sinngūlö nö ṙā-ang ël öp patī chūök inkövö.

⁸Chū-ö chin Mā Tēv; angū-ö an minë-eny chu: hö-ö chin min kēngö ngam kanôlòre nö i tahëng, öt rēhĕn ngam nöinyö chu nö i töka-īpö insā tēv.

⁹Yĕh meuk, teungtökūö nuk lamā-urĕh nö ngaich, vë-eny tufömngöre chin töngamuh; vë-enynang meh chin tö u urēhĕkūö maneuinylö u.

¹⁰Tikökhökūö ngam Mā Tēv tö tufömngöre tinkökö öp nöinyö ò inrē löktökūö manā-angkūö ngam tumlat; yī-ö chamuh el mai, ṙòkhöre nup aṅ e inrē, minë kun panam, tö yip aṅ u inrē.

¹¹Hökngen öp tönyalnyi tö nup elpanam ël e inrē nö pōitô, nup tuhēt chūök Kētar nö iyöng; hökngen yip aṅ Sēla nö tikökṙôre nö ṙāmölōn, hökngen cha nö ayôṙa nö löktökui minë rôngö.

¹²Hökngen cha nö eū ngam Mā Tēv vë-eny ngam nöinyö ò inrē nö i nup kun panam.

¹³Kiröönngöre an min ngam Mā Tēv sā tarik tökalēḵ; sā kumyung an min tarik nö haruhlö tanānyöre: hū-a an min, hôṅ, pōitô an min nö ayôṙa hameuk tö kumlēḵre an min nö in yip lā-alre.

¹⁴Marô-angen chin öt ṙô-òv; öt halöinyköre chin, höng ṙāpöre: ngaich chin töngamuh hū-a sā ök kikānö kamyôḵ; kisak unhômöre chin min.

¹⁵Tiṙōlngö minë rôngö chin min, Tö minë rung inrē, hanyangngö nup kun chōn u chin min; ngaich vītö nup tahël nö kun panam, ngaich hanyôngö nup törūngö mak.

¹⁶Kētö tötmeuk chin min nö el ap talöökö töt mikahkūö cha; el kanröönö öich hachō-o cha min öp töt mikahkūö cha: vītö sinngūlö chin min i kūö cha nö hanātö, tökuròk inrē nö chip. Anū-ö nun min tī chu, hö-ö chin min ṙāngen cha.

¹⁷Havānörit yip min, ngaich cha-a min nö aṙū-angen nö sirōngkūö, yip mahayönglenre nö i töka-īpö insātēv yip tö ngö ṙô tö nup töhaṙöichö insātēv, Yī-ö yin tēv ih.

¹⁸Hangihtöre, yī-ö töthang; ngëicha inrē yī-ö tötmeuk, hòṅ yīö meuk,

¹⁹Achiāp tötmeuk, tön höng ngòh tarik chu? Hēk töthang, nö sā ngòh tanīnöṙô chu ngòh tahīntö chu? Achīö ap tötmeuk nö sā ò ngam mī-in chu nö lāmta, tötmeuk inrē nö sā ngam tarik ngam Mā Tēv?

²⁰Pōyen maheuṅk man, hö-ö pöri töpömat öm meūkö u; luvë-akkūö nup elnang ò, hö-ö pöri anga-aṅ nö hang.

²¹Kuchīkölōn ngam Mā Tēv, tökūö ngam lanöökö ò, nö hapōilö ngam chöngö, vī-i e inrē nö tö-eū-eu.

²²Tarik pöri vē tö-ulāyiṙen tökīlö inlānen inrē, ṙòkngöre vah yin nö tingöpö nö el nup anūlö hayūni inrē nö el kinlongngö tarik; pôḵ yin nö töt hĕng tak ṙamānyi, pôḵ yin nö öt hĕng tak tö ngö ṙô, Havan tö e.

²³Achiāp umuh in yīö öp kamëtö elnang re min nö i ngih? Öp mahangihtöre min nö hang öp yamih ṙētak inrē?

²⁴Achīö ap kamëngen Yāköp nö pôḵ, Israĕl inrē nö i tötūmu? Röh ang nö ngam Mā Tēv? Anga-aṅ ngam chūök ò nö köölö fālen, ngam tö talööku inrē tö nup sahō-o cha nö talöökö cha, ngam töchöngu inrē tö ngam ahôngen cha.

²⁵Lökten nö hōngtö kui ò tö ngam tanānyö lanīnö ò, tö kumlēḵ ngam kinyūngö inrē; ngaich angū-ö nö ṙāten ò nö havīlöng tö tameūyö, sönngenre anga-aṅ nö öt akahalōn; ökngö kūö ngaich angū-ö tö ò, sönngenre anga-aṅ nö öt ṙātö e nö ellōn re.