Read Car_Nicobarese Isayā 43 Bible Online

Isayā 43 - Car_Nicobarese bible

Isayā 43

¹Ngö ṙô pöri ngam Mā Tēv töngamuh, anga-aṅ ngam vamīlen meh, Ō Yāköp, anga-aṅ inrē ngam mahachipngen meh, Ō Israĕl: Um pa-ekūö tön ngaich chin ṙānyen meh: havëken meh chin tö ngam minë-eny meh, chū-ö chu mana.

²Yē meh lök el mak, in meh chū-ö min; lök el tahël inrē ngaich anū-ö min nö öthōḵ nö pökngö tī tö meh: yē meh lök kūö tameūyö, ngaich öthō me-eṅ min ökngö; öt rēhĕn min ngam töhū kūö nö pachôllöngkūö nö i kui meh.

³Pò chu chū-ö Mā Tēv, Tēv meh Töhĕng Töhet in Israĕl, Mahayööken meh; kēten Aikup chin ngaich nö ṙāi meh lumnööṙö meh inrē Itī-ōpia, Sepa inrē.

⁴Pò meh töpōiṙāi i kūö chu, tö-eū-eu inrē, hāngenlōn chū-ö inrē tö meh; lökten chin min kētö tarik nö lumnööṙö meh, tarik tömaṙôngö inrē nö ṙënngen nômö meh.

⁵Um pa-ekūö; tön holtöṙah meh chin: kētöp kūön meh chin min nö ṙā-ang lā chuhöt, hamūlö meh inrē löktökūö lā sūng;

⁶Ngö ṙô chin min tö ngam lā kapā, Ṙā-angtī re; tö ngam lòhngö inrē, Heūlngöre man; kētö yip kikōnyö kūön chu ṙā-ang tömarôvat, yip kikānö kūön chu inrē ṙā-ang manā-angkūö ngam tumlat.

⁷Ṙòkhöre yip töhavëka tö minë-eny chu, yip tövīlöng tö chu inrē tö ineū-eu chu; vahī chu an; hôṅ, chū-ö chin vamī an.

⁸Kētö yip tötmeuk tarik yip töng mātu, töthang inrē yip töng nānguvö.

⁹Hökngen yip pumnāmö tarik nö hēngö mūlö, hökngen yip tarik inrē nö hamūlö: Achiāp tökô in cha nö vë-eny ngih, hameukhömat ih inrē tö nuk lamā-urĕh? Hökngen cha nö kētö yip vamë-eny nö lā in cha, hòṅ cha nö chipngen: hēk hökngen cha nö hang, ngaich ngö ṙô, Kô-en ana.

¹⁰Yī-ö yin mameūkö chu, ṙô ngam Mā Tēv ngam tarik chu inrē katöllö chu: hòṅ yīö akahalōn ṙātö ellōn re inrē in chu, ngaich akaha elmat tö chu öich anga-aṅ; urēhĕkūö chu öt tēvu tö tö vī-i öt rēhĕn min nö lā unôichngöre tö chu,

¹¹Höng chū-ö chin Mā Tēv; öt hōlu chin tö mahayööken.

¹²Ngāichô chin ve-eny, ngaich chin inrē hayööken, ngaich inrē hameukhöti, ngaich rö-öyö inrē tötohtöre tēv in yīö: lökten yin yī-ö vamënyen chu, ṙô ngam Mā Tēv, chū-ö chin inrē Tēv.

¹³Hôṅ, löktökūö ik misī chin Öich chū-ö Anga-aṅ; Öt hĕng tak tökô ṙamā-any nö ṙā-ang eltī chu: lā-evṙen chin ngaich achīö tökô nö asökngö tī chu tö e?

¹⁴Ngö ṙô An ngam Mā Tēv, ngam ṙamānyen meh, ngam Tönghĕng Töhet aṅ Israĕl: Pòkūö yīö chin öich tīnhanga i Pĕpilön, ngaich kēten cha chū-ö min nö ṙòkhöre nö sā ma-afalngöre, pòrô yip aṅ Kāltī, ngaich nup ṙanāmölōn cha min nö havāngtu nö inrāmöre.

¹⁵Chū-ö chin Mā Tēv, Töhet in Meh, Vamīlen Israĕl, öp rācha yīö.

¹⁶Ngö ṙô an ngam Mā Tēv, ngam vamī talöökö nö el mai, kanröönö inrē nö el tökalēḵ mak;

¹⁷Ngam kamënyö inröl, kōra inrē, kumyung inrē nö kiyung; hulalngöre cha-a nö holtö ṙahre, Öt chōholre min cha-a hanyāngi cha-a min, ngaich sā hilā ëāṅvö nö nyangngö.

¹⁸Uh yin köpölōn tö nuk mu-urĕh, un rēhĕn nö ngëichka nuk hötṙeh.

¹⁹Yĕh meuk, vī tufömngöre chin; ngaich an nö sīöplöre öt meūkö e ömeh? Vī talöökö chin min el tönyalnyi kuyāyö.

²⁰Eū-eu chin min tö töṙeūla aṅ elinchōn chakāl ôsrich inrē: pò chu kētö mak el tönyalnyi, tahël inrē el tönyalnyi kuyāyö, nö òk yip tarik chu, katöllö chu:

²¹Yip tarik vahī chu nö tarik chu pòn hōtu cha-a nö ṙô-òv tö nöinyö chu.

²²Sönngenre me-eṅ öt havëken chu, Ō Yāköp; me-eṅ pöri, Ō Israĕl, mahaṙeiken chu.

²³Hö-ö man kētö kun sīṅp nö töföngö tökētu, öt rēhĕn öm eū-eu chu tö nup kahëtö meh in chu. Rö-ö chin lumnganken meh kētö tökētu, öt rēhĕn haṙiken meh tö tötahūsa paröm.

²⁴Hö-ö me-eṅ havah lam-euṅh chu nö ṙāi tö rupīö öt rēhĕn öm hatööḵngen chu tö tösangöö kahëtö meh. Lumngānö chu pöri me-eṅ tö tökööl re, hachëyö chu me-eṅ tö öt lanöököre.

²⁵Höng chū-ö chin Anga-aṅ samichngö nuk tanôichngen meh öich höng chööḵnyö töre: ngaich chū-ö min öt köpölōn tö nuk tökööl meh.

²⁶Fēlen chu tā-a töi vë-ekūöre; hameuknyö ngam kahòkköre man, hòṅ meh hameuktu töchip.

²⁷Köölö fālen ök yöng meh, ap vame-elkui meh inrē nö tôichngen nö in chu.

²⁸Lökten chin hachōichngö yip mā ngam chūök töhet, ngaich chū-ö min kēten Yāköp, nö im öt inkôlò, Israĕl inrē im ötlinëkö elnang.