Read Car_Nicobarese Isayā 46 Bible Online

Isayā 46 - Car_Nicobarese bible

Isayā 46

¹Sōntöre an Pel, sōnngöre Nepō; i uk töṙēula nun minë insātēv cha, i uk nuā inrē minë tökeūnö tö yīö nö lumngan nö chaplöng nö i uk töchei töṙeūla.

²Sōnngöre anū-ö, holre anū-ö nö sōntöre, ötkô anū-ö nö ahöhölre tö ngam lumngan, holre pöri nö chuh el inkövö.

³Hangihtöre tö ṙô chu Ō patī Yāköp, ṙòkhöre inrē chööḵṙen aṅ patī Israĕl, me-eṅ tötayukka tö chu löktökūö finötnyö meh löktökūö el chūök kanūönö öm tētka:

⁴Chū-ö chin anga-aṅ, pòrô me-eṅ ngaich öm köiny, söl i pakūkui meh min öich tētö meh: vī chin, keun min inrē; hôṅ, tēt chin min, hayööken inrē.

⁵Sā chīö min tö tī yīö öich haṙongtu, haṙongtu chū-ö inrē, pò ai hōtu hĕngren?

⁶Yöng ṙôken humlum nö löknyö el inyul, rupīö inrē tökalaha lumngan nö el chūök kinlah lumngan, haṙāi ramöm humlum cha-a, ngaich anga-aṅ nö vī e nö tēv; afukngöre cha-a, ngaich ve-ekūö ò.

⁷Keūnan cha-a nö el ranôṙöre, keūnan cha-a, ngaich asöklen ò nö ip chūök ò, sökhaka ngaich anga-aṅ; öt kē-ĕngre min anga-aṅ nö ṙā-ang im chūök re: hôṅ, hĕng tak min öpvamë-eṅkūö ò, ngaich rö-ö anga-aṅ nö kô nö sapṙô, öt rēhĕn nö kô nö hayööken ò nö ṙā-ang i kanihngen ò.

⁸Köpölōn tö ngih, ngëicha inrē fē-ĕlre hēk tö e, Ō yī-ö tötôichngen.

⁹Köpölōn tö nup misī urĕh: tön chū-ö chin Tēv, öt tahëngu; Tēv chin, öt tahëngu inrē tösā chu;

¹⁰Vënyö öp manā-aṅ löktökūö ök ranehlö, löktökūö nuk misī hēk nup tö-öl inrē an ngam inlēnö aṅ in chu, hateungngö nup chööḵnyöre chin min:

¹¹Öich havëtö öp chehechōn aṅ lā chuhöt öp tökapahare, öp aṅ panam tömarôvat öp tarik aṅ ip halēnlö chu; hôṅ, ṙô-òv chin ngaich, ngaich hateungtökūö e min inrē chööḵnyu chin, ngaich la-evṙen min tö e.

¹²Hangihtöre tö ṙô chu, yī-ö töngë-eṅ ellōn, öi tömarôvat tö lanöökö:

¹³Kētö ngam ṙinānyö chin nö röhta, hö-ö an nö marôvat, öt hangöhngöre min inrē ngam inyööken tö chu: ṙātö öp inyööken chin min i Sīyôn, lumnööṙö Israĕl ngam ineū-euṅ chu.