Read Car_Nicobarese Isayā 47 Bible Online

Isayā 47 - Car_Nicobarese bible

Isayā 47

¹Tā-a yôkti, ūichngöre el tumlat, Ō rēlö kikānö Pĕpīlön; ūichngöre el tumlat öm öt kantēravö, Ō kikānö kūön aṅ Kāltī: tön rö-ö man ngöhören invëka tö-ayālö alaha.

²Kē ngam ihong kinṙīöt, ngaich kiṙīöt atra, kēngö ngam kinṙul kūö re, luhngö ngam tökiröng inyut meh, haṙīöngnyö ngam kalröön, lök el minë tahël kiröönngöre.

³Hameuknyu ap min linchôyö meh, hôṅ, meūkö ap min sinrōngkūö meh: Kē invahal vah chin min, hö-ö chin min aṙēlu tö tarik.

⁴Ṙamānyen ih, Mā Tēv yip tömaṙôngö an ngam minë-eny ò, ngam töhĕng töhet in Israĕl.

⁵Ūichngöre un takākaṙô kuhēthötre inrē el sinngūlö, Ō me-eṅ kikānö kūön aṅ Kāltī: tön rö-ö man ngöhören invëka öm mā kikānö i nup pūlngö.

⁶Līn chin in yip tarik re, ngaich öich hachōichngö amin re, öich kēten cha nö eltī meh: ngaich öt hameukhömat cha me-eṅ tö miṙēlōn; hakeunlö yip tököiny man töp kaneun meh tölangan.

⁷Ngaich ngö ṙô me-eṅ, tötchanūhuvṙen chin mā kikānö: Lökten meh öt ṙātö në nö ellōn meh, öt rehĕn öm afēkö öp unôich manāngen e.

⁸Lökten hangihtöre tö ngih me-eṅ kumchikngenre i kumchiklōn, mi-iyöng ël töt vīnëku öm tö ngö ṙô ellōnre, Chū-ö chin, öt hōlu chin tö inrē; hö-ö chin sā anūchö tafīösi kikānö öt rēhĕn min öich akahakūö tö kinpahlöre tö kūön re;

⁹Teunghö kui meh nun min në tönët nöng vuphë i töhĕng sakāmö, kinpahlö tö kūön re tinfiösngö inrē: yih nup min nö i kui meh nö tööḵlö nö el nyanūmöre, pòrô yip töpōyen in meh tömilūönö, nup töpōyen inrē in meh inchūṙö.

¹⁰Pò meh hayönglenre i öt lanöököre: öm ngö ṙô, Öt hĕng tak mameuk chin; halō-oikūö man ngaich tö ngam mikah re ngam huneū-eu elmat meh inrē: ngö ṙô me-eṅ inrē ellōn re, Chū-ö, hö-ö chin hōluvö.

¹¹Lökten öp tötlöök min nö teunghökui meh; öt akahatenre man min tö öp yanīhih e fuk kui man min tö öt inkôlò; ötkô min me-eṅ lakngö e: ngaich min nöng vuphë yanīhih öp tinṙōlngö meh öp öt mikahlōn meh.

¹²Söklöre man öm hachū holtö yip tömaṙôngö tömilūönö ip la-en meh öm löktökūö nyinī-öṅre: yē meh min kô teunglen, lohten min inrē öm vīlö pinhë-eṅkūö.

¹³Cheingö man ngaich tö nup töpōyen inlēnö, hökngen u ngaich nö sökhak, nö hayööken meh nö ṙā-ang i nup, tameunghö kui meh, acha-a yip maharēv minë halīöngö, yip tötēltamat nö i minë taneūsömat, yip mu-urĕhnyô nö vë-eny öp tameunghökui meh ip tufömngöre chingëṅt.

¹⁴Yĕh meuk, höng sā kaṙālö afō yip; ṙāpngö yip min tökūö tameūyö; hö-ö yip min nö ṙānyöre nö ṙā-ang i kumlēḵ kūö ngam tameūyö: hö-ö ap min nö ta-ök tameūyö nö meūi cha, öt rēhĕn nö tameūyö chūök hī kô ūichhakaṙen.

¹⁵Ngatī nup min nö in meh ip chūök meh öm la-evṙen, cha-a yip mi-inyihkö chehen nö hol meh löktökūö nyinī-öṅ meh min nöng kö alēṙa nö ip chūökre; öt hĕng tak min umuh mahayööken meh.