Read Car_Nicobarese Isayā 48 Bible Online

Isayā 48 - Car_Nicobarese bible

Isayā 48

¹Hang ngih, Ō yī-ö aṅ patī Yāköp, öi töhavëka tö minë-eny Israĕl, öi yamih löknyö i ṙat Yūtā; ngam Mā Tēv, kamakkö ngam Tēv Israĕl inrē, hö-ö pöri nö im kanô-en öt rēhĕn nö im lanöökö.

²Pò cha nö havëköre nö aṅ ngam töhet elpanam, ngaich hayönglenre nö im Tēv Israĕl; Mā Tēv yip tömaṙôngö ap minë-eny ò.

³Vë-eny nuk aṅ i tö misī chin; hôṅ, ngaich nuk nö ṙā-ang elvāng chu, ngaich chū-ö inrē mikahtölōn yīö tö u; höng vuphë tī chū-ö tö u ngaich teungtö yīhih anū-ö.

⁴Pò chu akahalōn tö meh tömi-ô, ngam likeun meh inrē nö vët nö rahēḵ, mās inrē ngam māl meh;

⁵Lökten chin vë-eny u in meh löktökūö tö misī; vë-eny u chin in yīö urēhĕkūö u nö yih; hòṅ meh öt ngö ṙô, Tī ngam insātēv chu nun, ngam töka-īpö insātēv chu tö ngam töhaṙöichö insātēv inrē töchönguvö tö u.

⁶Ngaich man hang; meuk në; ngaich hö-ö hòng min me-eṅ vë-eny u? Löktökūö töngamuh chin ahangnyö elnang meh tö nup tufömngöre, nup tönyatngö, tö-öl mikahlōn meh.

⁷Vīlöng nup töngamuh, hö-ö nö maṙô-angen; öthāngö u me-eṅ urēhĕkūö ngih tötaheui sakāmö, Hòṅ meh öt ngö ṙô, Yĕh meuk, akahalōn chin tö u.

⁸Öl man hāngö u, öt hĕng heuk inrē akahalōn, hôṅ, löktökūö misī an ngam elnang meh nö öt löpnyukūö: pò chu akahalōn tö meh mu-ulāikenre ahôngen chöngö, ngaich löktökūö el chūök kanūönö öm kaheūkö ma-ahôngen.

⁹Kūö ngam minë-eny chu öich ahāṅtö yīhih ngam lanīnöre kūö ngam ineū-eu chu öich ṙapken e nö öt löö in meh, hòṅ chu öt rökngen meh.

¹⁰Yĕh meuk, halööktit meh chin, rö-ö pöri öm sā rupīö kalaha meh chin el öp töhūkūö inkihten.

¹¹Pòkūö chu, öich la-evṙen tö e, sitih ṙöng öng min ngam minë-eny chu nö hachōchi? Hö-ö chin hòṅ kētö ngam ineū-eure i tahëng.

¹²Hangihtöre tö ṙô chu Ō Yāköp, Israĕl inrē ngam havëkö chu: chū-ö chin Anga-aṅ; chū-ö chin raneh, chū-ö min anga-aṅ; chū-ö chin Raneh, chū-ö inrē Manā-aṅ.

¹³Hôṅ, ṙātö rööntö ngam tumlat ön ngih kël chu, hanyāknyö minë halīöngö inrē ngih lāhāmö kël chu: hē chu havëken u, holre ngaich anū-ö nö söklöre.

¹⁴Hamūlöre yin ṙòkhöre öi hang, achiāp in cha vamënyö në? Hāngenlōn an ngam Mā Tēv tö ò; hateungten ap chöönyö re an min nö i Pēpilön, lā-al yip aṅ Kālti ap min kël ò.

¹⁵Chū-ö takô chin tö ṙô-òv; hôṅ, havëken ò chin, kēten ò chin, ngaich kôlò min anga-aṅ nö el talöököre.

¹⁶Hang ngih, ṙūötöre in chu; löktö kūö ik raneh chin öt ulāikôre ṙô-òv, hētentö ök yanīhih e ngaich chū-ö umuh: ngaich töngamuh ngam Mā Tēv nö tīnten chu tö ngam Töhet Fanöinylö ò.

¹⁷Ngö ṙô an ngam Mā Tēv, ngam Ṙamānyen meh, ngam Töhĕng Töhet aṅ in Israĕl: Chū-ö chin Mā Tēv, Tēv meh, öich mahaköpten meh hôṅ meh kanôluṙô, öich mahachō-o meh el öp hinôtö meh talöökö lahök meh.

¹⁸Mah hangṙô chu man öre i minë chöngö chu! Ngaich öre ngam lanāmö in meh nöng sā tahël, ngam lanöökö meh inrē nöng sā mahūvö ngam mai:

¹⁹Sā kuyāyö öre inrē yip kūön meh, yip lamöknyö in meh inrē nö sā pinhīöyö kuyāyö: öthō öre öp minë-eny ò nö rökiṙen öt rēhĕn nö piyāyi nö i kūö chu.

²⁰Kunyī-inyre yin ṙā-ang Pēpilön, falngöre ṙā-ang in yip aṅ Kaltī, pōitô yin vë-eny e höltö ṙanāmölōn, ahangkö e, söömngö e söl ip manā-angkūö ngih tumlat; ngö ṙô, Ngaich an ngam Mā Tēv nö ṙānyö öp tarik re Yāköp.

²¹Öt haṙëhe nômö cha-a hē ò nö lök eltönyalnyi nö hachōnyen cha: pòn vītö mak anga-aṅ òk cha nö löknyö ik Ihong nö hëmnyi: lirak ök Ihong inrē anga-aṅ ngaich pòpnyi ök mak.

²²Ngö ṙô an ngam Mā Tēv öt lanāmuvö umuh in yip tötlöök.