Read Car_Nicobarese Isayā 49 Bible Online

Isayā 49 - Car_Nicobarese bible

Isayā 49

¹Yī-ö kun panam, hangihtöre tö ṙô chu; hang inrē yī-ö tarik aṅ tömarôvat. Ṙeū-eung el chūök kanūönö chin havëka tö ngam Mā Tēv; löktökūö ellōn öp yöng kikānö anga-aṅ nö kakkö minë-eny chu:

²Ngaich vī elvāng chu anga-aṅ nö sā tökeut tachôi, elnyat kël re tī anga-aṅ nö hayunngen chu; ngaich vī-i chu anga-aṅ öich chòk töfaṙëcha alaha, halinngen chu anga-aṅ el chūök chòk:

³Ngaich ngö ṙô anga-aṅ tö chu, Kūön alaha chu man; Israĕl, ngam chūök ineū-eu chu min.

⁴Ngö ṙô pöri chū-ö, Chök alaha tī chin la-evṙen, mëichngö kumlēḵre chin chöö-önytö töng rö-öv chanök alaha: sön pöri öp huneū-en chu nö im Mā Tēv, ap invahal vah chu inrē nö im Tēv chu.

⁵Ngaich yi ngam Mā Tēv nö ngö ṙô, ngam mamūlö chu ṙā-ang el chūök kanūönö öich tarik ò, öich kamëten Yāköp hēk nö in ò, hòṅ Israĕl inrē nö hamūltu nö in ò; pò chu ineū-euvö i kūö ngam Mā Tēv, ngaich vītöre ngam Tēv chu nö kumlēḵ chu:

⁶Ngö ṙô anga-aṅ, töhöhövṙen an angū-ö tö meh öm tarik chu mahachohlö miyöngö Yāköp, mahavantö ngam töma-īṅlöng ang Israĕl; kēten meh chin min öm ëāṅvö i yip pumnāmö tarik, hòṅ ngam inyööken aṅ in chu nö sölngö i manā-angkūö ngih tumlat.

⁷Ngö ṙô An ngam Mā Tēv, ngam ṙāmānyen Israĕl ngam Töhĕng Töhet inrē, tö ngam tö yāich nāichngen, tösō-ovö tö pumnāmö tarik, ngam tarik aṅ i mahayöng: meuk min yip Rācha chōholre inrē; kūön rācha, cha-a inrē min fātngökūöre; kūö ngam Mā Tēv, ngam tökô-en, Töhĕng Töhet in Israĕl, ngam kamtöllen meh.

⁸Ngö ṙô An ngam Mā Tēv, Sapṙô meh chin ik töhō-ov ṙētak, holṙen meh chin ik sakāmö inyööken: haköpken meh chin ngaich kēten meh öm kinlēḵngô in vē tarik, öm mahaköpngö ngam panam ngaich michööḵ ngam töngasngö panam nö amin;

⁹Ngö ṙô tö yip tö-asōngi, Kunyī-inyre, in cha yip më-el sinngūlö, Hameuktöre. Nyā yip min nö el talöökö i nup töngasngö rôngö nup kiyôp nyā-aṅkūö;

¹⁰Öt kapahare yip min hēk öt haṙëhe nômö, öt rēhĕn nö ngesngö tökūö kuföt öt rēhĕn ngam tavūöi min nö chökhutī tö cha, pò ò ngam tö aṙē-ĕlōn tö cha min nö hachō-o cha, ngaich lök i nup töhëmlö mak nö hachōkūö cha min.

¹¹Vī në rôngö chin min ṙòkhöre nö talöökö, ṙūölö chūök tö kiröng chin min talöököre.

¹²Yĕh meuk, cha-a yin vē min yamih nö ṙeū-eung tömarôvat, yĕh meuk vē ṙameū-eung lā kapā, lā sūng inrē, cha-a vē inrē ṙeū-eung panam Sī-enī.

¹³Tiköknyö ṙanāmölōn, Ō yī-ö halīöngö, kiröngö ṙanāmölōn, Ō më-eṅ tumlat: tiṙōlnyôre, öi tikökṙôre Ō yī-ö rôngö: tön ngaich an ngam Mā Tēv nö haṙamlōn yip tarik re, ngaich min nö aṙē-ĕlōn tö yip tökihten tarik ò.

¹⁴Ngö ṙô pöri Sīyôn, Ṙā-ai chin tö Yāvē, vaichngen chu inrē ngam Mā.

¹⁵Kô ang ngòh nyīö nö vaichngö tö ngam pamôḵ kūön re, nö öt aṙē-ĕlōn tö ngam nyīö kikōnyö aṅ el chūök kanūönö ò? Hòṅ, vaichngö yin cha-a nö kô-òren, hö-ö pöri chū-ö hō vaichngen meh.

¹⁶Yĕh meuk, ka-iphötnen meh chin el kintāl eltī re; örheūheu nun minë kinlōngö meh nö i kūö chu.

¹⁷Veūtö tī yip mamānlen meh tö yip pumyāihanga; ngaich cha-a inrē yip tumṙölngen meh nö kiröönngöre min nö ṙā-ang in meh.

¹⁸Môklökūöre man öm ngëicha havinngö mat re: ṙòkhöre yin nö hamūlöre, yih yin nö in meh. Sā chu tö aṅ, ṙô ngam Mā Tēv, ngaich me-eṅ min hanyöṅtlöre tö cha nö ṙòkhöre nö sā yanöṅtö, nyëklen cha min me-eṅ inrē sā tī ap töhapīhö.

¹⁹Kô-òngrit nun minë töpiyāyi töt aṅhavkūö inrē chūökö, ngam panam meh inrē tö-ahātiṙen, ngaich man min kô-òngrit inrē öm cheūkti, chūök yip aṅkūö meh, ngaich cha-a inrē yip ngameūkten meh min nö marôvat.

²⁰Ngaich yip nyīö min töfötnyu i hē ngih miṙivlōn meh nö ngö ṙô min nö elnang meh, Cheūkti ön ngih chūökö nö chūök chu: kētö chūök chu hòṅ chu iyöngtöre.

²¹Ngaich ngö ṙô min me-eṅ elōnre: Achiāp kamyônyö vē nö kūön chu, yē chu misī tömiṙīvilōn tö yip kūön re, ngaich öich höng hĕng töṙah, tö-ahötiyö, töng apāṙaṙen inrē ihī-a umū-a? Achiāp uvö maharuklö vē? Yĕh meuk, töng hĕngtöṙah chin ṙā-ayö ṙamā-ang yih aich vē nö yih?

²²Ngö ṙô an ngam Mā Tēv, Yĕh meuk, hachônglö kël re chin min in vē pumnāmö tarik, i vē tarik inrē öich asöklö ngam minkahngö; ngaich cha-a min nö kumtö yip kikōnyö kūön meh nö elngòh cha, keūnö min inrē yip kikānö kūön meh nö el ranôṙö cha.

²³Harūkö meh min yip rācha nö kūön re yip rānī cha inrē nö yöngnyīö nö harūkö meh: sōntöre min cha-a nö in meh nö lā-ël tumlat kūö, ngaich kurak pitung röön meh, ngaich akahalōn min me-eṅ tö chu öich chū-ö Mā Tēv; yip hamökken chu örhō min nö sumrōngikūö.

²⁴Kô yip min pôḵ nö kē-ĕ nö ṙā-ang im tökalēḵ, hēk inrē yip tökē-ĕ tö öp pinhë-eṅkūö nö ṙanānyen?

²⁵Ngö ṙô pöri ngam Mā Tēv, Kē-ĕ yip min yip kahë öp tökalēḵ nö pòrô, öp pôḵ öp pinhë-eṅkūö inrē min nö ṙānyuvö pò chu min lā-al cha yip lā-al meh, ngaich chū-ö min hayööken yip kūön meh.

²⁶Ngaich chū-ö min vīten yip mahakihten meh nö kā alaha re, ngaich hiyōi min cha-a tökūö mahām re, sā hinyōyöre tökūö vāin. Ngaich ṙòkhöre min tarik nö akahalōn tö chu öich Mā Tēv mahayööken meh, ṙamānyen meh inrē, hĕng tak tökalēḵ aṅ in Yāköp.