Read Car_Nicobarese Isayā 51 Bible Online

Isayā 51 - Car_Nicobarese bible

Isayā 51

¹Hangihtöre tö ṙô chu yī-ö tamömken tölöök, yī-ö chamöh ngam Mā Tēv; ngëichkö ngam ihong ngam löknyö yīö öi faslöngö, ngam chūök ihong inrē ngam löklö yīö öi ullöngö.

²Ngëichken Aprahām kikōnyö yöng yīö Sërah inrē kamyôḵnyen yīö; havëken ò chin misī hē ò nö ṙòngmöng hĕng tak, hakôlò ò chū-ö inrē ngaich vīlen ò nö maṙôngö.

³Pò ngam Mā Tēv min nö haṙamlōn Sīyôn; ṙòkhöre haṙamlōn an min tö nup tötaṅhavkūö chūökö, ngaich vī ngam tönyalnyi ò min nö sā Ēten, ngam kuyāyö tönyalnyi inrē nö sā ngam panô-òṅ ngam Mā Tēv; kumchiklōn ṙanāmölōn inrē min kôti nö in ò, nöinyö ṙô, tinkökö inrē.

⁴Hangṙô chu, yīö tarik chu, kētö elnang re in chu, yī-ö pumnāmö tarik chu; tön löknyö in chu öp min chöngö nö kunyī-inyre, öp töt michūḵṙen kinṙôka inrē nö ëāṅvö nö in yip tarik.

⁵Röhta an nö ngaich nö veūten ngam ṙinānyö aṅ in chu, ngaich ök inyööken aṅ in chu nö kiröönngöre, ngaich në kël chu min nö hayöng vē tarik; hökken chu nun në kun panam, meūka nun nö ing kël chu.

⁶Môklökūöre yin i minë halīöngö, ngëichkö ngam tumlat lātaṙeū; tön sā lul nun min minë halīöngö nö chaṙēviṙen, ngam tumlat min nö sā hanūönyngö hilā, ngaich cha-a yip mī-iyöng in e min nö kapah sā ṙūöitöhòk; öt chanūhuvṙen pöri ngam inyööken aṅ in chu, ngam ṙinānyö inrē aṅ in chu höng öt keuheūtaṙen.

⁷Hangihtöre tö ṙô chu yī-ö tö-akahakūö tö lanöökö, yī-ö tarik tö-aṅhav ellōn töm chöngö chu; uh yin pa-ekūö töm minṙēngö aṅ i tarik, ui ngangngö kūö inrē tö öt linëkö ṙô re tö cha.

⁸Tön kā-ayö yip min tö maneui nö sā hilā, kā-ayö min inrē cha-a tö kamlökö nö sā sanôi sīṅp; höng örheūheu pöri min ngam ṙinānyi aṅ in chu, ngam inyööken inrē aṅ in chu söl i tumköl chap.

⁹Aṅhen, Aṅhen, kē kumlēḵ re Ō kël ngam Mā Tēv; aṅhen, sā hē nup sakāmö hötṙeh, nup tumköl chap tömarô-angen. Röh öm me-eṅ misī ramökö Rāhap nö panyeny, tötafūni tī tö ngam tulan?

¹⁰Röh öm me-eṅ misī tönyôlö tī töm mai, töm mak ngam tö-aṙū-uti; vamīten ngam lataṙeū ngam mai nö talöökö yik töṙānyuvö nö chööḵngö kui e?

¹¹Ngaich havantöre min yip töhavaha tö ngam Mā Tēv, ngaich yih nö i Sīyôn nö holtö tinkökṙôre; öt chanūhuvṙen öp ṙanāmölōn min nö i kui cha; teūngen yip min tö kumchik lōn ṙanāmölōn inrē, falngöre min nö marôvat miṙīvlōn anū-unglōn inrē.

¹²Höng Chū-ö chin mahaṙamlōn meh; achīö öm me-eṅ töpa-ekūö tö töng kapah tarik tö kūö tarik töng sā kiyôp,

¹³Tövaichngö inrē tö ngam Mā Tēv, ngam vamī-i meh, ngam mahanyāknyö minë halīöngö ṙamātö rööntö ngam tumlat ngaich iṙūöhö pinhe-eṅkūö irô-òtö ngam sakāmö tökūö tanānyö öp mahakihten yē ò nö söklöre nö hòṅ fëlhanga? Isuh apa tanānyö ngam mahakihten?

¹⁴Anga-aṅ öp samônngöre min ka-eūyen nö luhnyu; öt kapah ap min anga-aṅ nö chuh el Anūlö, öt rēhĕn öp nyā-aṅkūö ò min nö keuheūt.

¹⁵Pò chu chū-ö Mā Tēv, Tēv meh inrē, pumyavlö ngam mai lökten e nö pōitô mahūṅvö Mā Tēv yip tömaṙôngö ap minë-eny ò.

¹⁶Ngaich chū-ö chaphöt minë ṙôre elvāng meh, ngaich hanyatngen meh el nyat ngam kël chu, hanyāknyö minë halīöngö ṙātö rööntö ngam tumlat inrē, ngaich ngö ṙô tö Sīyôn, Tarik chu yin yī-ö.

¹⁷Haruhkö alahare yin, haruhkö alahare, Ō Yērsalem, söklöre yī-ö amòk eltī ngam Mā Tēv el chūök òk ngam lanīnö ò, yī-ö amòk kūö ngam töchilū pingāṅl öi hiyōi ngaich palēviyö.

¹⁸Öt hĕng tak umuh mahachōḵkūö ò in yip kikōnyö kūön ò kayônyö ò; öt hĕng tak umuh kamëlö kël ò in yip kikōnyö haruklö ò kūön ò.

¹⁹Nët nun në famuk in meh chiāp min mahaṙamkölōn meh? Inhatngö pinyāingö inrē inyāichö tachôi fël inrē: chiāp min mahaṙamlōn meh?

²⁰Tayē alaha yik kūön meh kikōnyö keuheūt kui talöökö yip nö hulalhaka sā Entelòp nö el inhāṅl; tööḵngen yip tö lanīnö ngam Mā Tēv, tö ngam vinë-a aṅ im Tēv yīö.

²¹Lökten yin hang ngih yī-ö töhakihtuṙen, öi mihiyōi, ötkūö vāin pöri:

²²Ngö ṙô an ngam Mā, ngam Mā Tēv, Tēv yīö ngam vamë-el kui vē tarik re: Yĕh meuk, ngaich chin kē eltī meh tö ngam chūök òk pinlēvngö; ngam töchīlu pingāṅl chūök lanīnö chu, hö-ö yin ngöhöre kūö ôkö e hēk;

²³Kētö e chin min eltī yip mahakihten yīö, yip tö ngö ṙô tö yīö, Sōnngöre, hòṅ ih lökngö kui yīö; ngaich yī-ö vī ngam ukre nö sā tumlat sā talöökö cha inrē nö tövāngi kui.