Read Car_Nicobarese Isayā 53 Bible Online

Isayā 53 - Car_Nicobarese bible

Isayā 53

¹Achīö ap ṙamātö ellōnre nö i në ṙô tö ngaich nö hāngö tö ih? In chīö öng inrē nö ngaich ngam kël ngam Mā Tēv nö hameuktu?

²Pò ò nö sīöplö nö i kūö ò nö sā tö-ayal chōn, sā ṙĕh inrē nö sīöplö nö löklö el tönyô tumlat; öt sāta ana hēk ötvāyö mineūkö inrē, töp lökten hī hòṅ ngëichken ò, ane inrē öt löökö sanöökö töp lökten hī hāngenlōn tö ò.

³Töt hakūökaṙen an tösō-ovö inrē tö tarik; tarik miṙivlōn an, tö-īnu inrē tö miṙivlōn; sā öp töhĕng tak an inrē chūök tarik nö hanyatngö kūö re öt hakūökaṙen anga-aṅ rö-ö ayīö inrē hāngen tö ò.

⁴Kô-en an nö ngaich nö keun miṙivlōn hī, tayuk miṙivlōn hī inrē, ngaich ayī-ö höng hökngen ò nö fōhoh? Hachökö tö ngam Tēv, hakihtuṙen inrē.

⁵Ngaich pöri anga-aṅ nö nyāhavö kūö tökööl hī paṙôkö alaha anga-aṅ kūö öt lanöökö hī; i alaha ò ap chinökṙen tölööken tī tö hī, ngaich ayī-ö lökten i nup tinfônö ò öi lööken.

⁶Ṙòkhöre in ayī-ö sā sīṅp tölō-ongkūö; kö havööngökūö re in i talöökö lōn re; ngaich ngam Mā Tēv nö hakeunlen ò tö nup tökööl hī ṙòkhöre.

⁷Taṙāmö ana, hakihtuṙen inrē hö-ö pöri anga-aṅ nö vā-anykūöre; sā öp kūön sīṅp tö tūöktu nö ip ṙamatnyö likeun, sā öp sīṅp inrē i kūö yip kammöp nöng öt ṙô-òvö.

⁸Kē-ĕyö anga-aṅ lökten i inkihten inkaha fālen inrē; in yip tumköl chap ò, achiāp ngamëchngöre tö ò nö rökiṙen nö ṙā-ang i panam tö-aṅ, fōhoh kūö tökööl vē tarik chu?

⁹Holtöṙah tötlöök anga-aṅ tö tī cha nö el anūlö holtö tarik pöri tökôlò im kinpaha ò, pòrô anga-aṅ nö öt chökhuṙen öt rēhĕn nö aṅhav elvāng tö inchīlö.

¹⁰Ngaich pöri nö lōn ngam Mā Tēv nö piṙòknyö alaha ò; kēten ò anga-aṅ nö i miṙivlōn: hē meh vīten öp nômö ò nö tökētu kūö tökööl, meuk öp kūön re an min, ngaich ṙūötö sakāmö ò min anga-aṅ; kôlò ap min lōn ngam Mā Tēv nö eltī ò.

¹¹Meuk ṙòng kanihngen an min nö ellōnre ngaich tööḵönglōn; lökten ngam in ò inkaha ngam tölöök min, ngam tarik chu, nö pōyen vahīten tö tölöök; ngaich anga-aṅ inrē min nö keun nup tökööl cha.

¹²Lökten chin min michööḵ an tö minchööḵö tökiröng, ngaich anga-aṅ min inrē nö michööḵ pôḵ nö in öp tökalēḵ; pò ò nö vōknyö aṅ i nômö re nö im kinpaha, kaheuktuvö inrē anga-aṅ nö i tötlöök; sön anga-aṅ nö keun tökööl tömaṙôngö, ane inrē ve-elkui tököölö fālen.