Read Car_Nicobarese Isayā 54 Bible Online

Isayā 54 - Car_Nicobarese bible

Isayā 54

¹Ō Më-eṅ tötkūönu, tikökṙôre man me-eṅ tötkamyôḵnyö nyīö; kaknyöre tikökṙôre, pōitô inrē hū-a, më-eṅ töt mahalöinyöre i kinyôḵnyö nyīö: tön saṙaklöngkūö yip kūön öp töt aṅhavökūö tö yip kūön ò öp töpīhövö, tö ṙô ngam Mā Tēv.

²Ṙūönyö chūök rūkuire man, hökngen nup ranangkūö nup chūökṙen meh nö ṙūönyu ṙôktāk; um heūlköre, ṙūönyö rôta nup tökuvaha meh hangëkö nup tötōktu inrē chōn.

³Tön pirātngöre man min öm pōiti chūök lāhāmö meh lātavē meh inrē; ngaich yip kūön meh min nö amintö vē pumnāmö tarik, ngaich aṅhavkūö min tö tarik minë töt aṅhav elpanam.

⁴Um pa-ekūö tön öthō man min siṙōngkūö um kalūöchöre elkui, tön öthō man min sumrōngikūö; pò meh min vaichngö ök sumrōngkūöre öm ayal, ök minṙēngö meh inrē öm tafīösī hö-ö me-eṅ min köpölōn tö e.

⁵Pò ngam Vamī-i meh nö anga-aṅ kikōnyö pīhö meh, Mā Tēv yip tömaṙôngö ap minë-eny ò; ngam Töhĕng Töhet inrē in Israĕl nö Ṙamānyen meh, Tēv ngih panam nö ṙòkhöre ap invëkö ò min.

⁶Pò ngam Mā Tēv nö havëken meh nö sā ṙô öp inpīhö töṙā-ayö töhaṙīvö ellōn inrē, sā öp inpīhö tö-ayal yē ò nö kavāli, tö ṙô ngam Tēv.

⁷Pò chu höng rahëchhangkūö ṙāngen meh, holtö tökiröng miṙēlōn pöri min chū-ö hamūlö meh.

⁸I tinṙēchlö ngam lanīnöre chin rahëchhangkūö öich hanyatngö kūöre tö meh, holtö ngam, tötchanūhuvṙen pöri min hanāngenlōn öich aṙē-ĕlōn tö meh, ṙô ngam Mā Tēv ngam Ṙamānyen meh.

⁹Pò ngih nö in chu nö sā nup sakāmö Nō-a: sā ṙô chu chūöku ṙô tö nup mak hē Nō-a nö sōtu nö havantöre nö i kui ngih tumlat, ngatī chū-ö chūökuṙô töre min öt līn in meh öt hatānyö meh min inrē.

¹⁰Pò në rôngö nö pòrô nö kiröönngöre kē-ĕngre inrē në rung, hö-ö pöri ngam tököp hanāngenlōn chu nö kiröönngöre nö ṙā-ang in meh, ngam kinlēḵngô lanāmö inrē min nö öt kē-ĕyö, ṙô ngam Mā Tēv, ngam tö-aṙē-ĕlōn tö meh, ṙô ngam Mā Tēv.

¹¹Ō me-eṅ töhakihtuṙen tö tasôka el chanôchö mai, töng öt inṙamkulōn inrē, yĕh meuk, ṙātö nup ihong meh chin min in nup töng lingūṅ elmat ihong, ṙātö chūök rööntö machööḵlö meh inrē in nup safīr.

¹²Vī nup tulkui patī meh chin min nö akēt, nup inkūp meh min inrē nö töngāṅvö mat nö ihong, ṙòkhöre min inrē ip kinlōngö meh nö ihong töpōiṙāi.

¹³Ṙòkhöre inrē min yip kūön meh kikōnyö nö haköptu tö ngam Mā Tēv, ngaich pōyen inrē min kanôlòṙen yip kūön meh kikōnyö.

¹⁴Haköpi man min im lanöökö: marôvat yin min tö öp inkihten lökten yīö min öt pa-ekūö; ip vanööṙö inrē, pò e min nö öt yih nö röhta nö in yī-ö.

¹⁵Yĕn hĕng tak öp maharuhlen linā-alkūö, öt aṅ in chu ap angū-ö; öp maharuhlen linā-alkūö nö in yīö ngaich in yīö min angū-ö nöng pòtī yīö.

¹⁶Yĕh meuk, vīlö ngam ramöm vët chin ngam famöölökūö tameūyö nö im ta-ök, ngaich vīlö töchökhukūö aṅtī nö ip chööḵnyö e; vīlö ngam mahalëlhanga chin inrē nö piyāihanga.

¹⁷Öt hĕng nup min nyahati tövīlöng nö nyahā meh nö kô-òlkui, ngaich me-eṅ min asökngö litāk öp chamôhòlre nö lā-al meh ip inkaha fālen. Angū-ö ön ngih amin yip tarik ngam Mā Tēv minhôinyö cha inrē ṙamā-ang in chu, ṙô ngam Mā Tēv.