Read Car_Nicobarese Isayā 55 Bible Online

Isayā 55 - Car_Nicobarese bible

Isayā 55

¹Mah, yihtöre i minë mak yip töhaṙëhe nômö; anga-aṅ inrē öp töt āṅhav-in tö rupīö, tā-ih, havah hòṅ re nyā-aṅvkūö; ta-ih, havah vāin aṅteh inrē öt ṙāi tö rupīö höng öt ṙāyu inrē.

²Kūöyòh öi mëichngö rupīö i ngam töt nyā-aṅkūö, kūöyòh inrē mëichngö la-enre i ngam töt töö-önglōntī? Haṙēmngenre hang ṙô chu, ngaich nyā-aṅvkūö tö tölöök, ngaich kumchikngenre i kanôlò.

³Asītö elnang re yin, yihtöre inrē in chu; hangihtöre hòṅ ngam nômö yīö nö aṅ; hòṅ vīten ngam töt chanuhuvṙen kinlēḵngô chin in yīö, ngam kanöpö chu, ngam tökô-en hanāngenlōn chu inrē tö Tāvit.

⁴Yĕh meuk, vīten ò chin nö mahameukhöti nö in më tarik, mahachōkūö töchöngu inrē nö in vē tarik.

⁵Yĕh meuk, havëtö öp töt mikahkūöre man min pumnāmö tarik, yip pumnāmö tarik inrē töt akahakūö tö meh min nö faltöre nö in meh, kūö ngam Mā Tēv ngam Tēv meh, kūö ngam Töhĕng Töhet inrē in Israĕl, pò ò nö hapōilen meh.

⁶Chöh ngam Mā Tēv isaha ò nö ṙòngmö kôti, havëken ò isaha ò nö ṙòngmö röhta:

⁷Hökngen ngam tötlöök nö ṙāngö ngam talöököre, ngam tarik inrē tötchiplö ellōn nö ṙāngö ellōnre: hökngen ò nö havantöre nö i ngam Mā Tēv, hòṅ ò nö aṙē-ĕlōn tö ò; havantöre inrē nö pōyen tī nö aṙē-ĕlōn tö ò; havantöre inrē nö im Tēv hī, hòṅ ò nö pōyen tī nö aṙē-ĕl.

⁸Pò nup lōn chu nö öt lōn meh, öt rēhĕn nup talöökö chu nö talöökö meh, ṙô ngam Mā Tēv.

⁹Pòn sā minë halīöngö nö marô-òl chūök töm tumlat, ngatī në talöökö chu nö marô-òl chūök tö minë talöökö meh në lōn chu inrē nö marô-òl chūök tö minë lōn meh.

¹⁰Pòn sā ngam kumṙah tö ngam tökënngöre tacham inrē nö yih nö ṙā-ang el halīöngö ngaich öt havanritre nö in e nö hēk, hamak ngih tumlat pöri ngaich vīten e nö asīöplö manôlnyö ṙòng chōn, kētö kulöl tī ngam tameūich nup tönyā-aṅ inrē nya-aṅkūö:

¹¹Ngatī min ngam ṙô chu ṙameū-eung elvāng chu: öt havantöre nö in chu nöng ötkūmuṙen, hateungngö öp lōn chu pöri min angū-ö, ngaich kôlòṙen nö in öp tinīnngöre tö chu.

¹²Pò yīö min ṙāmölōn kiröönngöre hachōḵo inrē im kumchikṙen: tikökṙôre nun min minë rôngö tö minë rung nö urēhĕkūö meh, ngaich ṙòkhöre min minë chōn ngam el kahôyö nö fatāk eltī re.

¹³Ṙënngen töchökhu kaha nup för chōn min nö yih, ngaich ṙënngen nup pīkōḵ nö yih nup tötahūsa rōi chōn min; ngaich min nö inköpkölōn tö ngam Mā Tēv, minkahngö nö töt ranökngenṙen.